Read songe Mateo 12 Bible Online

Mateo 12 - songe bible

Mateo 12

¹Ha’kia kihindji Yesu bayile h’efuku dia Sabadomu (mafuba a) mebele; na bana-be-ba-bukishi babadi na nsala; ababangile miombotshi ya mebele kudia.

²Anka Bafadiseo habamwene’kio abamulungwile’shi: Tala, bobe bana-ba-bukishi abakitshi wawa mwanda ushidikwe kishila kukita h’efuku dia Sabado.

³Ank’e bebalungwile’shi: A tanwi babale mwanda ubakitshine Dafidi habadi na nsala, na bangi bantu babadi n’abo su?

⁴Mubatwelele mu nshibo y’Efile Mukulu badile mampa aleshwe yibadi kishila kwādi, na babadi n’abo kudia, abadi anka a batshiite-bakwidi?

⁵Sunga tanwibabale namu mu mukanda-wa-bishila bibakitshine batshiite-bakwidi mu ntempelo mu mafuku a Sabado, mwā balwisha Sabado na tabadi na mwanda, ooo.

⁶Ank’ami nenulungula’mi’shi: Hano h’e ’mukile ntempelo.

⁷Anka su nubadi beukye mwiyile uno mwanda’shi: Nadidi lusa, nkimukyebe bitahilo, tanubadia kuhīsha babingye.

⁸Mwanda Mwan’a muntu E Nfumu sunga di’ekale efuku dia Sabado.

⁹Binyibiabia habadi bakatukile kwanka, E batwelele mu kitumbwilo kiabo.

¹⁰Biabia, talai! kubadi muntu n’easa die difumbe; abamwihwishe’shi: A kwi kishila kuhwisha busungu mwifuku dia Sabado? bamone mwa kumwimukila.

¹¹E namu bebālulwile’shi: A muntu kinyi munkatshi mwenu e na mukoko umunenka, su ubahono mbwina h’efuku dia Sabado, akutwe kwiukwata na kwiuabula su?

¹²A muntu tamukile mukoko buwa su? Binyibiabia mbilombana kukita buwa h’efuku dia Sabado.

¹³Biabia balungwile muntu’shi: ola mboko yobe. E namu beyolwele, yibalombene biya hamunenka na yikwabo.

¹⁴Henyihaha Baladiseo abakatukile, abamudidile lukuku’shi: Atukamwihayila bi kunyi?

¹⁵Anka Yesu ha kwiuuka, ebongolokyele hanka, na bibumbu bikata bibamulondele, bebahashishe boso.

¹⁶Bebakamikile’shi: Tanunukishanga.

¹⁷Biaudia kukumbashwa ubatemukile mutemuki Esaiye’shi:

¹⁸Tala, mufubi ande anasangwile mukuminyibwe, nyi mwadi e mwandji mutokel’eshimba diande; nankatulu Kikudi-E-Selelee ande hadi, n’E akahatula kwi Mīlo mwiile kōloka.

¹⁹E takēle mpaka sunga nkwela musase, takwi muntu akahush’eyi die mu mpata.

²⁰E takatshomona mulengye uhunyunwe, sunga kushima butongo abufutuka mwishi, mpaa na hakatumu kōloka kwikala na bushindanyi.

²¹Na mwishina die mīlo ayikakuluhila.

²²Binyibiabia kubamufwishishwe muntu mukwatshibwe na kikudi kibi, badi mpofu na bu kamama; n’e bamuhashishe, biabia winyi mpofu na bu kamama bamwene, na kwakula bakwile.

²³Biabia bantu boso abakanyine, babambile’shi; Uno ta mwan’a Dafidi’nyi?

²⁴Anka Bafadiseo habeuhushishe, abakwile’shi; Au (muntu) tabingi bikudi bibi anka na bukome bwa Bēlesebuba, nfumu a bikudi bibi.

²⁵Na Yesu beukile binangu biabo, bebalungwile’shi: Bufumu boso abwīlamūna, bubafishwa ku kusalakana; na kibalo kioso, na nshibo yoso abīlamuna bi na bene, tabiuku kushimata.

²⁶Biabia su Satana abingi Satana, e mwīlamune e na mwinyi, binyibiabia bufumu bwe abukashimata bi kunyi?

²⁷Su ami namu nabingi bikudi bibi na bukome bwa Bēlesebuba, a bana benu abebibingile kwi nanyi? binyibiabia abakekala bu bansushi benu.

²⁸Anka su ami nabingi bikudi bibi na Kikudi-E-Selelee e Efile-Mukulu, biabia bufumu bw’Efile-Mukulu bubafiki kwanudi.

²⁹A nanyi muntu euku kutwela mu nshibo ya muntu e bukome na kulwisha bintu bie bi mwanka, su tabandjile kwānya sha bukome? anka biabia akalwisha nshibo ye.

³⁰Muntu e shī n’ami, bampēle; n’awa shī akongola n’ami ahalakasha.

³¹Nyi ha uno mwanda nenulungula’shi; Bihaso bioso bia milwisho, na bia kukāna abikalekyelwa bantu, anka bia kukāna bi kwi Kikudi-E-Selelee takakelekyelwa bantu, ooo.

³²Muntu oso namu akesambila mwan’a muntu bibi aukamulekyelwa, anka muntu oso akesambila Kikudi-E-Selelee bibi, taukamulekyelwa, sunga mu kihindji kino, sunga kihindji akikafiki, ooo.

³³Lumbulusha mutshi wibuwa, na bikuba biao bibuwa, sunga lwisha mutshi na bikuba biao namu; mwanda mutshi aushingulwa ku bikuba bie.

³⁴Aa, anwe twikulu twa manyoka, anwiuku kwakula bintu bibuwa na minyi, anwe be bubi? Mwanda mwishimba mukambe kuula, akwakula.

³⁵Muntu ebuwa atushe bintu bibuwa bia mu kintu kineme mwishimba die, muntu mubi atusha bintu bi bubi bia mu kintu kineme kwishimba die.

³⁶Ank’ami nenulungula’shi: oso mwanda wa bisumanga aukakula bantu, a babeilubula mwifuku dia kimu.

³⁷Mwanda ku bishima biobe okabingishibwa, na ku bishima biobe okahishwa.

³⁸Henyihaha bangi ba Bafundji-ba-mikanda, na ba Bafadiseo babālulwile’shi: A Mulambukishi atukyebe kumona kitundwilo kodi’be.

³⁹Anka E bebālulwile’shi: Kekulu (ku bantu) ke kubi, na ka lusandji akakimbi kitundwilo; anka kitundwilo takikekahebwa, anka kitundwilo kia mutemuki Yonasa.

⁴⁰Mwanda’nka bibadi Yonasa munda mwa mushiha ukata mafuku asatu, kanya na bufuku, anka biabia, Mwan’a muntu akekala mafuku asatu, kanya na bufuku, munda mwa nsenga.

⁴¹Bantu ba ku Ninefa abakabwēla mu kimu na kano kekulu (kabantu), abakekahīsha; mwand’abo belangye mu mashimba ku kulungula kwa Yonasa, na talangai, mukile Yonasa bukata e hano.

⁴²Nfumu mwana mukashi a Sude akabwela na kano kekulu (ka bantu) mu kimu, akekahīsha; mwanda e bafikile ku kunfudilo kwa nsenga mu kuhusha kalolo ka Solomone; na talangai, mukile Solomone bukata e hano.

⁴³Habatukile kikudi kibi munda mwa muntu, akitambuka ha bihindji biume hoo, akikimbi ha kwikisha, anka takihamone.

⁴⁴Binyibiabia akiakula’shi, nakāluka ku nshibo yinatukile; na ha kufika mwanka, beihetele bisumanga, yikombe na yilumbulwe.

⁴⁵Binyibiabia akiende, akiata bingi bikudi bibi musambobidi bikikile bubi, n’abi abitwela mu kubombela mwanka; biabia mwikyelo wa fudilo w’awa muntu ubakile wa kwibedi. Anka biabia akukekala ku kano kekūlu kabi (ka bantu).

⁴⁶Habadi asambila na bibumbu bia bantu, talai, nyin’e na bakwabo bana balume abadi bemane hasha, abadi bakyebe kwisamba n’e.

⁴⁷Binyibiabia muntu bamulungwile’shi; tala, nyin’obe na bakwenu bemene hasha, abakyebe kwisamba n’obe.

⁴⁸Anka E bebālulwile’shi: A nyin’ami nanyi? na bakwetu mbanyi?

⁴⁹Biabia b’ōlwele mboko ye kwi bana be ba-bukishi’shi: Talai, nyin’ami na bakwetu!

⁵⁰Mwanda muntu ese akakita abikyebele eshimba dia Yaiya e mwiilu, anka yawa e mukwetu mulume na kashiana’mi, na nyin’ami.