Read sebat bet gurage ፍጥ. 13 Bible Online

ፍጥ. 13 - sebat bet gurage bible

ፍጥ. 13

¹አብራም ምሽትመታ ያነንም ዱንያ እንም ጠበጠም ተግብፅ ወጣም ኔጌብ ወረም፤ ሎጥም ተትም ጋ ወረም።

²አብራም ብዘ ዋጋ፥ ብዘ ብርም ወርቅም ያነን ደንገነ ሰብ ባነ።

³ተኔጌብ ተረሳም ታት መደር አት መደር ቲያር ቲያር ቤቴኤልንየ ወኸት ወረም፤ በቤቴኤልም ባይም ግብት ያነ መደር ሰናም፤ ዝም መደር ተኽ ይፍቴ ዱከመታ ወካም የቾናወም፥

⁴ኽትም ያትንው መደር ሸከተወም የረፐረ መደሩ፤ በኽም ይእግዘር ሰገደም።

⁵ተአብራም ጋ ያር የረፐረ ሎጥም ያርዋታ ብዘ ጤ፥ ፌቅም ዋጋም ባነበዊ፤ አበሩስመታ ያረዊም ሰብ ብዘ ባነቦ።

⁶አብራምም ሎጥም ብዘ ዋጋ የረፐረኖዬ እማቴ ይረብሮዬ አንኸረሎ፤ ዋጋና እማቴ ይወሮ ይወጣሎ ሰረጌ አነፐረኖ፤

⁷በዝም የቸነ በአብራም ዜማንቸም በሎጥ ዜማንቸም ግብት ዘና ቶጠረም፤ በኽ ዘበር በኽ ገነ ይረብሮ የከነአንም የፌርዛም ሰብ ባነቦ።

⁸አብራምም የሎጥ «ይና ጐፔ የኸኔ ብያም ባኸም ግብት የኽክም ብያም ዜማንቸ ባኸም ዜማንቸ ግብት ዘና ተሶት ኤነወ፤

⁹በዝ የቸነ ተቤተነም ይማት እማት ብነብነ ይፈዝ፤ ተገነታ የሸዀን ወኸት ሰፕትም አቴንየ ወር፤ እያም እንጐድ ወኸት ኧወርሸ» ቧረንም።

¹⁰ሎጥም ዙርያታ ባሸ ግዝየ የዮርዳኖስ ዮንደበን ደኔ ፆአር ስን ይእግዘር ጄነት ኸማ ዌም የግብፅ ገነ ኸማ እኻ ያነወ ወኽረታ አሸም፤ ዝም ያሸን እግዘር የሰዶምም የገሞራም ከተማ ታጥፎተታ ይፍቴ ባነ።

¹¹ሎጥም የዮርዳኖስ ዮንደበን ደኔ እንመታ የገገታ ሸፐተምታነ ነንየ ከናም፤ ዄችመና የትቤተሮ በዝ ኤነት ባነ፤

¹²አብራም በከነአን ነፐረም፤ ሎጥ ጭን ቦንደበን ደኔ ባነቦ ከተማ ግብት ቾናም፤ በሰዶምም መዬ ዱከመታ ወካም፤

¹³በኽ ዘበር የሰዶም ሰብ ንቃር አልም እግዘርም ያትየቆ ባጢረተነ ባነቦ።

¹⁴ሎጥ ቦረ አን እግዘር የአብራም «ታነኸወ መደር ከነም ራም ነንም ተትም ኧዥ፤

¹⁵ዝኽ ታዥን አፈር እንም ያኸም የዘርማኸ ኤብኹቴ፤ የዘላለም ያኹ ይኸርቴ፤

¹⁶ዘርማኸ ያፈር ሰር ኸማ አወዛንቴ፤ ያፈር ሰር ይዝርዬ ኤኸር ኸማ ያኸም ዘር የኽክም ይኸርቴ።

¹⁷ኧዃም ወርም አፈረታ እንም ኧዥ፤ እንመታ ያኸ ኤብኸቴ» ቧረንም።

¹⁸አብራምም ዱከመታ ነሳም በኬብሮን የመምሬ ቅዱስ የወርካ ኧጨ ያነቦ መደር ይረብሬ ወረም፤ በኽም ይእግዘር ኽትም ያትንው መደር ሸከተም።