Read sebat bet gurage ኽዝ 48 Bible Online

ኽዝ 48 - sebat bet gurage bible

ኽዝ 48

¹አፈርታ ይትሸዶዌ የትጣፎ ጥብ ዝኸናሎ፤ የዳን ጥብ በአፈረኽኖ ከነወኸት አት ሟር ይንንሸ፤ ትም ተኼትሎን ኻማት ይወስድ ኤማ ተተረምታነ ተኽም ኻፃሬኖንም የደማስቆ ከነወኸት ተረንየ ተትንየስን ያነ ዳር ይትቤተርወው።

²አሴርም ተረንየ ቈነሽም ተትንየ ስን ተዳን ሟር ጋ ያትራክብ ዳር አት ሟር ይምንሸ፤

³ንፍታሌም ተረንየ ስን ታሶር ሟር ጋ ያትራክብ ዳር አት ሟር ይምንሸ፤

⁴ምናሴ ተረንየ ተትንየ ስን ተንፍታሌም ሟር ጋ ያትራክብ ዳር አትሟር ይምንሸ፤

⁵ኤፍሬም ተረንየ ተትንየ ስን ተምናሴ ሟር ጋ ያትራክብ ዳር አትሟር ይምንሸ፤

⁶ሮቤል ተረንየ ተትንየ ስን ተኤፍሬም ሟር ጋ ያትራክብ ዳር አት ሟር ይምንሸ፤

⁷ይኹዳ ተረንየ ተትንየ ስን ተሮቤል ሟር ጋ ያትራክብ ዳር አት ሟር ይረውን።

⁸ተዝኽ ቦስጥ ያነ መደር የትቤተርምታነ የችር ችር ሜና ይኽርሸ፤ ትም ተከነ ራ ስን በትትነተታ አስረም ዄት ኪሎ ሜትር ይኽርሸ፤ ተረንየ ቈነሽም ተትንየ ስን ያነ ጌፍነት ትንጐድ ጥብ ሽድ ጋ እማት ኤነት የኽር ቤተመቅደስምት በኽ መደር ይንበርሸ።

⁹በዝኽ መደር ግብት ጌፍነተታ አስረም ዄት ኪሎ ሜትር መየመታ አስረም ዄት ኪሎ ሜትር የኸረ መደር ይእግዘር የትቤተረ ይኽርሸ።

¹⁰ስኽኖም ተዝኽ ቅዱስ ተኸረ መደር ሟር የምበኖ፤ የኽኖም ሟር ተረንየ ተትንየ ስን አስረም ዄት ኪሎ ሜትር ተግብት ተከነ ራስን አምስት ኪሎ ሜትር ይኽርሸ፤ በዝኽ መደር ግብት ይእግዘር ቤተመቅደስ ያረሺቴ።

¹¹ዝም የትቀደሰ መደር ይውዮ ያነ የሳዶቅ ዘር የኸሮ ሰሎ፤ ኽኖ ይእንጐድ የሌዊ ጥብኸማ ትንጐድ የእስራኤል ገነ ሰብ ጋ እማቴ ኸሮም የቅሪነ ቴሰግዶ ይያ በርቴነት አሮንም፤

¹²የኽየኸሬ ኽኖ የሌዊ ጥብ ታውዮ ሟር መዬ ችር ሟር ይረብኖዌ ያትሽ፤ ትም ትንም የትቀደሰ ይኽርሸ።

¹³የሌዊጥብ ተስኽኖ ራወኸት የትቤተረ ሟር ይምበኖሸ፤ ትም የዝክም ተረንየ ተትንየ ስን አስረም ዄት ኪሎ ሜትር ተግብት ተከነ ራ ስን አምስት ኪሎ ሜትር ይኽርሸ፤

¹⁴ይእግዘር ያወሬ መደሬ በገነታ ታነ እንም ንቃር ይፈዝቃር ወኽር ነረወ፤ ተትም ሻጅምታነ ያስሬሜም ያሸሪሜም ዌም የሟኒም ሰብ ያወርሺዬ ኤኸር፤ ት ይእግዘር ያወኔ የትቀደሰ መደር ይኽርሸ።

¹⁵ተትቤተረ መደር ሻጂምታነ ይተርፍ መደር መየታ አስረም ዄት ኪሎ ሜትር ተግብት ጌፍነተታ አስረም ዄት ኪሎ ሜትሩ፤ ትም የትቀደሰ ኤኸር የኸሬ የሰብኽኖ እማቴ ያኖ ቃር ይኽርሸ፤ ኽኖ በኽም ይረብሮሜም ይትጠቀሞም ይኸሎ፤ ከተማምት በት ግብት ወኽር ነረወ፤

¹⁶ትም አርበችም መደረታ ጥየ ኸረምታነ አርበችምኽኖ ያታተና ጌፍነተና ዄትም ተዄት በቅር ኪሎ ሜትር ይኽርሸ።

¹⁷የከተማታ ዙርያ እንም መየታ አት በቅር ተያም አምስት ሜትር በትትነት ያነን መደር ይንንሸ።

¹⁸ተትቀደሰ መደሬ ራ ወኸት ያነ መደር በረንየ ወኸት ጌፍነተታ ዄት በቅር ተአምሳ ኪሎ ሜትር መየታ ዄት በቅር ተአምሳ ኪሎ ሜትር የኽክም በተትንየ ወኸት ጌፍነተታ አምስትም ኪሎ ሜትር መየታ ዄት በቅር ተአምሳ ኪሎ ሜትር ድበያ መደር ከተማታ ባረሰዊ አን በከተማዀታ ይረብር ሰብ የቹቻ አፈር ይኽርሸ።

¹⁹በከተማታ ይረብር ተሟኒም ጥብ የጨነዊ ሰብ እንም ኽኽ አፈር ይቾቴ በሸ ቶቶት ነረወ።

²⁰በገነታ ግብት የትቤተረ መደር እንም ብንም የአርበችም መደረታ ጌፍነት አስረም ዄት ተግብት ኪሎ ሜትር ቲኸር ትም ከተማታ ያረሶ መደሬ ይደብር።

²¹ቤተመቅደስታ፥ የስኽኖ ርስት፥ የሌዊ ሟርም የከተማ መደርም ተጠወጠን ዙርያ በረነንየም በተትንየ ወኸትም ያነ የተነፈ አፈር በዳነት ያነ የመስፍንታ ይኽርሸ፤ ዝም አፈር በረንየ ወኸትም የረንየ ዳር ስንም በተትንየ ሜድትራኒያ ባር ይሰራ፤ የኽክም በከነ ወኸት ተይኹዳ ኧጥ በራ ተብንያም ሟር ጋ ይደመደ።

²³የተነፎ ጥብ የአፈር ሸድ የዝካው፦ ቢኒያም ተረንየ ተትንየ ስን ያትራክብ ዳር አት ሟር ይምንሸ፤

²⁴ስምኦን ተረንየ ተትንየ ስን ተብንያም ሟር ጋ ያትራከብ ዳር አት ሟር ይምንሽ፤

²⁵ይሳኮር ተረንየ ተትንየ ስን ተስምኦን ሟር ጋ ይትራከብ አትሟር ይምንሸ

²⁶ዛብሎን ተረንየ ተትንየ ስን ተይሳኮር ሟር ጋ ይትራከብ ዳር አትሟር ይምንሸ፤

²⁷ጋድ ተረንየ ተትንየ ስን ተዛብሎን ሟር ጋ ያትራክብ ዳር አት ሟር ይምንሸ።

²⁸የጋድ የራወኸት ዳር ተታማር ራ ወኸት ተረሼምታነ በመሪባ ቃዴስ ታነ ይእኻ ሚንጬ ስን ይሰራ፤ ተኽም የግብፅ ዳር የኸረ እኻ ተተረም የሜድትራኒያ ባር ይሰራ።

²⁹ንቅ እግዘር «በዝኽ ኤነት የእስራኤል ጥብ እንም በኧጥ ተሻደቦምታነ ይወርሰዊ ገነ ዝኸታው» ቲብር ዝረም።

³⁰የኢየሩሳሌም ከተማ አስረም ዄት ወፈንቻ ይረውንቴ፤ በአርበችም መደሬ የኧጭር ግንብ ያታተና ጌፍነት ዄት ም ዄት በቅር ተአምሳ ኪሎ ሜትር ኸረምታነ ሶስት ሶስት የኧጭር ወፈንቻ ይረብኖቴ፤ ወፈንቻኽኖ ታተና በእስራኤል ጥብ ሸም እንም ይጠሬቴ፤ የኽየኸሬ በከነወኸት ያነቦ የኧጭር ወፈንቻ በሮቤል፥ በይኹዳም በሌዊ ሸም ይጠሬዮቴ፤ የረንየ ወፈንቻም በዮሴፍ፥ በቢኒያምም በዳን ሽም ይጠሬዮቴ፤ የራ ወፈንቻም በስምኦን በይሳኮርም በዛብሎንም ሽም ይጠሬዮቃር ቲኸሮ፥ የተትንየ የኧጭር ወፈንቻ በጋድ፥ በአሴርም በንፍታሌምም ሽም ይጠሬዮቴ።

³⁵የከተማታ የኧጭር ግንብ ዙርያታ እንም ብንም ዠጠ ም ሜትር ይኸር፤ ተዃ አን የከተማታ ሸም «እግዘር በዝ ነረ» ይብርቃር ይኽርሸ።