Read sebat bet gurage 1ነ ጴጥ 5 Bible Online

1ነ ጴጥ 5 - sebat bet gurage bible

1ነ ጴጥ 5

¹ኼታ እያም ተኽኖ ጋ የቤተክርስቲያን ባሪቅ የኸር፥ የክርስቶስም መከራ ምስክር የኸር፥ ዝክም የዝ አን ይቸን ክብር ሟር ያኔ በግብታኹ ያነቦ የቤተክርስቲያን ባሪቅ ኧመኽኖ።

²ያኹ ባደራ ያውኩ ይእግዘር ሰብ ቀሮዮ፤ ሰበታም ትቅረቦ የግርድ ቴኸር እግዘር ቢሽን ኤነት በፍቃዳኹ የኽር፤ ቀሮታኹ የዋጋ ዘግዘግ በበሮት ቴኸር ይእግዘር ቲሽርኹ ታክሮዌ የኽር።

³ዝክም ባኹ አላፊነት ያነቦ ሰብ በግርድ በግዞት ቴኸር ብእግዘር ሰብ ይፍቴ ወኼ አመር ባተዞት የኽር።

⁴አኹ ዝኽ ብትቾቶ ዋና ዜማንቸ ቢቸንወ ከረ ኤትብላሽ የክብር ሽልማት ትትፐሮቴ።

⁵የኽክም አኹ ዘርማ የባሪቅ ታዘዞ፤ እንማኹ አተታ ያተታ ባገክሮት ርነት የጅር ኸማ ተኸደሮ። «እግዘር የትቢተነ ይቀጣኖ፤ የራኽኖ ጭን ፀጋ ይብኖ» ቧርም ጣም።

⁶ኼታ እግዘር በወሰነን ጋ ከፍ ያሜኹዌ ደረግ ታነን ትእግዘር ኧጅ ቦስጥ ገጋኹ አተንሶ።

⁷እግዘርም ያኹ ያስብ የኸሬ ያጨንቅኹ ዘንጋ እንም የት ታቦለ።

⁸ባግባብ ንበሮ፤ ቃንዠ በሮ፤ ጠላታኹ ሼጣን ይበራ ቃር ቲሸ ይዥመምር ዠፕ ኸማ በዙርያኹ ይዦር።

⁹በዝ አለም ያነቦ ጐፔያኹ የዝ ኤነት መከራ ይሰራቦ ኸማ ኻሮም ባመርኹዊ ተቋመሮም የዝ ሼጣን አሳደዊ።

¹⁰የቀርየጋ መከራ በትፐርኹ አን በክርስቶስ የዘላለም ክብር የሸፐተናኹ የፀጋ እንም ታ ት ገገታ ተትፐርኹዊ መከራ ያትርፍኹሸ፤ ይግዝኹሸ፤ ያትቋምርኹሸ፤ ደረግም ይድብንኹሸ።

¹¹የት የዘላለም ዳነትም ደረግም የኽር፤ አሚን።

¹²የታመረ ጐፔው ኧውን በሲላስ ወኸት ዝኽ አጭር ናቸር ጣፍንኩም፤ የጣፍንኩም ያኹ ኧመኽርኹዌም ዝኽ ውረም ይእግዘር ፀጋ የኸረ ኸማ ያኹ ኦድኹዌ ትምብሩ፤ አኹም በዝ ብእግዘር ፀጋ ተቋመሮም ንበሮ።

¹³ያኹም ኸማ የሸችዮ በባቢሎን ከተማ ያነቦ በክርስቶስ ያመሮ ሰብ ወኼምንኹዌ ይብሮኩ፤ ኧርቸናም ማርቆስ ወኼምንኹዌ ይብርኹ።

¹⁴አኹም ታኹ በርማጀ በትሳሳሞት ወጌምት ተቤሮ። በክርስቶስ አመርኹም ትረብሮ እንማኹ ሽናት ያኹ የኽር።