Read songe Mateo 15 Bible Online

Mateo 15 - songe bible

Mateo 15

¹Henyihaha abafikile kwi Yesu Bafundji-ba-mikanda, na Bafadiseo, baba ba mu Yelusalema, eshi:

²A nkinyi bana bobe ba bukishi abashula lungalunga lwa bakulu, mwanda tabeoshā māsa habadile bidibwa?

³Ank’e bebālulwile’shi: A nkinyi anwe namu anushula mulangilo w’Efile-Mukulu na lungalunga lwenu?

⁴Mwanda Efile-Mukulu bakamikile’shi: Nemekai shobe na nyin’obe; dimo’nyi’shi; Yawa akaa nshye sunga nyina afwe lwinyi lufu.

⁵Ank’anwe’shi: Muntu ese akākula kwi nshye su kwi nyin’e: Kintu kiokyebanga kutambula kwandji’mi, tankia mulambu kw’Efile.

⁶E namu tanemeka nshye sunga nyin’e (akekala bu muluñantu) Biabia nyi mwa nushilwilwa mulangilo w’Efile-Mukulu ku lungalunga lwenu.

⁷Anwe bansesa, Esaiye benutemukidile’nwe biya’shi:

⁸Bano bantu abefubula kwandji’mi na mukanwa mwa’bo, aba’nemeka na milomo yabo, anka eshimba diabo di kula n’ami.

⁹Anka abandangwila bu bisumanga, kwete kulambukisha lulambukisho, yingi milangilo ya bantu.

¹⁰Baitanyine kibumbu, bebalungwile’shi: Hushai, nushingule:

¹¹Kushī kiakia akitwele mukanwa akīlwisha muntu, ooo; anka kiakia akituku mukanwa nyi akilwisha muntu.

¹²Henyihaha bana be-ba-bukishi abafikile, abamwihwishe’shi: Twemwiuka’shi, Bafadiseo babadi abakokolwe habadi abehusha uno mwanda?

¹³Anka e bebālulwile’shi; Mutshi woso ushī ukunwe na Shami a mwiilu aukashudibwa.

¹⁴Nwibalekye, abo mbampofu, bakunkushi ba bampofu; biabia su bampofu abakunkusha bampofu, bubidi bwabo abakahono mbwina.

¹⁵Binyibiabia Petelo bamwālulwile’shi; Etuhatulwile uno mwele.

¹⁶Yesu bambile’shi: Anwe namu nukī bashī bashingulwe su?

¹⁷Tanukī beuke’shi, bioso abitwela ’mukanwa abiende mwifu, abisumbulwa mu nkumbu?

¹⁸Anka’bia bintu abituku mukanwa abifiki kwishimba, n’abio abilwisha muntu.

¹⁹Mwanda kwishimba akutuku binangu bibi, matombo, masandji, makyebanokyebano, bwifi, misambo ya madimi, bakānyi-ba-milomo.

²⁰Nyi bino bintu abilwisha muntu; anka kudia biakudia na māsa ashī eoshwe, ta kulwisha muntu, ooo.

²¹Henyihaha Yesu bakatukile kwanka, bayile mu mpese ya Tyile na Sidono.

²²Henyihaha talangai, mwana mukashi mwina Kanana bakatukile mu yaya mpese, bamwele musase’shi: Onfwile lusa, Mwanana, mwan’a Dafidi, mwana’nde mukashi bamweshwa malwa na mukishi ubi.

²³Anka e tamwalule sunga kishima; Na bana be-ba-bukishi abafikile, abamusendelele’shi: Mutume, mwanda etudidila’twe.

²⁴Anka e bālulwile’shi; Nki mutuminyibwe, anka ku mikoko yishimine ya ku nshibo ya Bena Isalele.

²⁵Binyibiabia bafikile, bamulangwile’shi: A Mwanana, onkwashe’mi.

²⁶Anka e bamwālulwile’shi; Tankuhwandji kile kuata mampa a bana, na kwisohela kwi mbwa.

²⁷Anka e bamwālulwile’ shi: A Nfumwami mbinyibinyi, anka sunga mbiabia mbwa ayidi bifingifingi ayihono ku mesa kwa nfumu ayo.

²⁸Henyihaha Yesu bamulungwile’shi: A mwana-mukashi, lukuluhilo lwobe ndukata akikukitshinwe’nka mo kyebela. Na mwan’e mukashi badi muhashishwe ank’akia kihindji.

²⁹Yesu bakatukile kwanka, befubwile hehi na kwishiba dia Ngadilea; bakamine ha ngulu, bashalele hanka.

³⁰Bibumbu bikata abifikile kwadi, babadi n’abo basha bilema, bampofu, tumama, balemane, na bangi be bungi namu, bebatudile hashi ku ngwa ya Yesu; n’e bebahashishe.

³¹Nyi h’anka biabia kibumbu kia bantu abakanyine, habamwene tumama atwakula, na balamane tabadi musangyelo, basha bilema kutambuka, na bampofu abatala: Biabia abatumbishe Efile-Mukulu a Isalele.

³²Henyihaha Yesu baitanyine bana be-ba-bukishi kwadi e eshi: Nyi na kanye ku kibumbu, mwanda abashala n’ami binobino mafuku asatu, tabe na biakudia namu; tankebatakula na nsala, tala bakahungila mwishinda.

³³Bana beba-bukishi abamulungwile’shi: Atumono kwi kunyi mampa e bungi muno mahia a bisumanga, mwa kwikutshisha kibumbu kikata ki bino’nyi?

³⁴Yesu bebehwishe’shi: A nwi na mampa anga? Abamwitabile’shi: musambobidi na kisoselo kia tushiha.

³⁵E bakamikile kibumbu kushala hashi.

³⁶Bātshile mitanda ya mampa musambobidi na mishiha, batumbwile Efile-Mukulu, beitshimwine, beihele bana-beba-bukishi, n’abo kwi kibumbu.

³⁷Boso abadīle, abekwite; abasangwile ku bifingifingi bibashele bisele musambobidi biule ndaa.

³⁸Abo abadīle babadi balume bu binunu binanka, na bakashi na bana namu.

³⁹Biabia bahalakene kibumbu, bayikile mbwato, bafikile ku bukunkula kwa Mangadala.