Read sebat bet gurage ኽዝ 4 Bible Online

ኽዝ 4 - sebat bet gurage bible

ኽዝ 4

¹እግዘር ዝካ ባረም፥ «አኸ የሰብ ትኮ! አንረኰርም ተጭቃራ የቾቺ አት ቤት ያረሽ ሸኽራ ውስድም ቢፍታኼ አውራን፤ በርመታ የኢየሩሳሌም ከተማ ይመስር ምስል ጣፍወ፤

²የከተማታ በጠላት ወትኸበብ ያትየሽኸማ በዙርያታ ድንዴ ድርግ፤ ይትሼ መደር ይዋንር ቃር ያርብ ቀያም ቶት።

³ምዳድ ውስድምታነ ባኸም በበከተማታ ግብት ኧጭርኸማ አን፤ ይፍትማኸ የከተማቴ ዘፕር፤ ከተማታ በጠላት የትኸበበ ይኸርቴ፤ ትኸውንም ያነ አኸትንኸ፤ ዝም የእስራኤል ገነ ሰብ መርኸት ይኸርቴ።

⁴«በዝኽ አን በራ መያኸ ተገደር፤ እያም የእስራኤል ባጢር እንም ባኸ ር ኧጨርቴ፤ የኽኖም ባጢር ትትብር ትትመካም ትትጨነቅም ሶስት በቅር ዝጥና ከረ በኼ ትክስቴ፤ ኽኖም ብንቀጣኖ አኽር አት ከረ የአት ኽርምኸማ ትትቀጣኸማ ፈንድም፤

⁶ትም በጀፐርኸ አን ተዥባበርም በከነ መያኸ በትገደሮት ኼብትኸታነ የይዳ በደል አርባከረ ትትጨነቅቴ፤ ትም ኽኖ ብንቀጣኖ አኽር አት ከረ ያትኽርም ኸማ ይኸርቴ በሮቱ።

⁷«ኢየሩሳሌም በጠላት የትኸበበወ መደሬ መርኬ በርም ኧዥ፤ ከተማታ በአርብ ያጠኸማ ባተዞት አጃኸ ትታንቅረቅር በታ ይቸንወ ቃር ባተዞት ትንቢት ዘን።

⁸በጠላት የትኸበበታ ቲያቈም ስን ታት መያኼ ያትመያኼ አትዥባፐርኸማ ቦደረ አግድኸቴ።

⁹«ኧዃም ቅሪ ስኔም ኧኽርም ባቄላም ቀሰምም ማሽላም አጃም ውስድ፤ እንመና እማቴ ቅራቅኖምታነ ዳቦ አብስር፤ ትም በራ መያኸ ብትገተርቦ በሶስት በቅር ዝጥና ከረ ትወራን ቃሩ።

¹⁰እንምከረ ቅሪ ቅሪ የጠነሺ ዳቦ ትብራሸ፤ ትም የዋሪ ከረ ስን ይወጣንኸኸማ ባምሮት ትውራንሸ።

¹¹ትሰጭንም እኻ የትወሰነ ቃር የኸሬ ባትከረ እማት ዄት ኩባያ ትሰጭቴ።

¹²የጠነቀ የሰብ ስማት ኧጨኸማ መኪትኸ እንጄራ ባብስሮት ሰብ እንም የአኸ ቢያዥኸ መደር ትውራንሸ።»

¹³እግዘርም «ዝኽ የእስራኤል ገነ ሰብ በሰብ ገነ እንም ብንብራጭኖ ግዝየ ገን በግፍሮተና የቸነ በጫ የዀኔዮ የሰነኾ ሸረት ይበሮ ኸማው ያትየሽ» ባረም።

¹⁴እያም ዝካ ትንብር ዝረም፥ «ንቅ እግዘሮ! ዝሽታ ስርም ኤኽር፤ እያ ስርም እማትም አንሰነ፤ ተትክነተና ቈነሽምታነ የበከተ ዌም አዊ የቈጠረን ዋጋ በሰር የበናኽወ ግዝየ ኤነ፤ በጫ የዀኔ የኤን ይጠግር ሸረት አንበና።»

¹⁵እግዘርም «ወኼ ቃሩ፤ እክሽ በኸረ በሰብ ሰማት ሟሬ ኽወታ በመክሮት ዳቦ አብስር» ባሬም።

¹⁶ኻበምታነ ዝካ ባሬም፥ «የሰብ ትኮ! በኢየሩሳሌም ሸረት ኤረብርኸማ አሜቴ፤ በኼ ይረብሮ ሰብ ይበረዊ ሸረትም ይሰጠበዊ እኻም ጦም ቲሰፍሮ በአዘንም በጥንትም ይትሜኖኸማ አሜቴ።

¹⁷በዝኽ ኤነት ሸረትም እኻም ይበኽሮኸማ አሜቴ፤ ተስፋ በርጦት ገግተገገና ይታዘቦቴ፤ ተባጢረና የቸነ ገጀና ይጥቴ።»