Read songe Mateo 18 Bible Online

Mateo 18 - songe bible

Mateo 18

¹Ha yinyi nsa bana-ba-bukishi abafikile kwi Yesu’shi: Mu Bufumu bw’Efile-Mukulu, a mukile bukata nanyi?

²Yesu betanyine mwana mukinga kwadi, bamutudile munkatshi mwabo;

³eshi; Binyibinyi, nenulungula’shi: Su tanwi bālule mashimba kwikala bu bana bakinga, tanukatwele mu Bufumu bwa mwiilu, ooo.

⁴Binyibiabia muntu oso akehelesha bu uno mwana, e winyi mukile bukata mu Bufumu bwa mwiilu.

⁵Na muntu oso atambula mwishina diande umune bu uno’nyi, antambula’mi.

⁶Anka muntu oso akakokosha umune a bano bana abakumina mwandji’mi, nkikile buwa kwi’wa (muntu)’ shi, ebwe dia kuhela bukula dimwanyine ku nshingo ye, eshīkye mu bula bwa mema-akata.

⁷Mpombo kwi bahanohansenga, ha mwanda wa biakukokosha! Mwanda biakukokosha tabikakutwa kufika; anka mpombo kwi yawa akebifwisha.

⁸Binyibiabia su easa diobe, sunga lwā lwobe abikokosha, webitshibe, webisumbule; mwanda nkikile buwa obe kutwela mu muwa na kishetshi sunga nkilema, na he kwikala na māsa abidi, sunga ngwa yibidi, na kwelwa mu kālo ka ikalaika.

⁹Su eiso diobe adikukokosha, editongobole, wedisumbule, mwanda kutwela mu muwa n’eiso dimunenka, nkikile buwa kwedibwa mu kālo ka Ngehena na meso abidi.

¹⁰Dimukai, tanubendanga umune a bano bana, mwanda nenulungula’shi: Mwiilu bamwikeilu babo ababandjile mafuku oso mpala ya Shami e mwiilu.

¹¹Mwanda Mwan’a Muntu bafwile mu kuhasha kibadi kishimine.

¹²Anwe anutentekyesha naminyi? Su muntu e na mikoko lukama, ahakashimina umune, takalekye yaya yi makumi kitema na mikoko kitema, ēnde mu mangulu mu kukimba wawa batuhilw’eshinda su?

¹³Na su akeumono, binyibinyi nenulungula’shi: Akakidi kusehela ha mwanda w’awa mukoko, na he yaya yi makumi kitema na kitema yishī badi yishimine.

¹⁴Anka biabia namu, eshimba dia Shyenu e mwiilu tadikakyebe’shi, umune ā ku bano bana bakinga akashimina, ooo.

¹⁵Dimonyi, su mukwenu akakusola mwanda, wende, omulungula kusola kwe, obe n’e bubidi bwenu buhenka; su akakuhusha, biabia bohu kumwobesha.

¹⁶Anka su e akahele nkuhusha, wende na mungi su bangi babidi, eshi, ’mukanwa mwa tumonyi tubidi su ntusatu, bishima bioso abikashimata.

¹⁷Su e akahele kwibahusha, olungula kikofieno ki’Efile; anka su akahele kuhusha kikoñeno ki’Efile, ekale bu musendji na bu musangishi-a-milambu kodi’be.

¹⁸Binyibinyi nenulungula’shi: Kioso kianukānya hano hashi, akikānyibwa mwiilu; na kioso kianukahosola hano ha nsenga, akikāhosolwa mwiilu.

¹⁹Dimonyi nenulungula’shi: Su babidi bwēnu anukalombana hano ha nsenga ha kintu kioso kianutekye, akikenukitshinwa kianka kwi Shami e mwiilu.

²⁰Mwanda habakekoñena mwishina diande su mbabidi su mbasatu, biabia ami nyi munkatshi mwabo.

²¹Binyibiabia Petelo bafikile kwadi, eshi, A Nfumwami, mukwetu akansola mwanda misusa yinga n’ami kumulekyela? mpaa na misusa musambobidi su?

²²Yesu bamwālulwile’shi; Ami tankulungula’shi, mpaa na ku misusa musambobidi, ooo, anka mpaa na ku misusa makumi musambobidi.

²³Binyibiabia Bufumu bwa mwiilu mbuhwandjikila na nfumu badi akyebe kulumbula na bahika be.

²⁴Hababangile kubadika, umune badi mufwishwe kwadi e badi n’e kishio kia ntalenta bu binunu ekumi.

²⁵Anka ha mwanda tabadi n’abio kufuta, Nfumu e bakamikile’shi: Bibuwa aulwe, na mpian’e na bana be, na bioso bibadi n’abio, eshi afute kishio.

²⁶Biabia yawa mpika bahonene hashi, bamulangwile’shi: A Mwanana ekale n’ami lwishinko, n’ami nankakufuta bioso.

²⁷Henyihaha nfumu a winyi mpika bakwatshilwe na kanye, bamuhoswele, bamulekyele kishio.

²⁸Anka winyi mpika bakatukile, bahetele mungi mpika n’e, badi n’e kishio kia nfalanga ya ndenadi bu lukama; e bamukwatshile, bamufinyine lukono’shi: Nfute kibonahwile.

²⁹Mpika n’e bahonene hashi ku ngwa ye, bamusendele’shi: Ekale n’ami lwishinko, n’ami nankakufuta bioso.

³⁰Ank’e batunyine, bayile, bamwele mu nshibo ya lukano, mpaa na hādi akafuta kishio.

³¹Biabia habamwene bangi bahika n’e mubakitshinyinwe, abenyengyele ’mashimba, abafikile kulungula Nfumwabo bioso bibadi bikitshinwe.

³²Henyihaha Nfumu e hakumwitanyine, bamulungwile’shi: Obe mpika mubi, nakulekyela kiakia kishio kioso, mwanda bonyiyayile.

³³N’obe namu tobodia kufwila mpika n’obe lusa, mu nakufwidile lusa’nyi?

³⁴Biabia nfumu e badi na nsungu, bamufwishishe kwi ba kumwesha malwa, mpaa n’ahakafuta kishio kioso.

³⁵Anka biabia namu akikenukitshinwa kwi Shami e mwiilu, su anwe mu mashimb’enu, tanukalekyela bakwenu kusola kwa myanda yabo, muntu na mukwabo muntu na mukwabo.