Read songe Mateo 13 Bible Online

Mateo 13 - songe bible

Mateo 13

¹H’adie’fuku Yesu batukile ku nshibo, bashalele kubukunkula kwishiba.

²Bibumbu bikata bia bantu bibekoñene kwadi, biabia batwelele mbwato, bashalele; na kibumbu kishima kibemene ku bukunkula kwa mema.

³E bebalungwile myanda yi bungi mu miele’shi: Talangai, muminyi bayile mu kumina mbio.

⁴Habaminyine, yingi (mbio) yibahonene ku bukunkula kwishinda, tonyi namu tubafikile kwiyimina.

⁵Yimo yibahonene habadi mabwe, habadi nsenga yshi bungi; henyihaha yibamene, mwanda ta yibadi na nsenga yi bula;

⁶na ha kukanka nguba, yibatatshile, yibafumbile, mwanda ta yibadi na mishi.

⁷Yingi namu yibahonene munkatshi mwa milobo, milobo yibatamine yibeinyengyela.

⁸Anka yingi yibahonene ha nsenga yibuwa; yibahele bikuba, yingi ha lukama, yingi ha makumi asamombo, yingi namu ha makumi asatu.

⁹E na matwi a kuhusha, ahushe.

¹⁰Bana ba-bukishi abafikile, abamuhwishe’shi; Wakula kwabadi mu miele kinyi?

¹¹E bebālulwile’shi: Mwanda kwanudi ubahebwa kushingula yifībwe ya bufumu bw’Efile-Mukulu, anka kwibo kushī bahebwe.

¹²Mwanda kwi ese e n’akio, akikamuhebwa, e namu akekala n’abio bikambe; anka kwi ese te n’akio, akikatshibwa sunga’kia kiadi n’akio.

¹³Binyibiabia uno nyi mwanda unebalungwile mu miele; mwanda’bo ha kumona tabamono ooo; na ha kuhusha tabahusha, sunga kushingula.

¹⁴Mwabadi ’mubakumbashwa kitemukilo kia Esaiye; kibākwile’shi: Hakuhusha anukahusha, tanukashingula; na kumona anukamono, anka tanukahatula.

¹⁵Mwanda mashimba a bano bantu abālulukile bwalotakane, matwi abo ngashikile, meso abo namu abamomwa, tala kioso kihindji abakamono na meso abo, na kuhusha na matwi abo, sunga kushingula ’mashimba, n’abo kwikala balulukye ’mashimba, n’ami biandjia kwibahasha.

¹⁶Anka meso enu nga mwabi, mwanda amono; na matwi enu hamune, mwanda ahushā.

¹⁷Mwanda nyi binyibinyi nenulungula’shi, batemuki bebungi na bantu balulame babakyebele kumona abia bianumono, tambebimone; na kuhusha bianuhusha, tambebihushe.

¹⁸Binyibiabia hushai mwele wa muminyi.

¹⁹Ahahusha muntu mwanda wa bufumu, e tamwiuuke wibuwa, binyibiabia winyi mubi afiki, aunyengye’kio kibakunyinwe mwishimba die; Uno nyi winyi batambwile mbio ku bukunkula kwishinda.

²⁰Anka yawa batambwile mbio mu kihindji kia mabwe, nyi e bahushishe Mwanda, kahindji n’āka namu eutambula na kusangala;

²¹Anka e te na mishi munda mwe e na mwinyi, anyingi kihindji kihi, anka ahakabuku kusabulwa su kubingwabingwa ha mwanda wa Mwanda, kahindji n’āka ebakokoshwa.

²²E namu batambwile mbio munkatshi mwa milobo, nyi e bahushishe Mwanda, anka binyengo bia hanohansenga, na kōngolwa kwa mono, akwinyengyela Mwanda, n’e akutshikwa kuha bikuba.

²³Anka e batambwile mbio mu nsenga yibuwa, nyi e ahusha Mwanda, na kwiushingula, a aha bikuba namu, atusha yingi bu lukama, yingi bu makumi asamombo, yingi bu makumi asatu.

²⁴Ungi mwele belele kwabadi’shi: Bufumu bwa mwiilu bubahwandjikile kwi muntu baminyine mbio yibuwa mwifuba die.

²⁵Anka bantu ha kulala-tulo, badi n’e mushikwa bafikile, baminyine nkonongo munkatshi mwa nano, bakatukile.

²⁶Anka habatulukile mitombo na ha kuha bikuba, nkonongo yibamwekyele namu.

²⁷Biabia bahika ba sha nshibo bafikile, bamulungwile’shi: A Mwanana, tobominyine mbio yibuwa mwifuba diobe’nyi? Ahenyihaha nkonongo yibafikile kwi kunyi?

²⁸E bebalungwile’shi: Muntu e n’ami luhuna nyi bakitshi biabia. Bahika abamwihwishe’ shi: Okumina’twe kukeitukula’nyi?

²⁹Anka E bambile’shi: Ayoyo, tala, su hanulamuna nkonongo anukatukwila nano n’ayo.

³⁰Eyilekyei bubidi bwa’yo, yikudile hamune mpa n’ahakafiki hakūmbula, henyihaha nankalungula banoi’ shi; nusangulai hamune nkonongo kwibedi, nwianye mabombo mu kwiishika kālo, anka nukongole nano mu mputshika yande.

³¹Ungi mwele belele kwabadi’shi: Bufumu bwa mwiilu mbuhwandjikile na lubio lwa mūtade lubātshile muntu, bakunyine mwifuba die.

³²Nyi mbinyibinyi ndukile buhela bwa mbio yoso; anka h’alukulu, ndukile munkatshi mwa mabula oso, lubālulukile tamutshi ukata, nyi anka biabia tonyi twa mwiilu atufiki mu kubombela mu ntabi yao.

³³Ungi mwele bebambile’shi: Bufumu bwa mwiilu bubahwandjikile na kitatusho kibātshile mwana-mukashi, bekifīle mu bihimo bisatu bia bukula mpaa n’ahakibatatukile kioso kishima.

³⁴Yino myanda yoso Yesu bakwile kwi bibumbu bia bantu mu miele, na kushī mwele tamwakule kwabadi.

³⁵Biaudia kukumbashwa ubakwile mutemuki eshi; Nankabula mukanwa mwande na miele; nankatusha myanda yibadi yifībwe mpaa na ku mbangilo ya hanohansenga.

³⁶Binyibiabia Yesu bebwesheshe kibumbu, batwelele mu nshibo; bana-be-ba-bukishi abafikile kwadi’shi: Etuhatulwile mwele wa Nkonongo ya mwifuba.

³⁷N’e bebālulwile’shi: Winyi baminyine mbio yibuwa nyi Mwan’a muntu.

³⁸Dinyi efuba nyi bahanohansenga; mbio yibuwa yi bana ba Bufumu, anka nkonongo nyi bana ba wawa mubi;

³⁹Winyi a mushikwa beiminyine nyi Satana; kūmbula nyi kunfudilo kwa hanohansenga; abakūmbula nyi bamwikeilu.

⁴⁰Anka bibakongwelwe nkonongo na kushika kālo, anka biabia aukekala ku kunfudilo kwa hanohansenga.

⁴¹Mwan’a Muntu akatumu bamwikeilu be, n’abo abakalamuna bintu bioso mu Bufumu bwe abikokosha, n’abo abakitshi bubi;

⁴²Abakelwa mwilungu dia kālo, amukekala kudila na kwisuma kwa meno.

⁴³Henyihaha balulame abakahenyahenya bu nguba mu Bufumu bwa Nshyabo. E na matwi a kuhusha, ahushe.

⁴⁴Dimonyi, Bufumu bwa mwiilu nyi bubahwandjikile ku bia bineme bifwame mwifuba; binyi, habibasokwelwe na muntu, abebifīle, na ha mwanda wa kwibisehela, ēnde, ahane bioso biadi n’abio, akaule efuba diadia.

⁴⁵Dimonyi, Bufumu bwa mwiilu nyi buhwandjikile na musungia bintu akimbi mabwe aneme;

⁴⁶E, habamwene’nyi kabwe kamune ka mūlo wi bukoho, bayile na kuhana bintu bie bioso mu kuula’ko.

⁴⁷Dimonyi, Bufumu bwa mwiilu nyi buhwandjikile na bukondja bubēlwe mu kalunga-ka-mema, bubakongwelwe ya bihaso bioso.

⁴⁸Bwinyi, habubaule abebukakile ku bukunkula kwa mema, abashalele, abakongwele yibuwa kwilela mankuhi, anka yibubi abayisumbwile.

⁴⁹Anka biabia abikekala kunfudilo kwa hanohansenga; bamwikeilu abakatuku, abakalamuna bebubi be munkatshi mwa balulame;

⁵⁰Abakebēle mwilungu dia kālo; amukekala kudila na kwisuma meno.

⁵¹Yesu bebambile’shi; nubashingula yino myanda yoso’nyi? abamwalulwile’shi: uolo Mwanana.

⁵²Henyihaha E bebalungwile’ shi: Binyibiabia oso mufundji-a-mikanda amulambukishwe bu mulondji ku Bufumu bwa mwiilu ’muhwandjikile muntu sha nshibo, atusha bia buneme bwe abia bihya na bikulu.

⁵³Binyibiabia kibakitshinwe’shi, a habahudisha Yesu yino miele, e bakatukile kwanka.

⁵⁴Habafikile mu nsenga ye, bebalambukishe mu kitumbwilo kiabo, biabia abakanyine’shi: Au bātshile kano kalolo na bino bikitshino bia bilengeleshi kwi kunyi?

⁵⁵Uno tafundji a mabaya’nyi? Tabatemuna nyin’e bu Madiya’nyi? na bakwabo ta ba Yakoba, na Yosese, na Shimona, na Yudasa’nyi?

⁵⁶Na bankashan’e boso, tabe n’etu kuno su? Binyibiabia a uno’u e na bino bintu bioso kwi kunyi?

⁵⁷N’abo abakokweshwe ha mwanda w’e. Anka Yesu bebalungwile’shi: Mutemuki takutwa kinemo, ooo, anka mu nsenga yabo, na mu nshibo yabo.

⁵⁸E takakitshina kwanka bilengeleshi bibungi, mwanda wa lushīlukumino lwabo.