Read sango 1 Samuel 19 Bible Online

1 Samuel 19 - sango bible

1 Samuel 19

¹Saul atene na molenge ti lo Jonatan nga na azo ti gbe ti lo so lo leke na be ti lo ti fâ David. Andaa Jonatan, molenge ti Saul aye David mingi.

²Jonatan atene tënë ni na David, lo tene: “Babâ ti mbi Saul ayeke gi lege ti fâ mo. Kekereke na ndaperere, mo sara hange. Mo gi mbeni ndo, mo honde tere ti mo daa.

³Ti mbi, fade mbi yeke sigigi, mbi tambula na babâ ti mbi na yaka so mo yeke gue ande daa. Mbi yeke tene tënë ti mo na babâ ti mbi ti hinga tënë ti be ti lo si mbi yeke tene peko ni na mo.”

⁴Jonatan atene nzoni tënë ti David na babâ ti lo Saul, atene: “Ayeke nzoni gbia asara siokpari pepe na tere ti zo ti kua ti lo David, ngbanga ti so lo sara siokpari na tere ti mo pepe. Me lo sara nzoni ye mingi ndali ti mo.

⁵Lo ka yingo ti fâ Goliat, zo ti Filistii. Na lango ni so, *KOTA GBIA asara si azo ti Israel kue aso benda. Mo baa ye ni na le ti mo si tere ti mo anzere ndali ni. Mo ye ti tuku mene ti mbeni zo so asara sioni pepe ngbanga ti nyen? Mo ye ti fâ David senge senge ngbanga ti nyen?”

⁶Saul ama tënë ti Jonatan si lo deba yanga ti lo, lo tene: “KOTA GBIA ayeke na fini! Fade mbi yeke fâ David pepe.”

⁷Na pekoni, Jonatan airi David, lo tene na lo peko ti atënë so kue. Lo mu David, lo gue na lo na Saul. Tongaso, David asara kua ti lo tongana ti kozo.

⁸Bira akiri alondo. David ague ti tiri bira na azo ti Filistii. Lo fâ ala mingi si ala kpe na dawa ti lo.

⁹Sioni yingo so alondo na *KOTA GBIA aga na ndö ti Saul. Saul aduti na ya ti da ti lo; likongo ti lo ayeke na maboko ti lo, andaa David ayeke pika kundi.

¹⁰Saul abi likongo ti kpo na David, ti pete lo na tere ti dere ti da. Me David adingi tere ti lo si likongo ni akpo dere ti da. David akpe na bi ni so, lo hon.

¹¹Saul atokua azo na da ti David ti bata lo titene na ndaperere, ala fâ lo. Me wali ti lo Mikal atene na lo: “Tongana mo kpe na bi so pepe, kekereke fade a yeke fâ mo.”

¹²Mikal ayoro David na le ti fenetere, David azu na sese si lo kpe, lo hon.

¹³Na pekoni, Mikal amu yanda ti da, lo zia na ndö ti gbogbo. Lo kanga poro ti ngasa na mbage ti li ti lo si lo zia bongo na ndö ni.

¹⁴Tongana Saul atokua azo ti gbu David, Mikal atene: “Tere ti lo aso.”

¹⁵Saul akiri atokua azo ni ti baa David. Lo tene na ala: “Ala yo lo na gbogbo ni aga na lo na mbi titene mbi fâ lo.”

¹⁶Azo ti tokua ni ague, ali na ya ti da ni, ala wara gi yanda so a leke na poro ti ngasa na mbage ti li ti gbogbo ni.

¹⁷Saul atene na Mikal: “Mo handa mbi tongaso ngbanga ti nyen? Mo zia wato ti mbi akpe ahon ngbanga ti nyen?” Mikal akiri tënë na Saul: “Lo tene na mbi, lo tene: ‘Zia na mbi lege, mbi kpe, mbi hon, tongaso pepe, mbi yeke fâ mo.’ ”

¹⁸So David akpe ahon, lo gue na kodro ti Rama na ndo ti Samuel si lo fa na Samuel peko ti aye so kue Saul asara na lo. Na pekoni, lo na Samuel ague ti lango na kodro ti Nayot.

¹⁹Azo ague, atene na Saul, atene: “Baa, David ayeke na Nayot, nduru na Rama.”

²⁰Saul atokua azo ti gbu David. Azo ni aga abaa bongbi ti awayanga-Nzapa so ayeke tene peko ti tënë ti Nzapa. Samuel laa ayeke na li ti ala. Yingo ti Nzapa agbu azo so Saul atokua ala si ala nga asara ye tongana awayanga-Nzapa.

²¹Azo ague, atene tënë ni na Saul si lo kiri lo tokua ambeni zo nde. Me azo ni so nga asara ye tongana awayanga-Nzapa. Saul akiri atokua ambeni zo ti fani ota ni. Ala nga asara ye tongana awayanga-Nzapa.

²²Tongaso, Saul wani alondo ti gue na Rama. Tongana lo si na tere ti kota du ti ngu so ayeke na Seku, lo hunda ndo, lo tene: “Samuel na David ayeke na ndo wa?” A kiri tënë na lo: “Ala yeke na Nayot, nduru na Rama.”

²³Lo mu lege ti gue kâ na Nayot so ayeke nduru na Rama. Yingo ti Nzapa aga nga na ndö ti lo si lo to nda ti tene peko ti tënë ti Nzapa ngbii lo si na Nayot so ayeke nduru na Rama.

²⁴Lo nga lo zi bongo na tere ti lo si lo to nda ti sara ye tongana awayanga-Nzapa na dawa ti Samuel. Na pekoni, lo ti na sese, tere ti lo senge, lo ngba na ndo so lango oko na bi oko kue. Ndani laa azo ayeke tene: “Saul nga aga wayanga-Nzapa awe?”