Read sebat bet gurage 1ነ ተሰ 2 Bible Online

1ነ ተሰ 2 - sebat bet gurage bible

1ነ ተሰ 2

¹ጐፔቸም ኧተቾ ያኹዌ ተኖተንዳ ከንቱ አነፐረ ኸማ አኹም ትሮ።

²አኹም ትሮ ኸማ የዝ ይፍቴ በፊሊጶስ ከተማ ታነነ መከራም ስዴበም ሰናብንደም ባነ፤ ቢኸርም ንቅ መራክስ ቢሰራብንደም ዳር ይእግዘር ወኼ ወሬ ኑድኔ እግዘረንዳ ድፍረት አበንደም።

³ይና ያኹ የመከኔኩ በስተት ዌም በሰነኸ ዘንጋ ተመራነም ታነ አንኸረ፤ ያኹም ናታልልኔኩዌም አንሸነ።

⁴ይርቅመታ እግዘር ወንጌለታ ይና ባደራ ያበንዳ ቢና ተመመረም የኸሬ ይናም የታመረ ሰብ ኸነም ንዝረነ፤ የነንዳ ቃር ይር እግዘር ይሽኔ ባነም ታነው ባንኸሬ ሰብ ይሽኔ ባነም ታነ አንኸረ።

⁵በቅማምሮት ዌም የዋጋ ንማጀ ንቤተንደ ዋጋ ንበራኔኩዌ ስርም አንዝረነ ኸማ አኹም ገጋኹ ትሮ፤ እግዘርም ምስክረንዳው።

⁶ታኹም ኸረም ትንጐድም ተሟኒም ሰብ ክብር አንሽነ።

⁷የክርስቶስ ናቸረነም በኸነሜ ባነንዳ ዳነት ንትጨርኔብኩዌ ይኸርንደ ባነ፤ ቢኸርም የዴንታ ትጬፕሮ አዶት ኸማ ያኹ ሜራ ኸነም።

⁸የኽክም ንቃር የረመድኔኩዌ ተርቅ ንማጀንዳ የቸነ ያኹ እማት ይእግዘር ወንጌል ኦዶት ቴኸር ነብሰንዳ ኒብኔኩዌ ይሽርንደ ባነ።

⁹ጐፔቸም ኧተቾ፥ መምር የቾትነም የጥነም ኸማ አኹም ትሮ፤ ይእግዘር ወንጌል ያኹ ትኑድነ አትማኹ ባናጀግኔ ዋናም ምሳረ በሜና ንጥነ ባነ።

¹⁰ይናም ባኹ ክርስቶስ ባመርኹ ሰብ ግብት ታነነ በቅድስናም በፅድቅም ጥየ ቃር በቶቶት አት ባጢር ኤባር የረፐነ ኸማ አኹም እግዘርም ምስክርንኹ።

¹¹አብ የዴንታ ያሜሮም ኸማ ይናም ያኹ ያመነኔንኩ ኸማ አኹም ትሮ።

¹²እንም ጋ ትመኽኔኩም ትናትቋምርኔኩም ይእግዘር መንግስትም ክብርም ትትሸዶዌ የጠናናኹ እግዘር ቢሽን ኤነት ትረብሮዌ አደራ የባኔኩ ኸማ ትሮ።

¹³አትም ያኹ ቃር እንም ጋ ይእግዘር ሽኩር ንብኔ ቃር ነረንደ፤ ቲና የሰማኹዊ ይእግዘር ቃር በትፐርኹ ግዝየ ባኹ ክርስቶስ ባመርኹ ሰብ ይቾት ዝኽ ቃር የትፐርኹዊ የሰብ ቃርኸማ ቴኸርም ይእግዘር ቃርኸማ አመነኹም ተፐርኹም፤ ዝም ቃር ውረም ይእግዘር ቃሩ።

¹⁴ጐፔቸም ኧተቾ በይኹዳ ገነ ያነቦ በኢየሱስ ክርስቶስ ይእግዘር ቤተክርስቲያን የኸሮኽኖ መሰርኹም፤ ኽኖም በይኹዳ ሰብ መከራ የትፐሮም ኸማ አኹም በገጋኹ ገነ ሰብ መከራ ተፐርኹም።

¹⁵የይኹዳ ሰብ የታ ኢየሱስም የነቢም የቀጠሮ ይናም አሳደዶም ተገነ ያወጦንደኽኖሎ፤ ኽኖም እግዘር ያትማተቦ የሰብ እንም ይጠሮ ቃሎ።

¹⁶አረማዊ ሰብ ተባጢረና ይተርፎ ቃር ኑድኔዮዌ ዳር ይኸሮንዴ ያትባቅሮ፤ በዝ ኤነት በባጢር ር ባጢር በድብሮት ይረብሮ፤ በኽ የቸነ ይእግዘር ማት በቀጥወ ቸነቦም።

¹⁷ጐፔቸም ኧተቾ የቀሪ ዳር ታኹ የትቤተኔ ያኹ ያነንደ ተመኛት ንቃር የኸሬ ተራከብነም ቤነንዳ ናዥኔኩዌ ሸነም።

¹⁸ይናም ያኹዌ ንቸኔ ኤላነም ባነ፤ እያ ጳውሎስማ ያኹዌ ኧቸኔ ብዘ ጋ ተረሳም ባነ፤ ቢኸርም ሼጣን ቈፋ ኸረብንደም።

¹⁹ኧጋ ተስፋንዳም ብንተንዳም ታንዳ ኢየሱስ ክርስቶስ ቢቸንወ ከረ ቢፍተቴ ንሟቅጥኔ የሞት አክሊለንዳ አኹ ባንኸርኹ እንጐድ ሟኑ?

²⁰በውረም ክብረንዳም ብንትመንዳ አኹትንኹ።