Read sango 1 Samuel 6 Bible Online

1 Samuel 6 - sango bible

1 Samuel 6

¹Sanduku ti *mbuki ti *KOTA GBIA asara nze mbarambara na sese ti azo ti Filistii.

²Azo ti Filistii airi awayango-sandaga na azo ti bango nda ti aye si atene na ala: “Nyen laa e lingbi ti sara na sanduku ti mbuki ti KOTA GBIA so? Ala fa na e lege so e lingbi ti kiri na ni na ndo so lani ayeke daa.”

³Ala kiri tënë, atene: “Tongana ala ye ti kiri na sanduku ti mbuki ti Nzapa ti Israel, ayeke nzoni ala kiri na ni senge pepe. Me ala mu mbeni ye na Nzapa ti Israel ndali ti sioni ti ala, azo ti Filistii. Tongaso fade kobela ti ala akai si ala hinga ndani so maboko ti Nzapa ti Israel angba ti sara ngangu na ala.”

⁴Azo ti Filistii ahunda ala, atene: “Nyen laa e lingbi ti mu na lo ndali ti sioni ti e so?” Awayango-sandaga na azo ti bango nda ti aye akiri tënë, atene: “Ala mu lôro, ala sara na ambeni ye so akpa aka ti sanzo oku, nga na adeku oku. Ala sara ni alingbi na wungo ti agbia ti azo ti Filistii, ngbanga ti so gi oko kpale so laa awara ala na amakonzi ti ala kue.

⁵Fade ala sara alimo ti aka ti sanzo nga na limo ti adeku so ayeke buba kodro ti ala. Na pekoni, ala gonda Nzapa ti Israel. E hinga pepe, fade lo yeke zia ti sara ngangu na ala, na anzapa ti ala nga na kodro ti ala.

⁶Ngbanga ti nyen laa ala ye ti kpengba be ti ala tongana ti Faraon na azo ti Ezipte ando so? Ala dabe ti ala na ye so Nzapa asara na ala ngbii si ala zia lege na azo ti Israel ti gue so!

⁷Fadeso ala leke mbeni fini pusu ti mbarata. Ala mu amama ti bagara use, ala so angba ti mu me na amolenge ti ala, ala so ade ti yo kungba pepe. Ala kanga abagara ni na tere ti pusu ni; ala mu amolenge ti bagara ni akiri na ala na ya ti gbagba.

⁸Ala mu sanduku ti mbuki ti KOTA GBIA, ala zia na ndö ti pusu ni. Ala mu aye ti lôro so ala leke ti mu na KOTA GBIA ndali ti sioni ti ala so, ala zia na ya ti mbeni kete sanduku na tere ti sanduku ti mbuki ni. Na pekoni, ala zia pusu ni ague.

⁹Fade ala yeke baa: tongana sanduku ti mbuki ni amu lege ti gue na sese ti Israel na mbage ti gbata ti Bet-Shemesh, andaa KOTA GBIA wani laa asara titene asioni ye so kue asi na e. Tongana sanduku ni amu mbeni lege nde, fade e hinga, e tene, Nzapa laa asara asioni ye so na e pepe. Me ye ti gigi laa asi na e so.”

¹⁰Azo ti Filistii asara gi ye so a fa na ala so. Ala mu amama ti bagara use so ayeke mu me na amolenge ti ala, ala kanga ala na tere ti pusu si ala kanga amolenge ti bagara ni na ya ti gbagba.

¹¹Ala zia sanduku ti mbuki ti KOTA GBIA na ndö ti pusu ni, ala zia nga na ndö ni kete sanduku so a zia na ya ni aye so ala leke na lôro si akpa adeku nga na limo ti aka ti sanzo so.

¹²Amama ti bagara ni amu gi taa lege ti guengo na Bet-Shemesh; ala tambula mbage na mbage pepe. Na guengo ni ala yeke toto. Agbia ti azo ti Filistii amu peko ti ala ngbii asi na katikati ti Bet-Shemesh.

¹³Andaa azo ti Bet-Shemesh ayeke fâ ale ti *ble na yaka so ayeke na popo-hoto. Tongana ala yo le ti ala na nduzu, ala baa sanduku ti mbuki ni si be ti ala asi singo na ngia.

¹⁴Sanduku ni ague, aluti na yaka ti Josué, zo ti Bet-Shemesh. Mbeni kota têne ayeke na ndo ni so. Azo asuru ya ti keke so a leke na pusu ni si ala mu abagara ni na *sandaga so a yeke gbi ni kue na wâ na KOTA GBIA.

¹⁵Azo ti mara ti Lévi amu sanduku ti mbuki ti KOTA GBIA nga na kete sanduku so aye ti lôro ayeke na ya ni, ala zia na ndö ti kota têne ni. Na pekoni, gi na oko lango ni, azo ti Bet-Shemesh amu sandaga so a yeke gbi ni kue na wâ na KOTA GBIA nga na sandaga ti beoko.

¹⁶Gi nga na oko lango ni, agbia oku ti azo ti Filistii abaa ye ni so, ala kiri na Ekron.

¹⁷Baa, aye so azo ti Filistii amu lôro asara na ni si akpa sukungo ye si ala mu na KOTA GBIA ndali ti siokpari ti ala laa: Ala mu ye ni oko ndali ti gbata ti Asdod, oko ndali ti gbata ti Gaza, oko ndali ti gbata ti Askalon, oko ndali ti gbata ti Gat, oko ndali ti gbata ti Ekron.

¹⁸Ti aye so ala sara na lôro si akpa adeku, ala mu ni alingbi na wungo ti agbata ti agbia oku ti azo ti Filistii, agbata so a sara ngangu gbagba na tere ni nga na akete kodro so gbagba ayeke na tere ni pepe. Sese ti azo ti Filistii ague ngbii asi na kota têne so a zia sanduku ti mbuki ti KOTA GBIA na ndö ni, na yaka ti Josué, zo ti Bet-Shemesh. Têne ni angba ngbii asi laso.

¹⁹KOTA GBIA afâ azo ti Bet-Shemesh balembarambara na popo ti azo saki baleoku, ngbanga ti so ala baa sanduku ti mbuki ti KOTA GBIA. Azo ti gbata ni ayeke na ya ti kota mawa, ngbanga ti so KOTA GBIA asara ngangu na ala mingi.

²⁰Azo ti Bet-Shemesh atene: “Zo wa laa alingbi ti luti na le ti KOTA GBIA, Nzapa so ayeke nde si ayeke nzoni kue so? Fade e yeke tokua sanduku ti mbuki ni na ndo ti zo wa titene ahon yongoro na tere ti e?”

²¹Ala tokua azo na azo ti gbata ti Kiriat-Yearim ti tene na ala: “Azo ti Filistii akiri na sanduku ti mbuki ti KOTA GBIA awe. Ayeke nzoni ala ga amu ni, ague na ni na ndo ti ala.”