Read sango 1 Samuel 3 Bible Online

1 Samuel 3 - sango bible

1 Samuel 3

¹Molenge Samuel ayeke sara kua na *KOTA GBIA na gbe ti Heli. Na ngoi ni so, KOTA GBIA ayeke tene ando tënë na azo mingi mingi pepe; wala ayeke ngangu titene lo fa mbeni ye na zo na ya ti mbeni ye tongana bango-li.

²Na ngoi ni so, le ti Heli ato nda ti vuko, lo yeke baa ndo nzoni pepe. Na mbeni bi, lo lango na ndo so lo yeke lango ka daa so.

³Lamba ti ya ti da ti Nzapa ade ti mingo pepe. Samuel ayeke lango na ya ti da ti KOTA GBIA, nduru na ndo so sanduku ti *mbuki ti Nzapa ayeke daa.

⁴KOTA GBIA airi Samuel. Samuel ayeda, atene: “Mbi laa.”

⁵Samuel amu loro ague na tere ti Heli si atene na lo: “Mbi laa; mo iri mbi?” Heli akiri tënë: “Mbi iri mo pepe; kiri, mo gue, mo lango.” Samuel ague, alango.

⁶KOTA GBIA akiri airi Samuel ti fani use ni, atene: “Samuel.” Samuel alondo ague na tere ti Heli si atene na lo: “Mbi laa; mo iri mbi?” Heli akiri tënë, atene: “Molenge ti mbi, mbi iri mo pepe; kiri, mo gue, mo lango.”

⁷Samuel ade ti hinga KOTA GBIA pepe, tënë ti yanga ti KOTA GBIA ade ti si na lo laoko pepe.

⁸KOTA GBIA akiri airi Samuel ti fani ota ni. Samuel alondo ague, awara Heli si atene na lo: “Mbi laa; mo iri mbi?” Ti so ni, Heli ahinga atene, KOTA GBIA laa airi molenge so.

⁹Heli atene na Samuel: “Kiri, mo gue, mo lango. Tongana a iri mo, fade mo tene: ‘KOTA GBIA, tene tënë, mbi zo ti kua ti mo mbi ma.’ ” Tongaso Samuel akiri ague, alango na ndo so lo yeke lango ka daa.

¹⁰KOTA GBIA aga aluti; lo iri ndo tongana ti kozo, lo tene: “Samuel, Samuel!” Samuel ayeda, atene: “Tene tënë, mbi zo ti kua ti mo mbi ma.”

¹¹KOTA GBIA atene na Samuel: “Baa, mbi yeke bi mbeni kota kpale na sese ti Israel. Azo so kue ayeke ma tënë ni, fade ayeke toto na mê ti ala tongana sungbango ti bekpa.

¹²Na lango ni so, fade mbi yeke sara aye so kue alingbi na tënë so lani mbi tene na tere ti Heli na azo ti sewa ti lo; mbi yeke sara aye ni na tongo nda ni ngbii asi na nda ni.

¹³Mbi tene na Heli, mbi tene, fade mbi yeke fâ ngbanga na li ti azo ti sewa ti lo lakue ndali ti sioni so amolenge ti lo asara: lo hinga kue atene, ala yeke zonga Nzapa, me lo kanga lege na ala pepe.

¹⁴Ndani laa, mbi deba yanga ti mbi na azo ti sewa ti Heli, mbi tene: Ataa ala mu *sandaga wala mbeni ye na mbi, so laa ayeke zi ande siokpari na li ti ala laoko pepe.”

¹⁵Samuel angba alango ngbii ndo ahan. Na pekoni, lo zi ayanga ti kota da ti KOTA GBIA. Mbeto asara lo ti tene na Heli peko ti ye so lo baa na ya ti mbeni ye tongana bango-li so.

¹⁶Heli airi Samuel si atene na lo: “Samuel, molenge ti mbi.” Samuel ayeda atene: “Mbi laa.”

¹⁷Heli ahunda lo, atene: “Tënë ti nyen laa KOTA GBIA atene na mo, nyen? Mo honde mbeni tënë oko na mbi pepe. Tongana mo honde na mbi mbeni tënë oko so lo tene na mo, ayeke nzoni Nzapa asara ye ti ngangu mingi na mo!”

¹⁸Tongaso Samuel afa na Heli peko ti atënë so kue. Lo honde mbeni tënë oko pepe. Heli atene: “KOTA GBIA laa; ayeke nzoni lo sara ye so be ti lo aye!”

¹⁹Samuel angba ti kono. KOTA GBIA ayeke na lo. Tongaso, atënë ti KOTA GBIA so kue Samuel atene, peko ni angba senge pepe.

²⁰Nilaa, ti londo na sese ti Dan ngbii asi na kodro ti Bersheba, azo ti Israel kue ahinga atene, Samuel aga fadeso wayanga-Nzapa awe.

²¹KOTA GBIA angba ti si na Samuel na kodro ti Silo. Kâ laa KOTA GBIA ayeke tene tënë ti lo na Samuel.