Read songe Mateo 21 Bible Online

Mateo 21 - songe bible

Mateo 21

¹Hababefubwile hehi na ku Yelusalema, na hakufika ku Betehaje, ku ngulu ya Olefeta, biabia Yesu batumine balondi be babidi,

²Bebalungwile’shi: Ndai mu’kia kibalo kinutadīle, na binobino anukahete mpunda mushitshikwe, na mwan’e: nwiishitule, nwiifwishe kwandji.

³Su muntu enwihusha, numulungule’shi: Nfumu e yi kyebe; na binobino akeyitakula.

⁴Bino bioso bibakitshinwe’shi, kikumbashwe kiakia kibākwilwe kwi mutemuki’shi:

⁵Lungulai mwana mukashi a Siona eshi: Talai, Nfumwobe afiki kodi’ be, muhohele, mutentame ha mpunda, na mwan’e;

⁶Bana ba-bukishi abayile, abakitshine bibebalungwile Yesu,

⁷Abafwishishe mpunda na mwan’e, abeyitentekyele mitwelo yabo, abamwinamishe hanka.

⁸Kibumbu kikata kibadishe mitwelo yabo mwishinda, bangi namu abatshokwele mahuhwa a mitshi, abādishe mwishinda.

⁹Bibumbu bibadi abiende ku mpala, na kimo kibamulondanga, bibēle musase’shi: Hosana kwi Mwan’a Dafidi; Mwabi kwi yawa afiki mwishina dia Yehowa. Hosana mwiilu!

¹⁰Binyibiabia habadi atwele mu Yelusalema, kibalo kioso kibaungakene’shi: A uno nanyi?

¹¹Kibumbu kibakwile’shi: Uno nyi Yesu, mutemuki a ku Nasaleta mu Ngadilea.

¹²Henyihaha Yesu batwēlele mu ntempelo y’Efile-Mukulu, babingile boso abadi abahana na kuula mu ntempelo, baubikile mesa a bashintudi ba nfalanga, na bishalelo biabahananga nkudimba.

¹³E bebalungwile’shi: Kibafundjilwe’shi: Nshibo yande ayikatemunwa bu nshibo ya nteko; anka’nwe nubeialula bu mwa kwikoñgyela bangifi.

¹⁴Biabia bampofu na balemane abafikile kwadi mu ntempelo; E bebahwishishe.

¹⁵Anka habamwene batshiite-bakwidi bakata na bafundji-ba-mikanda, binyi biakukanya bikata bibakitshine, na bana bakinga namu abadi abele musase mu ntempelo’shi: Hosana kwi Mwan’a Dafidi; abakwatshile nsungu yi moo.

¹⁶Abamwambile’ shi: Bohusha biabākula 31 A nanyi a baba babidi bakitshine abikyebele eshimba dia su? Yesu bebālulwile’shi: Uolo; tanwibabale’shi: Mu kanwa mwa bana bahela na bana bakiabōmwa boloñamisha milangwilo su?

¹⁷Bebalekyele kwanka, bakatukile mu kibalo, bayile mu Betane, balele mwanka.

¹⁸Namashika habadi āluka mu kibalo, nsala yibamukwete.

¹⁹Habamwene mutshi wa kikūku mwishinda, behengyele kwaudi, beusañene bisumanga, anka mabishi; beulungwile’shi: Tokaha bikuba mpaa na kwikala-ika; anka henyiha mutshi wa kikūku ubaumine’nka hoo.

²⁰Habeumwene bana-be-ba-bukishi, abakanyine’shi; A ee, mutshi wa kikūku ubaumu lubilo biabia na minyi?

²¹Yesu bebālulwile’shi: Binyibinyi nenulungula’shi: Su nwi na lukuluhilo, na kushī kwalashena mwishimba, tanukakitshi anka bu bibakitshinwe ku mutshi wa kikūku, anka anukalungula namu yino ngulu’shi; yikatushwe, yiedibwe mwishiba, biabia akikakitshibwe.

²²Bintu bioso namu bianukatekye na lukuluhilo, anukebitambula.

²³Henyihaha, habatwelele mu ntempelo, batshiite-bakwidi bakata, na bakulu ba bantu abafikile hadi habadi alambukisha, tabamulungula’shi: Ku matalwa kinyi okitshi yino myanda? A nanyi bakuhele ano matalwa?

²⁴Yesu bebālulwile’shi: Ami namu nankenwihusha mwanda umune, biabia su anundungula, ami namu nankenulungula hamune kubatukile matalwa’nde a kukita yino myanda.

²⁵A lubatshisho lwa Yoano lubatukile kwi kunyi? Kwiilu, su nkwi bantu? Abo abanangushene bana bene’shi, Su atwakula’shi, kwiilu, biabia aketualula’shi; A nkinyi biabia tanwibamukumine?

²⁶Anka su atwakula’shi, lubatukile kwi bantu, biabia atutshinyi bantu; mwanda boso abahwandjikisha Yoanobu mutemuki.

²⁷Biabia abamwalulwile’shi: Tatwiuku. E namu bebalungwile’shi: Ami namu tanyinulungula kubatukile matalwa ande a kukita yino myanda.

²⁸Anka nutentekyesha kinyi? Muntu badi na bana balume babidi; bafikile kwi akwibedi, eshi; A mwanande, nda lelo ku mufubo mwifuba dia nfinyo yande.

²⁹E bālulwile’shi: Tanende, ooo. Anka kumongo bālulwile’shimba die, bayile.

³⁰Bafikile namu kwi ākabidi, bakwil’anka hamune. E bālulwile’shi: Eyo Mwanana, nende;

³¹anka tamwende, oooshye? Abamwambile’shi, Ank’awa a kwibedi. Yesu bebalungwile’shi Binyibinyi nenulungula’shi: Basangishi-ba-milambu na basha masandji bana bakashi, abenubadidilā’nka kutwela mbufumu bw’Efile-Mukulu.

³²Mwanda Yoano bafikile kwanudi mwishinda dia kululama, ank’anwe tanwibamukumine, ooo; anka basangishi-ba-milambu na basha masandji bana bakashi abamukuminyine, n’anwe hanubeumwene, tanwibelangye ku mashimba kumongo’shi, bianudia kumukumina, ooo.

³³Hushai ungi mwele; Kubadi muntu kampanda, sha nshibo, bakunyine efuba dia nfinyo, bedifunyishe luhoho lwa mitshi ayimene, babundwile mwanka kiengyelo baibakile nshibo kia kwengyela bikuba, yila, bu musūngo, bedilekyele balami, bayile ku nsenga yibadi kula.

³⁴Habafikile kihindji hehi kuha bikuba, batumine bahika be kwi badjimi mu kuata bikuba biadio.

³⁵Anka badjimi abakwete bahika be, umune abamukuhile, mungi abamwihayile, mungi’nyi abamwashile mabwe.

³⁶Dimonyi, batumine bangi bahika, bakile bakwibedi bungi, abebakitshine’nyi anka hamune.

³⁷Kumongo, batumine mwan’e eshi, abakanemeka mwan’ande.

³⁸Anka badjimi, habamwenene mwan’e, abelungushene’shi: Au nyi mpianyi e, twende tumwihē tumwate buhyanyi.

³⁹Henyihaha abamukwete, abamukatushe mwifuba dia mitshi ya nfinyo, abamwihayile.

⁴⁰Biabia ahakafiki shē’fuba, akakitshi na minyi na baba badjimi?

⁴¹Abamwalulwile’shi, Akalwisha baba bantu babi na malwa e moo, akalekye’fuba die kwi bangi badjimi, baba benyi abakamuha bikuba mu bihindji biabio.

⁴²Yesu bebalungwile’shi: A tanwi babale mu Bifundwe bi’Efile’shi: Ebwe dibahēlwe kwi babaki ba nshibo, di na mwinyi dibāluluka tamutwe w’ehaka. Nyi Yehowa bakitshine kino, nyi kia kukanya ku meso kwetu?

⁴³Binyibiabia nenulungula’shi: Bufumu bw’Efile-Mukulu abukenwatshibwa, abukahebwa namu kwi ungi mwilo aulia bikubabia’o.

⁴⁴Muntu ese akahono ha dino ebwe akatshokolwa; anka muntu ese adikahona, adikamuhondakasha bu bukula.

⁴⁵Habahushishe Batshiite-bakwidi bakata, na Bafadiseo miele ye, abashingulwile’shi; n’atwe balungula.

⁴⁶Anka habadi abakyebe kumukwata, abatshinyine kibumbu, ni wanda boso abadi abamuhwandjikisha bu mutemuki.