Read songe Mateo 14 Bible Online

Mateo 14 - songe bible

Mateo 14

¹Mu aa mafuku (nfumu) kilolo Heloda, bahushishe ntumbo ya Yesu;

²bakwile kwi bafubi be’shi: Uno nyi Yoano mubatshishi basangukile ku lufu: biabia bikitshino bia bukome abimwekyelwa mwadi.

³Mwanda Heloda bahwile kukwata Yoano kala, bamwanyine, bamwelele mu nshibo ya lukano ha mwanda wa Helodiasa, mpian’a mukwabo Fidipa.

⁴Mwanda Yoano badi mulungule’shi: Nyi kishila kumuata.

⁵Na habakyebele kumwihā, batshine kibumbu, mwanda’bo abamutemwine bu mutemuki.

⁶Anka hakubafikile efuku dia kusehela kwa kutandwa kwa Heloda, mwana mukashi a Elodiasa badi ashimasha munkatshi mwa’bo, baseheshe’shimba dia Heloda.

⁷Ha uno mwanda batshihile mutshiho’shi; Nankakuha kioso kiotekye.

⁸N’e, badi mulungudibwe kwi nyin’e kwibedi’shi: Ompe anka hano, mutwe wa Yoano mubatshishi mwilonga.

⁹Biabia eshimba dia nfumu dibafitshile; anka ha mwanda wa mutshiho we, n’ababadi bashale n’e ha bidibwa, bakamikile’ shi; muhe’yo.

¹⁰Batakwile, bakukatshiba mutwe wa Yoano mu nshibo ya lukano.

¹¹Mutwe we ubafishishwe h’elonga, ubahelwe kwi nsongwakashi; n’e beufwishishe kwi nyin’e.

¹²Henyihaha balondji be abafikile, abātshile mbidi, abeishikile, abayile mu kulungula Yesu.

¹³Habeuhushishe Yesu, bakungulukile hanka mu bwato, mpaa namu kabāka ka ku luhese; habeuhushishe bibumbu, bibatukile mu bibalo, bibamulondele mu ngwa.

¹⁴Yesu batukile mbwato, bamwene kibumbu kikata, bakwatshibwe na kanye kakishekishe kwabadi, bahashishe basha masungu.

¹⁵Hakufika kiolwa kukilutokena, bana be-ba-bukishi abafikile kwadi’shi; hano nyi kihindji kia kabāka, nguba namu bende; halakasha kibumbu kiabadia kwenda mu bibalo mu kwiudila biakudia.

¹⁶Anka Yesu bebalungwile’shi: Ta be na kia bakatukila, anwe nwibahe biakudia.

¹⁷Abo abamwalulwile’shi: Twi n’anka mitanda ya mikate itano, na mishiha yibidi kuno.

¹⁸E bambile’shi: Nwiifwishei kwandji’mi.

¹⁹Balungwile kibumbu kushala ha nyoe; bātshile mitanda ya mikate yitano, na mishiha yibidi, batadile kwiilu, beitekyele mwabi, beitshokwele, bahele mitanda ya mikate kwi bana be-ba-bukishi, na bana ba-bukishi beihele kibumbu.

²⁰Na boso abadīle abekwite; abasangwile bia bifingifingi bibashele, bisele bwikumi na bibidi.

²¹N’abo abadīle babadi bana balume bu binunu bitano, na bana bakashi na bana namu.

²²Kahindji n’aka Yesu banyishishe bana babukishi kukekila mbwato, na kubadila kumpala kwe ku adi’eshia, mpa n’ahabahalakeshe bibumbu.

²³Habadi ahalalasba bibumbu, bakamine ku ngulu buhenka bwe mu kuteka Efile; habafikile kiolwa kwi lutokena, badi kwanka buhenka.

²⁴Anka bwato binobino bubadi munkatshi mwishiba, bu batenkatenka na mambundambunda (a mema), mwandaluhahi lubadi aluhukuma kumpala.

²⁵Ha kilo kia kananka kia bufuku, Yesu bayile kwabadi, atambuka hanundu ha mema.

²⁶Bana ba-bukishi, habamumwene atambuka hanundu ha mema, abakwetwe na katshima munda’shi; Nyi kikudi; abasamine kudila ha mwanda wa moo.

²⁷Anka Yesu kahindji n’aka bebambile’shi; Sangulushai mashimb’enu, n’ami uno, tanutshinanga moo.

²⁸Henyihaha Petelo bamwālulwileshi; A Mwanana, su n’obe, ondungule nfikye k’odi ha mema.

²⁹Bamulungwile’shi: Fikanga; Na Petelo hababukile mbwato batambukile hanundu ha mema, tende kwi Yesu.

³⁰Anka habamwene luhahi lubadi aluhukuma, bakwatshilwe na moo; na hakubanga kwitshika, belele musase’shi: A nfumwa’mi, mpashe’mi.

³¹Kahindji n’aka Yesu bōlwele mboko, bamukwete, bamulungwile’shi: Aeee! Obe sha lukuluhilo luhela, a ha kinyi hodi na mealasheno?

³²Habayikile mbwato, luhahi lubalekeshwe.

³³Henyihaha abo babadi mbwato abafikile, abamulangwile’shi; Binyibinyi, obe we mwan’Efile-Mukulu.

³⁴Habadi abuka adi’eshia, abafikile ku nsenga ya Ngenasalete.

³⁵Habamwiukile bantu b’alwa luhese, abatumine ku nsenga yaiya yoso yifunye, abamufwishishe boso abakumbu kubofula kwa mbidi.

³⁶Abamusendele’shi; tukume anka mutelo wa kifwalwa kie; na boso abamukumine babadi bahashibwe mpaa.