Read sebat bet gurage ወማ 12 Bible Online

ወማ 12 - sebat bet gurage bible

ወማ 12

¹ውቀት ይረምድ ሰብ ተስተት ተዘፐሮት ይረምድ፤ አትቃር ኤር ሰብ ጭን ምኽር ይጠራ።

²እግዘር ወኼ ወኼ ሰብ ይረምድ፤ አል አሳብ ባነኖኽኖ ጭን ይፈርድቦ።

³ጥጥ ሰብ ተቋመረም ኤረብር፤ ፃዲቅ የኸሮ ሰብ ጭን ተቋመሮም ይረብሮ።

⁴ወኼ ምሽት የምሰታ ዘውድኸማ ይትሸመርባም ይትብራነቅባምቃንያ፤ ምሰታ ታቅመጭ ምሽት ጭን አጥም ይሰብር የነቀርሳ ባሸኸማ ትኸርወ።

⁵የርቴ ሰብ አሳብ እንምግዝየ ወኼቃሩ፤ አል ሰብ ጭን እንም ከረ ይቅማምሮኬ ይሰቦ።

⁶አልኽኖ ሰብ ይቀጥሮዬ በዘንጋና ያክታትፎ፤ ዮኼ ሰብ ዘንጋ ጭን ይሞቶዬ የትሽካከቶ ሰብ ያተርፎ።

⁷አል ሰብ ይጠፎ፤ ይትሸከርም ዘር ኤተርፍኖ፤ ዮኼ ሰብ ዘር ጭን ዘላለም ይረብር።

⁸ትቤስር ሰብ ብትኸር ይደርከ፤ ጠማማ ብትኸር ጭን በሰብ እንም የትቀንጥኸ ትኸር።

⁹ንቅ ሰብ መሰረም በጅጓረ ቲረብር ሰብ ይርቅ፥ ሟኒም ሰብ መሰረም ቾተም ንብረተታ ይም ሰብ ይፈዝ።

¹⁰ወኼ ሰብ የቤተታ ዋጋ ይቅየ፤ አል ሰብ ጭን የዋጋና ኤትጬፖ።

¹¹ጃደነ ቸዋች ይወጣለ ሸረት ይረውን፤ ቤያር ሜና ግዝየ ደፕሮት ጭን ጋውነቱ።

¹²ያል ሰብ ተመኛት እንም ከረ አል ዘንጋ ያመሮዬው፤ ወኼ ሰብ ጭን ውረም በኸረ ዘንጋ ተቋመሮም ይረብሮ።

¹³አል ሰብ አል ዘንጋታ ሽካ ኸረም ይጠውጥን፤ ራ ሰብ ጭን ተጅጓረ ያመርጥ።

¹⁴ትረኽውን በረካ ዮኼ ዘንጎትማኸ የሜናማኸ አጅጉ፤ በዝ ኤነት ጥየ አጅጋኸ ትረኽብ።

¹⁵ኤቤስሮ ሰብ፥ እንም ግዝየ ጥየ የኸሮ ይመስኖ፤ ኻሪ ጭን ወኼ ምኽር ይትፐሮ።

¹⁶የቀልብ ኤነታ የፈንጠ ሰብ ማት ኽምተኽም ይሪ፤ ጭ ሰብ ጭን የት የቀነ ቅኔመ ችላ ይብር።

¹⁷ውረም ይዝረ ምስክር ውረምቃር ዩድ፤ ኤነቃር ይዝረ ምስክር ጭን ኤነቃር ዩድ።

¹⁸ጭነት ኤባር የዝረከዊ ዘንጋ ሴፍኸማ ይወጋ፤ በኻሪነት የዝረከዊ ቃር ጭን ያፈዝዝ።

¹⁹ፍጥር የኸረ ዘንጋ ኧድሜየታ አጭሩ፤ ውረም የኸረ ዘንጋ ጭን ዘላለም ይረብር።

²⁰አል ቃር ያጫምቶ ሰብ፥ በነና አል ዘንጋ ነረ፤ ሽናት ያነወ ዘንጋ ያጫምቶ ሰብ ጭን ይሽኖ።

²¹ወኼ ወኼ ሰብ ስርም አል ዘንጋ ኤያጃኖ፤ አል ሰብ ጭን ጅጓረ ይሰራቦ።

²²እግዘር ይፈጥሮ ሰብ ይጠራ፤ ቃረና ቢቅረቦ ርቴ ሰብ ጭን ይሽን።

²³ጭ ሰብ «ኻሪንደ» ቤተቦ ኤትዞ፤ ጋዋኽኖ ጭን «ኻሪንደ» በበሮት አንኻሮተና ያትሮ።

²⁴በሜና ጃደነ ወኽር ዳነት ይብ፤ ኧጀሱር ወኽር ጭን ባርያ ያሜ።

²⁵ባሳብ ተጠነቆት ምጥጥ ያቸንብኸ፤ ወኼ ዘንጎት ጭን ያትብራንቅኸ።

²⁶በውረም የቈመ ሰብ አበጐዳታ በምኽሮት ዮኼ ኤሜንየ ይወስድን፤ ያል ሰብ ኤማ ጭን ተውረም ዘንጋ ኧረቌ ያሜ።

²⁷ኧጀሱር በኸርኸ የትሜነዀን አትረኽብ፤ ጃድ ባኸም በቾትኸ ጭን ደንገነ ትኸር።

²⁸በውረም ቃር ሞት ኤያም ዮኽር ኤማው፤ ቤማመታ ሞት ኤነ።