Read sango 1 Samuel 15 Bible Online

1 Samuel 15 - sango bible

1 Samuel 15

¹Samuel atene na Saul: “Mbi laa *KOTA GBIA atokua mbi lani ti tuku mafuta na li ti mo titene mo ga gbia ti azo ti Israel, azo ti lo. Fadeso, ayeke nzoni mo ma tënë so KOTA GBIA atene.

²Tënë so KOTA GBIA so ayeke na ndö ti dunia kue atene ayeke so: ‘Fade mbi yeke fâ ngbanga na ndö ti azo ti Amalek ndali ti ye so ala sara ando na azo ti Israel. Azo ti Amalek akanga lege na ala na ndembe so ala londo na sese ti Ezipte ti sigigi.

³Fadeso, gue, mo tiri bira na azo ti Amalek, mo buba aye ti ala kue, mo zia mbeni oko angba pepe. Mo fâ akoli na awali, amolenge na akete amolenge so angba ti nyon mê, abagara, ataba, *azambala nga na alele.’ ”

⁴Saul airi aturugu so ayeke tambula na gere si lo diko wungo ti ala na Telem. Wungo ti ala kue ayeke saki ngbangbo use; ti ala ti Juda, wungo ti ala kue ayeke saki baleoko.

⁵Saul ague ngbii asi na gbata ti azo ti Amalek. Lo na aturugu ti lo ahonde tere ti ala na ndo so ngu ayeke sua daa, me ngu ni ahole awe.

⁶Saul atene na azo ti Keni: “Ala ngba na popo ti azo ti Amalek pepe; ala londo na tere ti ala ahon yongoro. Mbi ye titene mbi fâ ala na azo ti Amalek kue pepe, ngbanga ti so na ngoi so amolenge ti Israel alondo ando na sese ti Ezipte ti sigigi so, ala, azo ti Keni asara nzoni na ala.” Tongaso, azo ti Keni alondo na tere ti azo ti Amalek ahon.

⁷Saul afâ azo ti Amalek, ti londo na Havila ngbii asi na Shur so abaa le na Ezipte.

⁸Saul afâ azo kue na yongoro zeme. Me lo gbu Agag, gbia ti azo ti Amalek, lo fâ lo pepe.

⁹Saul na azo ti lo abata Agag na fini. Ala bata nga anzoni taba na angasa, anzoni bagara so angba ngangu nga na akete taba. Anyama so kue ayeke anzoni, Saul na aturugu afâ ala pepe. Me gi angengo nyama, ala so ayeke nzoni pepe si ala fâ ala kue.

¹⁰Tënë ti KOTA GBIA asi na Samuel, atene:

¹¹“Be ti mbi aso ndali ti so mbi sara si Saul aga gbia. Biani, lo ke mbi awe si lo ke ti ma yanga ti mbi.” Li ti Samuel aga kirikiri si lo sambela KOTA GBIA na bi ni kue.

¹²Na kota ndaperere, Samuel alondo ti gue ti wara Saul. Mbeni zo atene na Samuel: “Saul ague na Karmel, lo mu atêne, lo leke aluti na nduzu ndali ti lo wani. Na pekoni, lo kiri, lo hon yongoro si lo gue na Gilgal.”

¹³Samuel aga nduru na tere ti Saul si Saul atene na lo: “KOTA GBIA asara tufa na ndö ti mo. Mbi sara ye alingbi na tënë ti yanga ti KOTA GBIA.”

¹⁴Samuel ahunda ndo, atene: “Nyen laa mbi yeke ma tongana toto ti ataba na toto ti abagara so?”

¹⁵Saul akiri tënë: “Aturugu agbu ala na kodro ti azo ti Amalek si aga na ala. Ala bata anzoni taba na anzoni bagara ti mu na *sandaga na KOTA GBIA, Nzapa ti mo. E fâ tanga ti aye kue.”

¹⁶Samuel atene na Saul: “Kai si! Mbi ye ti tene na mo tënë so KOTA GBIA atene na mbi na bi so.” Saul atene: “Tene tënë ni.”

¹⁷Samuel atene: “So mo yeke baa tere ti mo wani lani tongana kete zo so, KOTA GBIA laa asara si mo ga makonzi na li ti azo ti Israel pepe? Lo tuku mafuta na li ti mo si mo ga gbia ti azo ti Israel.

¹⁸KOTA GBIA atokua mo, atene: ‘Mo gue, mo fâ azo ti Amalek, azo ti sarango siokpari so kue kue kue si mo buba aye ti ala kue.’

¹⁹Mo ma yanga ti KOTA GBIA pepe ngbanga ti nyen? Ngbanga ti nyen si mo gue daa hio ti ro aye na peko ti bira? Ngbanga ti nyen si mo sara ye so ayeke sioni na le ti KOTA GBIA?”

²⁰Saul akiri atene na Samuel: “Mbi ma yanga ti KOTA GBIA. Mbi gue na ndo so lo tokua mbi ti gue daa. Mbi fâ azo ti Amalek kue, mbi gbu gi gbia ti ala Agag, mbi ga na lo.

²¹Aye so kue e gbu na peko ti bira si e lingbi fade ti buba ni kue so, aturugu asoro anzoni taba na angasa nga na anzoni bagara titene ala mu ni na sandaga na KOTA GBIA, Nzapa ti mo na kodro ti Gilgal.”

²²Samuel akiri atene: “Asandaga so a yeke gbi ni kue na wâ nga na ambeni sandaga anzere na be ti KOTA GBIA ahon mango yanga ti lo? Mango yanga ayeke nzoni mingi ahon asandaga; mango tënë ayeke nga nzoni mingi ahon anyama ti mafuta.

²³Kengo yanga ayeke sioni tongana bingo zeke; sarango ngangu li ayeke sioni tongana sambelango anzapa nde. So mo ke yanga ti KOTA GBIA so, lo nga lo ke mo awe. Mo yeke gbia mbeni pepe.”

²⁴Saul atene na Samuel: “Mbi sara siokpari awe; mbi ke yanga ti KOTA GBIA awe, mbi ke tënë ti mo. Mbeto ti aturugu laa asara mbi si mbi ma yanga ti ala.

²⁵Fadeso mbi gbu gere ti mo, siokpari so mbi sara so, zi tënë ni na li ti mbi. Ga, mbi na mo, e kiri legeoko titene mbi gue, mbi voro KOTA GBIA.”

²⁶Samuel atene na Saul: “Mbi na mo, e yeke kiri legeoko pepe. Mo ke yanga ti KOTA GBIA si lo nga lo ke mo awe. Mo yeke gbia ti Israel mbeni pepe.”

²⁷So Samuel akiri na peko ti gue, Saul agbu yanga ti kota bongo ti lo si bongo ni asuru.

²⁸Samuel atene na lo: “Lege so laa KOTA GBIA azi lengo-gbia na maboko ti mo laso na ndö ti Israel; lo mu ni na mbeni zo nde so ayeke nzoni ahon mo.

²⁹Kota Gbia, lo so lo yeke gonda ti Israel ayeke tene mvene pepe. Lo yeke zo pepe titene lo kiri na peko na ndö ti tënë ti lo.”

³⁰Saul akiri atene: “Mbi sara siokpari awe. Fadeso, mbi gbu gere ti mo, mo ne mbi na dawa ti *akangba ti kodro ti mbi nga na dawa ti azo ti Israel. Ga, e na mo, e kiri legeoko titene mbi gue, mbi voro KOTA GBIA, Nzapa ti mo.”

³¹Samuel na Saul akiri legeoko si Saul ague ti voro KOTA GBIA.

³²Na pekoni, Samuel atene: “Ala ga na mbi Agag, gbia ti Amalek.” Agag ni ayeke gue na tere ti Samuel, ngia na yanga ti lo. Lo yeke tene na be ti lo, lo tene: “Biani, ngoi ti mbeto ti kuâ ahon awe.”

³³Me Samuel atene na lo: “Yongoro zeme ti mo asara si amama ayeke na vundu ndali ti amolenge ti ala. Fade mama ti mo nga ayeke na vundu ndali ti molenge ti lo.” Tongaso, Samuel afâ Agag na dawa ti KOTA GBIA na Gilgal.

³⁴Na pekoni, Samuel akiri na Rama si Saul ague na ndo ti lo na Gibea.

³⁵Samuel akiri abaa Saul pepe ngbii si lo kui. Samuel asara mawa ndali ti Saul. Me ti KOTA GBIA, be ti lo aso, ngbanga ti so lo sara si Saul aga gbia ti Israel.