Read sango 1 Samuel 8 Bible Online

1 Samuel 8 - sango bible

1 Samuel 8

¹So Samuel aga mbakoro awe, lo mu amolenge ti lo ti ga awafango-ngbanga na li ti azo ti Israel.

²Iri ti kozo molenge ni Joël, iri ti use ni Abia. Ala yeke sara kua ti fango ngbanga na kodro ti Bersheba.

³Me amolenge ni amu peko ti sarango ye ti lo pepe. Ala ye nginza mingi; azo ayeke pete goro na ala si ala yeke fâ ngbanga ti azo na legeni pepe.

⁴Ndani laa *akangba ti Israel kue abongbi tere si ala gue, abaa Samuel na kodro ti Rama.

⁵Ala tene na lo: “Baa, mo ga mbakoro awe; me amolenge ti mo amu peko ti sarango ye ti mo pepe. Ayeke nzoni mo mu na e mbeni gbia titene lo fâ ngbanga ti e tongana ti amara kue.”

⁶Tënë so ala tene so anzere na be ti Samuel oko pepe. Tongaso Samuel asambela *KOTA GBIA.

⁷KOTA GBIA atene na Samuel: “Atënë so kue azo ni ayeke tene, mo ma ni. Mo laa ala ke mo pepe, me mbi. Ala ye titene mbi kiri mbi le-gbia na ndö ti ala pepe.

⁸Ti londo na lango so mbi sara si ala sigigi na sese ti Ezipte ngbii asi laso, ye so ala yeke sara na mbi laa. Ala zia mbi ti gue ti sara na ambeni nzapa nde. Gi oko ye so laa ala yeke sara na mo.

⁹Tongaso, ma tënë ti ala. Me mo gboto mê ti ala nzoni; mo fa na ala lege so gbia ni ayeke le-gbia ande na ndö ti ala.”

¹⁰Samuel akiri peko ti atënë kue ti *KOTA GBIA na azo ti Israel so ahunda ti wara mbeni gbia so.

¹¹Lo tene: “Baa, lege so gbia so ayeke le-gbia ande na ndö ti ala ayeke so: fade lo yeke mu na popo ti amolenge ti ala ti koli ambeni titene ala kpe na apusu ti mbarata ti lo, ambeni ayeke kpe na ambarata ti lo, wala ala yeke kpe loro na dawa ti pusu ti mbarata ti lo.

¹²Fade lo yeke mu ambeni ti duti makonzi na ndö ti aturugu saki oko wala makonzi na ndö ti aturugu baleoku. Lo yeke mu ambeni titene ala fâ yaka ti lo si ala fâ nga ale ti kobe ti yaka ti lo. Fade lo yeke mu ambeni titene ala leke aye ti bira ti lo nga na agbakuru ti kangango na tere ti apusu ti mbarata ti lo.

¹³Lo yeke mu amolenge ti ala ti wali titene ala sara kua ti yombo, ala to kobe si ala zö mapa.

¹⁴Lo yeke mu anzoni yaka ti ala, anzoni yaka ti *vinye ti ala nga na anzoni yaka ti olive ti ala ti mu na azo ti gbe ti lo.

¹⁵Na ya ti ale ti kobe baleoko, lo yeke mu mbage ni oko titene aga lapo ti ale ti kobe ti yaka, na lapo ti ale ti vinye ti mu na akota zo ti kua ti gbia. Lo yeke zi ti lo nga na ti azo ti gbe ti lo.

¹⁶Lo yeke mu azo ti kua ti ala ti koli na ti wali, lo yeke mu amaseka-koli ti ala so angba ngangu nga na alele ti ala titene a sara na kua ti lo.

¹⁷Lo yeke zi lapo ti ataba ti ala na ti angasa ti ala. Ti hunzi na ni, fade ala wani, ala yeke ga angbaa ti lo.

¹⁸Na lango ni so, ala yeke dekongo ndali ti gbia so ala wani asoro lo. Me KOTA GBIA ayeke kiri tënë na ala oko pepe.”

¹⁹Me azo ti Israel ake ti ma tënë ti Samuel, ala tene: “E ke awe! E ye ti e ti wara gi gbia.

²⁰E nga, e ye ti duti tongana amara kue. Fade gbia ni ayeke fâ ngbanga ti e si lo yeke tambula na li ti e ti gue na e na bira.”

²¹Samuel ama atënë so kue azo ni atene si lo kiri peko ni na KOTA GBIA.

²²Tongaso KOTA GBIA atene na Samuel: “Ma tënë ti ala; mu na ala mbeni gbia.” Na pekoni, Samuel atene na azo ti Israel: “Ala gue, zo oko oko akiri na ndo ti lo.”