Read sango 1 Samuel 27 Bible Online

1 Samuel 27 - sango bible

1 Samuel 27

¹David atene na be ti lo, atene: “Mbeni lâ, Saul ayeke fâ mbi ande. Mbeni ye nde titene mbi sara ayeke daa pepe. Ayeke nzoni mbi kpe biani biani mbi honde tere ti mbi na ndo ti azo ti Filistii. Tongaso si Saul azia ti tumba peko ti mbi na sese ti Israel si mbi wara lege ti kpe na maboko ti lo.”

²David alondo, lo na azo ngbangbo omene na tere ti lo, ala gue, asi na ndo ti Akish, molenge ti Maok; Akish ayeke gbia ti gbata ti Gat.

³David na azo ti lo angba na Gat na tere ti Akish, zo oko oko na asewa ti lo na tere ti lo. David na awali ti lo use na tere ti lo: Ahinoam, zo ti Israel na Abigail, so lani koli ti lo Nabal akui na Karmel so.

⁴So Saul ama a tene, David akpe ahonde tere ti lo na Gat, Saul azia ti tumba peko ti lo.

⁵David atene na Akish: “Tongana mo ye mbi, ayeke nzoni mo mu na mbi mbeni ndo na kete kodro titene mbi duti daa. Mbi zo ti kua ti mo, mbi duti na tere ti mo na ya ti gbata ti gbia ngbanga ti nyen?”

⁶Gi na lango ni so, Akish amu na lo gbata ti Siklag. Nilaa Siklag aga kodro ti agbia ti Juda ngbii asi laso.

⁷David asara ngu oko na nze osio na sese ti azo ti Filistii.

⁸David na azo ti lo alondo na Siklag si ala gue ti tiri bira na azo ti Geshur, azo ti Girzi nga na azo ti Amalek. Azo ni so alango na kodro ni ngbene ye aninga, ti londo na mbage ti Shur ngbii asi na yanga ti kodro ti Ezipte.

⁹David anika azo ti gbata ni; lo zia mbeni koli wala mbeni wali angba na fini pepe. Lo mu ataba na angasa, abagara, alele, *azambala na abongo, lo gue na ni. Na kiringo ti lo, lo si na ndo ti Akish.

¹⁰Tongana Akish ahunda lo, atene: “Laso ala tiri bira na ndo wa?” David akiri tënë: “Laso e tiri bira na mbage ti Mbongo ti Juda wala na mbage ti Mbongo ti azo ti mara ti Yerameli nga na mbage ti Mbongo ti azo ti mara ti Keni.”

¹¹David afâ azo kue; lo ye titene a zia mbeni koli wala mbeni wali angba na fini pepe si a ga na lo na Gat pepe, ngbanga ti so lo tene na be ti lo, lo tene: “Tongana e ga na mbeni zo, fade lo yeke sigigi na nda ti e. Fade zo ni atene: ‘Baa, ye so David asara laa.’ ” Na ya ti ngoi so kue lo lango na sese ti azo ti Filistii, aye so lo sara laa.

¹²Akish azia be ti lo kue na ndö ti David si lo tene na be ti lo, lo tene: “Lo kara azo ti Israel, azo ti mara ti lo awe. Fade lo yeke ngba ti sara kua na mbi kpu na kpu.”