Read songe Mateo 2 Bible Online

Mateo 2 - songe bible

Mateo 2

¹Binyibiabia habatandjilwe Yesu mu Beteleme a Yudea, mu mafuku a nfumu Heloda, talai, kubafikile basha binangu kw’Esete ku Yelusalema;

²abo’shi: A yawa mutandjibwe nfumu a ba Yudea, e kwi kunyi? Mwanda tubamwene lwenyenye lwe mu Esete, nyi biatubafiki kumulangwila.

³Habahushishe nfumu Heloda yino myanda, bakalakeshwe mwishimba, na boso mu Yelusalema hamune.

⁴Habakongwele batshiite-bakwidi bakata, na bafundji-ba-mikanda ba bantu hamune, bebehwishe’shi: Kutandwa kwa Kidisitu: akukekala kwi kunyi?

⁵Abamulungwile’shi: Mu Beteleme a Yudea, mwanda bibafundjilwe biabia kwi mutemuki’shi:

⁶Obe Beteleme, nsenga ya Yuda, twemukilwe buhela munkatshi mwa bana-buwa ba Yuda, mwanda akukatuku munkatshi mwobe kimankinda, e akalela Bena Isalele bantu bande.

⁷Henyihaha Heloda, habaitanyine basha binangu ku bufyefye, bebashikulwile binyibinyi habamwekyele lwenyenye.

⁸Biabia e bebatumine ku Beteleme’shi: Ndai, nukokole mwana yawa biya, hanubahu kumumona, nufikye kundungula, nyende nkamulangwila namu.

⁹Habahushishe nfumu, abakatukile, talai, lwenyenye lwabamwene ku Esete lubayile ku mpala kwabo, mpaa na kwimana mbula bwa habadi mwana.

¹⁰Habamwene lwenyenye abasehelele na kusangala kwi moo.

¹¹Habadi abatwele mu nshibo, abamwene winyi mwana toka na Madiya nyin’e, biabia abakunamine manwi hashi, tabamulangwila; na hababāngwile bia bineme biabo, abamulambwile bia-buntu bia kilonda kia nsahabu, na bia mahembwe, na bia malashi.

¹²Anka habadimwinwe kw’Efile Mukulu mu kilotwa’shi: Tanualukilanga kwi Heloda, abakatukile, bayile ding’eshinda ku nsenga yabo.

¹³Habayile, talai, mwikeilu a Yehowa bamwekyele kwi Yosefe mu kilotwa’shi: Buka, ata mwana mukinga na nyin’e, nusukye ku Ndjihitu, okekale kwanka mpaa na hankakulungula mwanda: mwanda Heloda akyebe kufwila mwana mu kumwihā.

¹⁴Hababukile, bātshile mwana na nyin’e bufuku, bayile n’abo ku Ndjihitu.

¹⁵Baikele kwanka mpaa na habafwile Heloda, biaudia kukumbashwa ubakwilwe kwi mutemuki mwanda wa Yehowa ’shi: Mu Ndjihitu nyi mu naitanyine Mwan’ande.

¹⁶Henyihaha Heloda, habamwene basha kalolo abamuhesha, bakwete nsungu yikalabale, batumine, baihayile bana balume boso ba mu Beteleme na mu mpese yoso; ba bihwa bibidi na abalobele bihwa bibidi, mulombene mubaihwishishe basha kalolo ku kihwa kiakia,

¹⁷biabia bibakumbashwa bibatemukile Yelemiye’shi:

¹⁸Eyi dibahushishwe mu Lama, kitumo kimoo na kudila mālo; Letyele badidi bana be, ahele kusambibwa, mwanda bana tabe kwanka.

¹⁹Anka habafwile Heloda, talai, mwikeilu a Yehowa bamwekyele kwi Yosefe mu kilotwa mu Ndjihitu,

²⁰eshi: Huka, ata mwana mukinga na nyin’e, wende mu nsenga ya Isalele; mwanda’bo abakimbi muwa wa mwana mukinga tabafwile.

²¹Biabia babukile, bātshile mwana mukinga na nyin’e, abafikile mu nsenga ya Isalele.

²²Anka habahushishe’shi, Akeleusa bahyana mu bufumu bwa nshye Heloda mu Yudea, bamwene moo kwenda kwanka: Binyibiabia, badimwinwe mu kilotwa kw’Efile Mukulu, bayile dingi eshinda ku mpese ya Ngadilea.

²³Biabia bafikile, babombele mu kibalo kibatemunwe bu Nasaleta, biaudia kukumbashwa bibatemukile na batemuki’shi: Akaudikwa mwina Nasaleta.