Read sango 1 Samuel 20 Bible Online

1 Samuel 20 - sango bible

1 Samuel 20

¹David alondo na kodro ti Nayot so ayeke nduru na Rama, lo kpe, lo hon. Lo gue, lo wara Jonatan si lo tene na lo: “Nyen laa mbi sara na babâ ti mo, nyen? Sioni ti nyen wala siokpari ti nyen laa mbi sara na lo si lo yeke gi lege ti fâ mbi so?”

²Jonatan akiri tënë na lo: “Oko pepe! Fade mo yeke kui pepe. Tongana babâ ti mbi aye ti sara mbeni ye, wala kota ye, wala kete ye, lo yeke tene tënë ni na mbi kozoni. Babâ ti mbi ahonde tënë so na mbi ngbanga ti nyen? Ye ni alingbi ti duti tongaso pepe.”

³David akiri adeba yanga ti lo, atene: “Babâ ti mo ahinga kue atene, mo ye mbi mingi. Lo tene na be ti lo, lo tene: ‘Ayeke nzoni Jonatan ahinga tënë so pepe ngbanga ti be ti lo aso.’ *KOTA GBIA ayeke na fini! Mo nga, mo yeke na fini! Angba kete ka mbi kui.”

⁴Jonatan atene na David: “Ye so be ti mo aye, fade mbi yeke sara ni na mo.”

⁵David akiri tënë na lo: “Kekereke ayeke matanga ti fini nze. Mbi lingbi fade ti duti na tere ti gbia ti te kobe. Zia na mbi lege titene mbi gue, mbi honde tere ti mbi na ya ti ngonda ngbii asi na lakui ti mbeni kekereke.

⁶Tongana babâ ti mo abaa so mbi yeke daa pepe, fade mo tene na lo: ‘David ahunda mbi mingi titene mbi zia lege na lo ti gue na Betlehem, gbata so a du lo daa. Lo ye titene lo na azo ti sewa ti lo kue asara matanga ti mungo *sandaga so ala yeke sara ka na ya ti ngu oko oko.’

⁷Tongana gbia atene: ‘So nzoni’, andaa mbeni ye ti sarango mbi zo ti kua ti mo ayeke daa pepe. Me tongana lo sara ngonzo, hinga, mo tene lo ye ti fâ mbi laa.

⁸Sara nzoni be na mbi, ngbanga ti so mbi na mo, e ga *ambuki na le ti KOTA GBIA awe. Tongana mbi sara mbeni sioni ye, ayeke nzoni mo wani, mo fâ mbi ahon titene mo zia mbi na maboko ti babâ ti mo.”

⁹Jonatan atene na lo: “Oko pepe. Tongana mbi ma a tene, babâ ti mbi aye ti fâ mo biani, fade mbi yeke tene tënë ni na mo. Mbi deba yanga ti mbi na mo.”

¹⁰David atene na Jonatan: “Tongana babâ ti mo akiri sioni tënë na mo, zo wa laa ayeke tene ande tënë ni na mbi, zo wa?”

¹¹Jonatan atene na David: “Ga e sigigi, e gue na ya ti ngonda.” Tongaso ala use kue asigigi, ague na ya ti ngonda.

¹²Jonatan atene na David: “Na iri ti KOTA GBIA, Nzapa ti Israel, kekereke wala mbeni kekereke asi na ngbonga tongaso, fade mbi yeke li na ya ti babâ ti mbi ti hinga tënë ti be ti lo. Tongana tënë ti be ti lo ayeke nzoni na mbage ti mo David, fade mbi yeke tokua mbeni zo na mo pepe.

¹³Me tongana babâ ti mbi aleke na be ti lo ti sara sioni na mo si mbi tene tënë ni na mo pepe, ayeke nzoni KOTA GBIA asara ye ti ngangu mingi na mbi! Fade mbi yeke zia lege na mo ti gue senge. Mbi sambela titene KOTA GBIA aduti na mo tongana ti so lo duti lani na babâ ti mbi so.

¹⁴Tongana mbi ngba na fini, ayeke nzoni mo sara nzoni be na mbi tongana ti so KOTA GBIA atene tënë ni; tongana mbi kui,

¹⁵ataa KOTA GBIA azi awato ti mo oko na oko na ndö ti sese so, fade mo yeke ke ti sara nzoni be na azo ti sewa ti mbi pepe.”

¹⁶Tongaso Jonatan asara mbuki na David nga na asewa ti lo. Tënë ti ya ti mbuki ni ayeke so: “Ayeke nzoni KOTA GBIA akiri peko ti sioni na awato ti David.”

¹⁷Jonatan akiri ahunda na David ti deba yanga ti lo ti fa so, David angba ti ye ni Jonatan, ngbanga ti so ni Jonatan, ni ye David tongana ti so ni ye tere ti ni wani.

¹⁸Jonatan atene na lo: “Kekereke ayeke matanga ti fini nze. Fade azo ayeke hinga atene mo ga na matanga ni pepe, ngbanga ti so ndo ti duti ti mo ayeke ngba senge.

¹⁹Mbeni kekereke, fade mo yeke gue ngbii mo si na ndo so lani mo honde tere ti mo daa kozo so. Fade mo duti nduru na tere ti têne so iri ni Ezel.

²⁰Ti mbi, fade mbi yeke bi ale ti kokora ota na mbage so têne ni ayeke daa, mo baa mo tene, mbi ye ti kpo mbeni ye.

²¹Na pekoni, mbi yeke tokua zo ti kua ti mbi titene lo gue, lo gi ale ti kokora ni. Tongana mbi tene na lo, mbi tene: ‘Ale ti kokora ni ayeke nduru ge, mu ni!’ So aye ti tene ye kue ayeke nzoni ndali ti mo, mo lingbi ti ga senge. KOTA GBIA ayeke na fini!

²²Me tongana mbi tene na zo ti kua ni, mbi tene: ‘Ale ti kokora ni angba yongoro kâ’, ayeke nzoni mo londo mo hon, ngbanga ti so KOTA GBIA aye titene mo hon.

²³Âdu ti tënë so mbi na mo, e leke na popo ti e si e ga ambuki so, fade KOTA GBIA ayeke sara titene e bata ni kpu na kpu.”

²⁴Tongaso, David ague, ahonde tere ti lo na ya ti ngonda. Lango ti matanga ti fini nze asi awe si gbia aduti ti te kobe.

²⁵Gbia aduti na ndö ti mbata ti lo so lo yeke duti ka daa, nduru na ti tere ti dere ti da. Abner, makonzi ti aturugu aduti na tere ti Saul si Jonatan aduti abaa le na Saul. Me ndo ti David angba senge.

²⁶Na lango ni so, Saul azi yanga oko pepe. Lo tene na be ti lo, lo tene: “E hinga pepe, mbeni ye asi na David wala mbeni ye asara si lo ga *sioni; gbaa lo ga *sioni awe.”

²⁷Na ndade ni nga, na use lango ti matanga ti fini nze ni, ndo ti David angba senge. Nilaa Saul ahunda molenge ti lo Jonatan, atene: “Biri na laso, molenge ti Yese aga na tengo kobe ni pepe ngbanga ti nyen?”

²⁸Jonatan akiri tënë na Saul, atene: “David ahunda mbi mingi ti zia lege na lo ti gue na Betlehem.

²⁹Lo tene na mbi: ‘Mbi gbu gere ti mo, zia lege na mbi, mbi gue, ngbanga ti so mbi na azo ti sewa ti mbi, e yeke mu sandaga na Nzapa si ita ti mbi ti koli airi mbi ti gue. Tongana mo baa mbi na nzoni le, mu na mbi lege ti gue ti baa a-ita ti mbi.’ Ndani laa David aga na matanga ti tengo kobe so gbia aleke so pepe.”

³⁰Saul asara ngonzo na tere ti Jonatan si lo tene na lo: “Mo, so mama ti mo ayeke wali-mbo so! Mbi hinga kue, mo yeke sara beoko na molenge ti Yese. Buba ti mo na ti mama ti mo kue.

³¹Tongana molenge ti Yese angba na fini, fade mo yeke duti nzoni oko pepe; mo yeke ga nga gbia pepe. Mo tokua azo fafadeso ti gbu lo, ti ga na lo na mbi, ngbanga ti so lo lingbi na kuâ.”

³²Jonatan akiri tënë na babâ ti lo Saul, atene: “A yeke fâ lo ngbanga ti nyen? Nyen laa lo sara?”

³³Saul ayo likongo ti lo ti kpo na Jonatan. Tongaso Jonatan ahinga atene, babâ ti lo aleke biani na be ti lo ti fâ David.

³⁴Jonatan asara ngonzo mingi, lo londo na tere ti kobe ni, lo ke ti te kobe na use lango ti matanga ti fini nze so. Be ti lo aso mingi ndali ti David, ngbanga ti so babâ ti lo azonga David mingi.

³⁵Na ndade ni, na ndaperere, Jonatan ague na ya ti ngonda na ndo so lo na David ama tere daa. Lo na mbeni molenge-koli laa ague.

³⁶Lo tene na molenge ni: “Mbi yeke bi ale ti kokora, fade mo mu loro, mo mu, mo ga na ni na mbi.” Molenge ni amu loro si Jonatan abi le ti kokora ni yongoro kâ na dawa ti lo.

³⁷So molenge-koli ni asi na ndo so Jonatan abi le ti kokora ni daa, Jonatan adekongo na lo, atene: “Le ti kokora ni angba yongoro kâ!”

³⁸Jonatan akiri adekongo na molenge ni, atene: “Mu loro, mo gue hio, mo luti na lege pepe!” Molenge ni amu le ti kokora ni aga na mbage ti Jonatan.

³⁹Molenge ni ama ya ti ye ni oko pepe. Gi Jonatan na David laa ama ya ni.

⁴⁰Jonatan amu aye ti bira ti lo na molenge ni si lo tene na lo: “Mo gue na ni na kodro.”

⁴¹Molenge ni akiri na kodro. David alondo na ndo so lo honde tere ti lo daa na mbage ti Mbongo, lo sigigi. Lo ti, lo kpo li ti lo na sese fani ota. Na pekoni, ala su ngbangba ti tere, ala toto mingi; David atoto ahon ndoni.

⁴²Jonatan atene na David: “Gue nzoni! Biani, e use kue, e deba yanga ti e na iri ti KOTA GBIA awe: ayeke nzoni KOTA GBIA aduti na popo ti mbi na mo, na popo ti *ahale ti mbi nga na ahale ti mo kpu na kpu.”