Read sango 1 Samuel 4 Bible Online

1 Samuel 4 - sango bible

1 Samuel 4

¹Samuel afa peko ti atënë so na azo ti Israel kue. Mbeni lâ, azo ti Israel ague ti tiri bira na azo ti Filistii. Azo ti Israel asara bâbâ ti ala nduru na Eben-Ezer; azo ti Filistii asara ti ala bâbâ ni na Afek.

²Azo ti Filistii aleke tere ti ala na molongo ti tiri bira na azo ti Israel; bira ni akporo ngangu. Azo ti Filistii akinda azo ti Israel; ala fâ ala nduru na saki osio na ndo so ala sara bira daa so.

³Aturugu ti Israel akiri na ya ti bâbâ ti ala si *akangba atene: “Ngbanga ti nyen laa *KOTA GBIA azia lege na azo ti Filistii ti fâ e laso tongaso? E gue na Silo, e mu sanduku ti *mbuki ti KOTA GBIA, e ga na ni. Tongaso si KOTA GBIA aduti na popo ti e si lo zi e na maboko ti awato ti e.”

⁴Aturugu ni atokua ambeni zo na Silo. Ala gue, aga na sanduku ti mbuki ti KOTA GBIA, lo so lo yeke na ndö ti dunia kue si lo yeke duti na ndö ti *asheruben. Andaa amolenge ti Heli use, Hofni na Pinas ayeke na tere ti sanduku ti mbuki ni.

⁵Gi so sanduku ti mbuki ti KOTA GBIA asi na ya ti bâbâ ni awe, azo ti Israel kue adekongo ngangu si sese ayingi.

⁶Azo ti Filistii ama dekongo ni si ala tene: “Nda ti dekongo na ya ti bâbâ ti azo ti Israel so aye ti tene nyen?” Na pekoni, ala hinga atene, sanduku ti mbuki ti KOTA GBIA asi na ya ti bâbâ ti azo ti Israel awe.

⁷Mbeto agbu azo ti Filistii si ala tene: “Nzapa asi na ya ti bâbâ ti azo ti Israel awe. E kui awe! Ye ni ayeke tongaso laoko pepe.

⁸Azo, e kui awe! Zo wa laa ayeke zi e na maboko ti ngangu Nzapa so? Nzapa so laa abi ando akpale nde nde na ndö ti azo ti Ezipte na ya ti benyama.

⁹Ala azo ti Filistii, ala gbu ngangu! Ala sara ye ti koli si ahebro amu ala na ngbaa pepe tongana ti so lani e mu ala na ngbaa so. Ala sara ye ti koli, ala tiri bira ngangu!”

¹⁰Azo ti Filistii alondo na bira; ala kinda azo ti Israel. Aturugu ti Israel kue akpe, zo oko oko agi lege ti da ti lo. Azo ti Israel ati sioni sioni na gbe ti azo ti Filistii; azo ti Filistii afâ aturugu ti Israel saki baleota.

¹¹Ala mu nga sanduku ti mbuki ti Nzapa. Amolenge ti Heli use, Hofni na Pinas akui.

¹²Gi na lango ni so, mbeni koli ti mara ti Benjamin alondo na yanga ti bira kâ, akpe asi na Silo, lo suru bongo na tere ti lo kue; lo tuku fuku ti sese na ya ti li ti lo.

¹³Na ndembe so lo si, andaa Heli ayeke duti na ndö ti mbata ti lo na yanga ti lege; lo yeke ku, le ti lo angba gi na lege, be ti lo ayeke do ndali ti sanduku ti *mbuki ti Nzapa. Koli so aga si atene peko ti aye so asi na ya ti bira na ya ti gbata ni. So azo ti gbata ni ama tënë ni, ala kue ato nda ti dekongo.

¹⁴Heli ama dekongo ni si lo hunda ndo, lo tene: “Nda ti dekongo so ayeke nyen?” Koli so aga hio si atene peko ti tënë ni na Heli.

¹⁵Ngu ti Heli ayeke balegumbaya na miombe. Le ti lo avuko awe si lo yeke baa ndo mbeni pepe.

¹⁶Koli ni atene na Heli: “Mbi londo na yanga ti bira si mbi ga so. Gi laso laa mbi kpe na yanga ti bira ni si mbi ga so.” Heli ahunda lo, atene: “Molenge ti mbi, nyen laa asi kâ, nyen?”

¹⁷Zo ti tokua ni akiri tënë: “Azo ti Israel akpe na dawa ti azo ti Filistii; azo mingi akui. Amolenge ti mo use Hofni na Pinas akui. A mu nga sanduku ti mbuki ti Nzapa ahon na ni.”

¹⁸Gi so lo zi yanga na ndö ti tënë ti sanduku ti mbuki ti Nzapa awe, Heli alondo na ndö ti mbata ti lo, lo ti na mbage ti peko, na tere ti yanga ti da ti Nzapa. Bio ti go ti lo akungbi si lo kui. Andaa Heli aga mbakoro, lo ne mingi. Lo fâ ngbanga ti azo ti Israel na ya ti ngu baleosio.

¹⁹Wali ti molenge ti lo Pinas ayeke na ngo; lo ga nduru ti du. So lo ma a tene, a mu sanduku ti mbuki ti Nzapa ahon na ni, babâ ti koli ti lo akui si koli ti lo nga akui, ya ti lo aso ti dungo ni, lo duti na sese si lo du.

²⁰So lo ga nduru ti kui, awali so aduti na tere ti lo atene na lo: “Sara mbeto pepe, mo du molenge-koli awe.” Me lo kiri na tënë oko pepe, lo ma nga tënë so a tene na lo so pepe.

²¹Lo di iri ti molenge ni Ikabod si lo tene: “Gonda ti Nzapa ayeke mbeni pepe na kodro ti Israel.” Lo di iri ti molenge ni Ikabod, ngbanga ti so a mu sanduku ti mbuki ti Nzapa ahon na ni, a fâ kogara ti lo nga na koli ti lo.

²²Wali ni atene: gonda ahunzi na kodro ti Israel awe, ngbanga ti so a mu sanduku ti mbuki ti Nzapa ahon na ni.