Read songe Mateo 24 Bible Online

Mateo 24 - songe bible

Mateo 24

¹Biabia Yesu batukile hasha, bālamunukile ku ntempelo; bana-be-ba-bukishi abafikile kwadi mu kumulesha ngibako ya ntempelo.

²Yesu bebehwishe’shi: Tanumono bino bintu bioso? binyibinyi nenulungula’shi: Takukashala hano ebwe dimune ditentekwe ha dikwabo adikakutwa kwalamunwa hashi.

³Habadi mushale ha ngulu ya Olefeta, bana-be-ba-bukishi abafikile kwadi ku bufiefie’shi: Etulungule ahakafiki bino bintu? na kinyi akikekala kitundwilo kia kufika kobe, na kia kunfudilo kwa bahanohansenga?

⁴Yesu beoālulwile’shi: Dimukai tanōngolwanga na muntu;

⁵mwanda be bungi abakafiki mwishina diande’shi: Ami nyi Kidisitu. Abakōngola be bungi.

⁶Anukahusha myanda ya ngoshi na nkumo ya ngoshi; Tanwikalanga na katshima munda, mwanda (bino) bintu bioso tabikakutwa kufika, anka kunfudilo tankubandjile kufika.

⁷Mwanda mīlo na mīlo ayiketukena ngoshi, na mafumu na mafumu. Akukekala minanga, na bihuha bia masungu, na nsenga ayikatenkatenka mu bihindji na bihindji.

⁸Bino bioso nyi kibangilo kia bishiotshi.

⁹Henyihaha abakenufisha ku malwa, na kwi nwihā; anukashikībwa na mīlo yoso ha mwanda w’eshina diande.

¹⁰Biabia be bungi abakakokolwa, abakehulukishena muntu na mukwabo, muntu na mukwabo, na kwishikwena.

¹¹Batemuki ba madimi be bungi abakēbō, abakōngola be bungi.

¹²Na ha mwanda wa kushiula kwa bishila akukakamba, kifulo kia be bungi akikatāla.

¹³Anka yawa akanyingamana mpaa na kunfudilo e akahanda.

¹⁴Na uno mukāndu wibuwa wa bufumu bw’Efile-Mukulu aukalungulwa hanohasenga hoso bu bulungudi bwa bu kamonyi ku mīio yoso; henyihalia kunfudilo akukafiki.

¹⁵Biabia hanukamono kikubendwa kia musadi, kibākwilwe kwi Danyele mutemuki, kimane mu mbalo yilamunwe yi-kishi’a (yawa abala ashīngule);

¹⁶Henyihaha be mu Yudea basukile ku mangulu.

¹⁷Yawa e ha musaka wa nshibo tayikye mu kutusha kintu ki mu nshibo ye.

¹⁸Sunga yawa e mwifuba tālukanga mu kuata bifwalwa bie, ooo.

¹⁹Mpombo kwabadi basha maīmi, na kwi baba abōmesha bana mu ā mafuku!

²⁰Anka nutekye (Efile-Mukulu’shi), kusuka kwenu takukekala ha kihindji ki’eshiho, sunga h’efuku dia Sabado;

²¹Mwanda henyihaha akakekala kufwambuka kukata kushyahwandjikishwa na kungi, kuatshila ku kibangilo kia hanohansenga, mpaa na binobino, ayoyo, sunga ku mpala kwikala-ika takukafiki.

²²Biabia su ā maf’uku tabadi atshibībwe, takubadi akuhanda muntu, sung’umune: anka ha mwanda wa basangudibwe, ā mafuku akatshibibwa.

²³Binyibiabia su muntu ese akenulungula ’shi: Talai, Kidisitu biadi’bi; sunga’shi: E biadi’biaa; tanumukuminanga.

²⁴Mwanda baKidisitu ba madimi abakēbō, na batemuki ba madimi, abakalesha bitundwilo bikata na biakukanya; na kōngola sunga basangudibwe su mbiabia takukutwa kukitshibwa.

²⁵Talai, tampwile kwinulungula kwibedi,

²⁶Binyibiabia, su abakenulungula’shi: Talai, E ha mahia a kabāka, tanwendanga kwanka; Talai, ngiu e mu tudimbo tufwame, tanukuminanga.

²⁷Mwanda bu luhenyo lwa mpeshi alufu ku kihindji akitunduka nguba, na kuhenya mpaa na kwa kuhona nguba, anka biabia namu nyi abikekala kufika kwa Mwan’a Muntu.

²⁸Mwanda hoso hekale bitānda-bifwe, anka haha ahakakoñena mpungwe.

²⁹Anka henyiha hakufudila ha malwa a ā mafuku, nguba akafitshi, mweshi namu taukatoko, nyenyenye ayikatukuka mwiilu, na bia bukome bia mwiilu abikatenkatenka,

³⁰Henyihaha kitundwilo kia Mwan’a Muntu akikamweka mwiilu; biabia mīlo yoso ya hanohansenga ayikadidi; ayikamono Mwan’a Muntu afiki ’makumbi a mwiilu na bukome na ntumbo yikata.

³¹Biabia akatumu bamwikeilu be n’eyi dikata dia mpungi, abakakongola basangulwe ku mpese yinanka ya luhahi, ku nsongo yimune yēilu mpaa na ku yingi nsongo.

³²Binobino ambulai mwele wa mutshi wa kikuku; ha lutabi lwao lukī lubofule, na hakushihuka mabishi, nwiuke’shi mpeshi tadi hehi.

³³Biabia anwe namu hanukamono bino bioso, nwiukye’shi, e tadi hehi, mpaa na ha kibelo.

³⁴Binyibinyi nenulungula’shi: Kano kankwatamanwi takakakidi mpaa n’ahakakumbana bino bintu bioso.

³⁵Eilunansenga abikashimina, anka myanda yande tayikakidi; ooo.

³⁶Anka ha mwanda w’adi ’efuku, na yaya nsaa, takwi muntu ebiuku, ooo, sunga bamwikeilu be mwiilu; anka Shami, kubahu.

³⁷Anka mubadi mwikele mafuku a Noa, anka biabia namu nyi a mukekala kufika kwa Mwan’a Muntu.

³⁸Mwanda anka mubadi mwikele aa mafuku abadi kwibedi kwa kiino kia mpeshi, babadi abadyi na kutoma; babadi ababamba, babadi ababambibwa, mpaa n’ahabafikile efuku dibatwelele Noa mbwato bukata.

³⁹Tababadi beukye mpaa n’ahabafikile kiino kibebashimishe boso; Anka biabia namu nyi a bikekala ha kufika kwa Mwan’a Muntu.

⁴⁰Ku kiakia kihindji babidi abakekala mwifuba, umune akātshibwa, mungi akalekibwa.

⁴¹(Banabakashi) babidi (abakekala) abahele kwibwe; umune akātshibwa, mungi akalekibwa.

⁴²Binyibiabia tengelai, mwanda tanwiuku nguba ayikafiki Nfumwenu.

⁴³Anka nwiukye kino’shi; su sha nshibo beukile kihindji akikafiki ngifi, badia kutala (biya), tabadia kukumina nshibo ye kutubulwa.

⁴⁴Binyibiabia anwe namu nwikale bēmane; mwanda mu nsa yianushyanutentekyesha, Mwan’a Muntu akafiki:

⁴⁵A biabia, a nanyi mpika a kishima na binangu batudilwe nanfumu e bu mulami a ba ku nshibo ye, kwibaha bidibwa ha kihindji kihwandjikile?

⁴⁶Mwabi kwi yawa mpika akakitshi bino ahakamusañana nfumu e hakwakula.

⁴⁷Binyibinyi nenulungula’shi: Akamutulu bu mulami a bintu bie bioso.

⁴⁸Anka su yawa mpika ntubi ahwandjikisha mwishimba die’shi: Nfumwami bakutwa kufika bukidi;

⁴⁹akabanga namu kukuhila bahika n’e, na kudia na kutoma n’abakolwa (malofu).

⁵⁰Biabia nfumu a yawa mpika akafiki mu’di’efuku diashyamutengyela, na ha nsa yiashyeuku;

⁵¹Akamutshibi bihindji bibidi, abakamutula kihindji kie hamune na bansesa: akukekala kudila na kwisuma kwa meno.