Read sango 1 Samuel 25 Bible Online

1 Samuel 25 - sango bible

1 Samuel 25

¹Na ndembe ni so, Samuel akui. Azo ti Israel kue abongbi si atoto kuâ ti lo. A lu lo na kodro ti lo na Rama. Na pekoni, David amu lege ague na benyama ti Paran.

²Mbeni koli ayeke na kodro ti Maon. Lo yeke bata anyama ti lo na Karmel; lo yeke na amosoro mingi. Lo yeke na ataba saki ota na angasa saki oko. Lo yeke lani na Karmel titene a fâ kua ti tere ti anyama ti lo.

³Iri ti koli ni ayeke Nabal; iri ti wali ti lo ayeke Abigail. Wali ni ahinga ndo nzoni si lo pendere mingi. Me koli ni, li ti lo ayeke daa pepe si lo yeke sioni zo. Lo yeke zo ti kete mara ti Kaleb.

⁴Na benyama kâ, David ama a tene, Nabal ayeke fâ kua ti tere ti ataba ti lo.

⁵David atokua amaseka-koli baleoko; lo tene na ala: “Ala gue na Karmel, na ndo ti Nabal si ala bara lo na mbi.

⁶Ala tene na lo: ‘Ayeke nzoni ngu so aduti nzoni ngu na mo! Mo duti nzoni, asewa ti mo nga na aye ti mo kue aduti nzoni!

⁷Mbi ma a tene, a yeke fâ kua ti tere ti anyama na ndo ti mo. So lani azo ti batango nyama ti mo ayeke na tere ti e na Karmel so, e sara sioni na ala oko pepe, mbeni ye ti ala oko agirisa pepe.

⁸Hunda azo ti kua ti mo, fade ala tene peko ni na mo. Ayeke nzoni mo baa azo ti kua ti mbi so na nzoni le, ngbanga ti so ala ga laso ge na lango ti matanga. Mbi gbu gere ti mo, ye so mo yeke na ni, mu ni na azo ti kua ti mo, mu nga ni na mbi David, zo ti kua ti mo.’ ”

⁹So azo ti kua ti David asi na tere ti Nabal awe, ala tene na lo peko ti atënë ni kue na iri ti David si ala ngba ti ku.

¹⁰Nabal akiri tënë na azo ti kua ti David, atene: “David ni ayeke zo wa? Molenge ti Yese ni ayeke zo wa? Fadeso angbaa mingi ayeke kpe na ndo ti awa ti ala.

¹¹Fade mbi mu mapa ti mbi, ngu ti mbi nga na nyama ti mbi so mbi fâ ndali ti azo ti kua ti mbi ti mu na azo so mbi hinga ndo so ala londo daa si ala ga pepe so?”

¹²Azo ti kua ti David amu lege akiri; ala gue, atene peko ti tënë so kue na David.

¹³David atene na azo ti lo: “Ayeke nzoni zo oko oko amu yongoro zeme ti lo, lo kanga ni na ngbonda ti lo!” Tongaso zo oko oko amu yongoro zeme ti lo; David nga amu yongoro zeme ti lo. Azo nduru na ngbangbo osio laa amu peko ti David si ala hon. Azo ngbangbo use si angba na tere ti akungba.

¹⁴Mbeni zo ti kua ti Nabal aga atene tënë ni na Abigail, wali ti Nabal, atene: “David ayeke kâ na benyama, lo tokua azo ti bara wa ti e si wa ti e awara ala nzoni pepe.

¹⁵Azo so asara lani nzoni na e mingi. Na ngoi so kue e yeke na tere ti ala na ya ti ngonda, ala sara sioni na e oko pepe, mbeni ye ti e oko agirisa pepe.

¹⁶Na ngoi so e yeke na tere ti ala na ya ti ngonda ti bata anyama so, bi na lâ, na ngoi kue, ala yeke na tere ti e tongana gbagba ti bata e.

¹⁷Fadeso, gbu li ti mo nzoni na ndö ti ye so mo lingbi ti sara, ngbanga ti sioni ye ayeke ti na ndö ti wa ti e nga na asewa ti lo kue. Wa ti e ayeke mbeni buba zo, zo alingbi ti tene tënë na lo pepe.”

¹⁸Abigail alondo hio amu mapa ngbangbo use, bozo use so a sara na poro ti nyama si vin ayeke na ya ni, ataba oku so a leke ala kue awe, sakpa oku ti *ble so a yoro ni yorongo, gba ti aholengo le ti vinye ngbangbo oko nga na gba ti aholengo le ti fige ngbangbo use so akpa gatoo. Lo zia aye so kue na ndö ti alele.

¹⁹Na pekoni, lo tene na azo ti kua ti lo: “Ala hon na li ni, mbi yeke mu peko ti ala.” Me Abigail atene tënë ni na koli ti lo Nabal pepe.

²⁰So Abigail ako na ndö ti lele ti lo awe, lo yeke hon na tere ti hoto; andaa David na azo ti lo ayeke ga na mbage ti lo si Abigail atengbi na ala.

²¹David atene na be ti lo, atene: “Aye ti koli so kue mbi bata na benyama so, mbi bata ni senge senge-aa! Na popo ti aye ti lo kue, mbeni ye oko agirisa pepe. Mbi sara nzoni na lo si lo kiri lo sara sioni na mbi.

²²Tongaso kekereke na ndaperere, tongana mbi fâ akoli ti da ti Nabal kue pepe, ayeke nzoni Nzapa asara ye ti ngangu mingi na mbi!”

²³So Abigail abaa David awe, lo londo na ndö ti lele ni, lo zu hio na sese, lo kuku, lo kpo li ti lo na sese na dawa ti David.

²⁴Na pekoni, lo ti, lo gbu gere ti David si lo tene: “Babâ, mbi laa mbi sara sioni. Mo zia lege na mbi, zo ti kua ti mo ti tene tënë na mê ti mo. Ma tënë ti mbi si.

²⁵Ayeke nzoni babâ ti mbi azia be ti lo pepe na ndö ti Nabal, buba zo so. Biani, a mu na lo iri ni so na legeni. Nda ti iri ni aye ti tene, ‘buba zo’. Nilaa lo yeke sara kua ti buba ni ti hon na ni so. Azo ti kua so babâ ti mbi atokua ala lani so, mbi baa ala pepe.

²⁶*KOTA GBIA ayeke na fini! Mo nga, mo yeke na fini! KOTA GBIA laa akanga lege na mo, babâ ti mbi titene mo ga, mo tuku mene ti azo pepe si mo fâ nga ngbanga ti mo, mo wani pepe. Ayeke nzoni ye so asi na Nabal asi na awato ti mo, ala so ayeke gi lege ti fâ mo so.

²⁷Akadoo so mbi ga na ni na mo so, ayeke nzoni babâ ti mbi amu ni, akangbi na amaseka-koli so ayeke tambula na peko ti lo.

²⁸Mbi gbu gere ti mo, zi na li ti mbi zo ti kua ti mo sioni so mbi sara. Biani, fade KOTA GBIA ayeke mu kodro ni na mo, kodro ni ayeke ngba lakue lakue, ngbanga ti so mo yeke tiri bira ndali ti KOTA GBIA. Na ya ti lango so kue mo yeke ngba na fini, fade a yeke wara sioni oko na li ti mo pepe.

²⁹Mbeni zo alondo ti tumba peko ti mo, babâ ti mbi ti fâ mo. Me fade KOTA GBIA, Nzapa ti mo ayeke honde fini ti mo na ya ti bozo ti bata ni na tere ti lo. Lo yeke bi awato ti mo tongana ti so a yeke zia têne na ya ti *mvingi si a yeke bi ni so.

³⁰Tongana KOTA GBIA asara anzoni ye so kue lo tene tënë ni na mo awe, fade lo yeke zia mo makonzi na ndö ti Israel.

³¹Alingbi mo fâ ngbanga ti mo wani pepe na tukungo mene ti azo senge senge si na pekoni, mo wara gingo be pepe. Babâ ti mbi, tongana KOTA GBIA asara ande nzoni be na mo, dabe ti mo na mbi!”

³²David atene na Abigail: “Mbi mu singila na KOTA GBIA, Nzapa ti Israel so atokua mo laso ti wara mbi so.

³³Mbi mu singila ndali ti nzoni sarango ye ti mo; mbi mu nga singila na mo, mo so mo kanga lege na mbi laso ti tuku mene ti azo, ti fâ ngbanga ti mbi wani pepe.

³⁴Mbi tene na mo taa-tënë: KOTA GBIA, Nzapa ti Israel ayeke na fini! Lo laa lo kanga lege na mbi ti sara sioni na mo. Tongana mo ga fade mo wara mbi hio pepe, ka kekereke na ndaperere mbeni koli ti da ti Nabal oko angba na fini pepe.”

³⁵Aye so Abigail aga na ni, David amu na maboko ti lo. Na pekoni, David atene na lo: “Kiri nzoni na da ti mo. Mbi ma demango tere ti mo awe, mbi sara nzoni be na mo.”

³⁶Abigail akiri na tere ti Nabal. Andaa na da kâ, Nabal asara matanga tongana matanga ti gbia. Tere ti Nabal anzere mingi si lo nyon samba ahon ndö ti lo. Abigail atene tënë oko na lo pepe ngbii asi na kota ndaperere.

³⁷Na ndaperere ni, tongana samba ahunzi na le ti Nabal awe, wali ti lo atene na lo peko ti ye so asi so. Be ti Nabal afun kue si tere ti lo akiri awoko kue.

³⁸Lango baleoko na pekoni, KOTA GBIA apika Nabal si lo kui.

³⁹David ama a tene, Nabal akui si lo tene: “Mbi mu singila mingi na *KOTA GBIA so agbu koko ti mbi ndali ti zonga so Nabal azonga na mbi so. Mbi mu singila na KOTA GBIA so akanga lege na mbi, zo ti kua ti lo si mbi sara sioni oko pepe so. KOTA GBIA asara si sioni ti Nabal akiri na li ti lo wani.” Na pekoni, David atokua azo na Abigail ti tene na lo, tongana lo yeda, ni mu lo ti ga wali ti ni.

⁴⁰Azo ni ague, asi na ndo ti Abigail na kodro ti Karmel si ala tene na lo: “David atokua e ti tene na mo, lo ye ti mu mo ti ga wali ti lo.”

⁴¹Abigail akuku akpo li ti lo na sese si lo tene: “Mbi, zo ti kua ti mo, mbi yeke ngbaa-wali; mbi ye ti sukula gere ti azo ti kua ti babâ ti mbi.”

⁴²Abigail alondo hio, lo ko na ndö ti lele ti lo; azo ti kua ti lo ti wali oku ayeke na tere ti lo si lo mu peko ti azo so David atokua ala so. Tongaso Abigail aga wali ti David.

⁴³David amu wali kozoni awe; iri ti wali ni ayeke Ahinoam, zo ti gbata ti Yizreel. Lo na Abigail, ala use kue ayeke awali ti David.

⁴⁴Mikal, molenge ti Saul ti wali ayeke lani kozo wali ti David. Me babâ ti Mikal amu lo ti ga wali na Palti, molenge ti Laish, zo ti gbata ti Galim.