Read sebat bet gurage ኢዮብ 11 Bible Online

ኢዮብ 11 - sebat bet gurage bible

ኢዮብ 11

¹የናማታ ገነ ፆፋር ዝካ ባረም፦

²«የዝኽ እንም ከንቱ ቃር መልስ ይብኸ ኤነዌ? አት ሰብ ዛኽር ቃር በቋዶተታ ጥየ ይኸሬ ይዀለዌ?

³ኢዮብ! ከንቱ ዘንጋኸ መልስ ኤይው ቃር ይመስርኸዌ? ዛኽር ቃር ትታስ ይማችብኸ ኤነቃር ይመስርኸዌ?

⁴አኸ ‹ዘንጋና ጥየቃሩ፤ ቢእግዘርም ይፍቴ ንጡኽን› ባኸም ታጫምት።

⁵ምሩ እግዘር ዘንተ ጥየ የኸረ መልስ ተዠፐረንኸ።

⁶የትሼመ ኻሪነት ቢያትርኸ ኻሪነተታ ብዘ የኸሬ። እግዘር ያኸ የቀጣናኸ ቲሰራብኸ ቃር አትየነሰምታነ የኸረኸማ ኻሮት ነረብኸ።

⁷«ይእግዘር ንቅ ኻሪነት ምረመርኸምታነ ትሪ ይኸንኸዌ? የርቅነትመታም የመነትመታም ዳር ታቈሌ ይኸንኸቴዌ?

⁸ተሰሜ ይርቅ ኧረቌ የኸሬ ትምረምሬ ኤኸንኸ፤ የተቦ ሰብ ታነቦ ገነ ይርቅ ኧረቌ የኸሬ ኻሮት ኤኸንኸ

⁹ይእግዘር ንቅነት ታፈርም ተባርም በትትነት ንቃር ይርቅቃሩ።

¹⁰እግዘር ጠበጠም የአኸ የፍርዴ ቢያትንብኸ ሟን ይዀራንቴ?

¹¹እግዘር ኤያር ሰብ ይኖ፤ ጥጥ ሜናናም ቤተረም ይር።

¹²ኧጀሱር ሰብ ኻሪ ይኸርቴ ተበሮት ይርቅ ይማር የፈካ ሰብኺተ ይትጨንቴ በሮት ይፈዝ።

¹³«ቢኸርም ናኸ ወኼቃር ብታሜ ኧጅማኸ ዝራትኸ ይእግዘሬንየ ጠሎት ብታሜ፥

¹⁴ባጢር ተጃኸ ብታፈካ ጥጥ ቃር በቤታኸ ይትረከብኸማ ባታሜ (ኤትረከብኸማ ብታሜ)

¹⁵በኽ ግዝየ አንገታኸ ንሸትኸ ታትሰርፍም እንምቃር ትዥሽ፤ ታትቅመጭም ገኪትኸ ሞት ይኽንኸሸ።

¹⁶ጅጓራኸ እንም ይፍካሸ፤ እምያ ቦንደ አን ኤትዘገድኸማ ይተሳኸሸ።

¹⁷ትረውን ንብረታኸ ተዝር ጬት ይርቅ ይሳርሸ፤ በዘበራኸ እንም ያጃኸ የጠነማ ግዝየ የቅረረ ጬትኸማ ይኽርሸ።

¹⁸በተስፋ ተሜናኸምታነ በትመመሮት ትምበርሸ፤ እግዘር ይቅየኸ የኸሬ ሽናት ያነወ ያት ትንኸብሸ።

¹⁹ትትገተር የጠላታኸ አትስርፍኖ፤ ብዘ ሰብ ባኸ ይፍቴ ክብር ይረኽቦዌ ይሳቦሸ።

²⁰ጥጥ ሰብ ጭን ተስፋ አንጦምታነ ዙርያና ያዘቦ፤ ይሰኾ መደርም ኤረኽቦ፤ ሞት ባንኸሬ ተስፋ ያመረቦ ቃር ኤረብኖ።»