Read songe Mateo 19 Bible Online

Mateo 19 - songe bible

Mateo 19

¹Bitabibakitshine, habahwile Yesu kwakula yino myanda bakatukile ku Ngadilea, batwelele mu mpese ya Yudea, adi’eshia dia Yodano.

²Bibumbu bikata bibamulondele, E bebahashishe hanka.

³Bafadiseo namu abafikile kwadi, babamutompele’shi: Nyi nkishila muntu kubinga mpian’e su mpa mwanda kinyi, su mpa mwanda kinyi su?

⁴E bebālulwile’shi: Tanwi babale’shi: Yawa bebahangile ku mbangilo, bebahangile bu mulume na mukashi?

⁵Bambile’shi: Ha uno mwanda mulume akalamunuka nshye na nyin’e, akalamata kwi mpian’e, na bubidi bwabo abakekala tambidi yimune?

⁶Biabia tabakī babidi, ooo, anka bu mbidi yimune. Binyibiabia akia kibalungile Efile-Mukulu muntu takumanga kwikitshiba, sunga ngumune.

⁷Abamwambile’shi: A binyibiabia, mwanda kinyi Mosesa bakamikile’shi: Bibuwa bamuhe mukanda wa kuhwisha bulunda, na kumukatusha?

⁸Bebālulwile’shi, ha mwanda wa bukoho bwa mashimb’enu, Mosesa bakuminyine’nwe kukasha bakashi benu, anka ku mbangilo takubadi biabia, ooo.

⁹N’ami nenulungula’shi: Muntu ese akasha mpian’e, anka su ha mwanda wa lukyebanokyebano akabamba mungi, biabia basolo mwanda w’ebasa: ese muntu namu abamba mukashi mutushwe biabia basolwe ebasa namu.

¹⁰Bana-be-ba-bukishi abamulungwile’shi: Su mwanda wa mulume na mukashi wi biabia, kubamba takwi buwa.

¹¹Anka E bebalungwile’shi: Bantu boso tabeuku kutambula uno mwanda, anka baba beuhebwe.

¹²Mwanda kwi batungulwe abatandjibwe biabia mpaa na ku mafu a banyin’abo; kwi bamo batungulwe namu, abakitshinwe biabia kwi bantu; kwi batungulwe namu abekitshine abo banabene bu batungulwe ha mwanda wa bufumu bwa mwiilu. E, euku kutambula uno mwanda atambule’o.

¹³Henyihaha bana bakinga babidi abamufwishishwe’shi, atentekye māsa mu kwibatekyela; anka bana-ba-bukishi abebatosheshe.

¹⁴Anka Yesu bambile’shi: Kuminai bana bakinga, tanwibatoshanga kufika kwandji’mi, mwanda bufumu bwa mwiilu nyi anka bu abo.

¹⁵E bebatentekyele māsa, bakatukile kwanka.

¹⁶Talangai, umune bafikile, bamwihwishe’shi: Mulambukishi e buwa, nankakitshi kinyi kibuwa kia kumwena muwa wa ikala-ika?

¹⁷Bamwālulwile’shi: A nkinyi kiontemwina’mi bu ebuwa? Takwi ebuwa, anka umune, yawa Efile-Mukulu; Anka s’okyebe kutwela mu muwa, olame nyi bishila.

¹⁸Bamwambile’shi: A bishila kinyi? Yesu bambile’shi: Twehanga muntu, twendanga lusandji, twibanga, todimbilanga mukwenu madimi.

¹⁹Nemeka shobena nyin’obe; Okafule mukwenu kifulo bu’be na mwinyi.

²⁰Yawa nsongwalume bamwakwile’shi: Bino bioso nebilamine mpaa na ku bukinga bwande; kiandji mukutwe nkinyi?

²¹Yesu bamulungwile’shi: S’okyebe kwikala mulombashwe mpaa, nd’okahane bioso biodi n’bio, okebihe balanda, biabia biokikamona bineme mwiilu; ofikye, ondonde.

²²Anka nsongwalume habeuhushishe, bakatukile n’eshimba difite fututu; ha mwanda badi na buheta bwi bungi.

²³Henyihaha Yesu balungwile bana-be-ba-bukishi’shi: Binyibinyi nenulungula’shi: Kwi bukoho muntu mpeta kutwela mu Bufumu bwa mwiilu;

²⁴Na dimonyi nenulungula’shi: nkikilekubofula (nyama) ngamedia kutwela mwiiso dia shindanyi, na he muntu mpeta kutwela mu Bufumu bwa mwiilu.

²⁵Bana be-ba-bukishi, hababeuhushishe, abakanyine bikata, tabamwihusha’shi: A biabia akahanda nanyi?

²⁶Anka Yesu bebatadile swee, bebalungwile’shi: kino nkikambilwe na bantu, anka kw’Efile-Mukulu bintu bioso abiuku kukitshibwa.

²⁷Binyibiabia Petelo bamwālulwile’shi: Talanga, atwe tubalekye bioso, tubakulondo; A biabia atukatambula kinyi?

²⁸Yesu bebalungwile’shi: Binyibinyi nenulungula’shi: Anwe abandondo baba mwifuku dia kuhangilwadimo, ahakashala Mwan’a Muntu ha luhun’a nsulu lwe lwa ntumbo, anwe namu anukashala ha mpun’a nsulu ekumi na yibidi, anukatshibila myanda ya bisamba ekumi na bibidi bia bena Isalele.

²⁹N’ese muntu akuleka mashibo e, su mbakwabo balume su mbakwabo bakashi, su nshye, su nyina, su mpian’e, su bana, su nsenga, ha mwanda w’eshina diande, akatambula bifwime misusa lukama, akahyana namu muwa wa ikala ika.

³⁰Anka be bungi ba kwibedi abakekala kunyima; na ba kunyima abakekala bu ba kwibedi.