Read sango 1 Samuel 29 Bible Online

1 Samuel 29 - sango bible

1 Samuel 29

¹Azo ti Filistii abongbi aturugu ti ala kue na Afek. Azo ti Israel asara bâbâ ti ala nduru na li ti ngu so ayeke na Yizreel.

²Agbia ti azo ti Filistii ayeke tambula na dawa ti aturugu ngbangbo oko wala saki oko, na molongo na molongo. David na azo ti lo ayeke tambula ti ala na peko, ala na gbia Akish.

³Amakonzi ti aturugu ti Filistii ahunda ndo, atene: “Ahebro so ayeke sara nyen ge?” Akish akiri tënë na ala: “So David laa, zo ti kua ti Saul, gbia ti Israel! A sara ngu oko wala ngu use so lo yeke na ndo ti mbi. Ngbene ye so lo zia wa ti lo si lo ga na ndo ti mbi ngbii asi laso, mbi baa sioni ye oko pepe so lo sara.”

⁴Amakonzi ti aturugu ti Filistii asara ngonzo na tere ti Akish si ala tene na lo: “Mo tumba koli so, lo kiri na ndo so mo fa na lo ti duti daa. Ayeke nzoni lo ga na peko ti e na bira so pepe, ngbanga ti tongana bira ni alondo awe, lo kiri lo ga wato ti e ti tiri na e. Lo yeke ga ande nzoni na le ti gbia ti lo tongana nyen? Gi ti fâ azo ti e!

⁵So David laa pepe? Lo laa lani awali adodo si ahe bia na iri ti lo, atene: ‘Saul afâ azo saki saki, David afâ ti lo azo saki baleoko, saki baleoko.’ ”

⁶Akish airi David si atene na lo: “*KOTA GBIA ayeke na fini! Mbi hinga, mbi tene, mo yeke zo ti mbirimbiri. Mbi ye titene mbi na mo, e gue na bira so, ngbanga ti so ti londo na lango so lani mo ga na ndo ti mbi ngbii asi laso, mbi baa mbeni sioni ye oko pepe so mo sara. Me be ti ambeni makonzi ti Filistii aye mo pepe.

⁷Tongaso, kiri, mo gue nzoni na kodro ti mo, tongaso si mo sara mbeni ye pepe so be ti agbia ti azo ti Filistii ake ni.”

⁸David atene na Akish: “Nyen laa mbi sara? Ti londo na lango so mbi ga na ndo ti mo ngbii asi laso, sioni ti nyen laa mbi sara si mo baa? Akiri asara tongana nyen si mbi gue pepe ti tiri bira na awato ti mo, gbia ti mbi so?”

⁹Akish akiri tënë na David: “Mbi hinga; biani be ti mbi aye mo tongana mbeni ange ti Nzapa. Me amakonzi ti aturugu ti Filistii atene: ‘Lo lingbi ti gue na peko ti e na bira so pepe.’

¹⁰Tongaso, kekereke na kota ndaperere, fade mo na azo ti kua ti gbia ti mo so amu peko ti mo si aga so, ala londo. Tongana ndo ato nda ti vuru awe, ala mu lege ti kiri na kodro.”

¹¹David na azo ti lo alondo na kota ndaperere ti kiri na kodro ti azo ti Filistii. Me ti azo ti Filistii, ala gue na Yizreel.