Read songe Mateo 25 Bible Online

Mateo 25 - songe bible

Mateo 25

¹Henyihaha Bufumu bwa mwiilu abukahwandjikile bakashi tumama ekumi, abātshile matāla’bo, abatukile mu kutundaisha mubambi.

²Batano b’abo abadi na kalolo, batano abadi balekane.

³Baba babadi abalekane abātshile matāla’bo, tambēle mwimu mwanka.

⁴Anka baba basha kalolo abayile na mwimu mu biasa biabo na matāla’bo kumune.

⁵Habayishishe mubambi, boso tababunguta, balale tulo.

⁶Ha nkilonkatshi kia bufuku kubēlwe musase’shi: Talai, mubambi a mukashi ngiu wafiki, ndai mu kumutundayila.

⁷Biabia baba bakashi tumame abebwele, abalumbulwile matala’bo.

⁸Balekane abatekyele baba basha kalolo’shi: E tuhei umo mwimu wenu, mwanda matāla etu akyebe kushima.

⁹Anka basha kalolo abālulwile’shi: Ayoyo, tala taukalombana kuutwe n’anwe; anka ndai kwi’ba ahana, nukeudile’nwe bana bene.

¹⁰Anka habāyile mu kuula, mubambi bafikile; na baba abadi balumbulwe abatwelele n’e mu bidibwa bi’ebambo; na kibi kibashitshilwe.

¹¹Kumongo, bangi bakashi tumame abafikile’shi: A Mwanana, a Mwanana, etushitwile.

¹²Anka e bālulwile’shi: Binyibinyi nenulungula’shi: Ta nyi nwiuku’nwe, ooo.

¹³Binyibiabia hasukai, mwanda tanwiuku efuku, sunga nsa ahakafiki Mwan’a Muntu.

¹⁴Mwanda (bufumu bwa mwiilu) mbuhwandjikile bu muntu ha luendo ku nsenga yi kula; baitanyine bahika be, bebahele bintu bie.

¹⁵Bahele umune ntalenta yitano, kwi mungi yibidi, umo’nyi yimune; kwi muntu ese bu muhunda kalolo ke; kahindji n’aka bayile luendo lwe.

¹⁶Biabia yawa batambwile yitano, bayile mu kusungula n’ayo, befwimishe yingi yitano n’ayo.

¹⁷Yawa namu batambwile yibidi, bafwimishe yingi yibidi.

¹⁸Anka yawa batambwile yimune bayile, babundwile mu nsenga, beyifile mono ya nfumwe.

¹⁹Habayishishe kihindji kikata, nfumu a baba bahika bafikile, babadikile n’abo (bintu bie).

²⁰Biabia yawa batambwile ntalanta yitano, bafikile, bafwishishe yingi ntalanta yitano’shi; A nfumwami, bompele ntalanta yitano; Tala, nafwishisha n’ayo yingi ntalanta yitano.

²¹Nfumwe bamulungwile’shi: Obe shobe bolumbula, mpika mulumbulukye a kishima; bodi na kishima mu bintu bihela, nankakutulu bu mulami hanundu ha bintu bi bungi; twel’obe mu muloo wa nfumwobe.

²²Yawa namu batambwile ntalanta yibidi bafikile’shi; A Mwanana, bompele’mi ntalanta yibidi; tala nafwimisha n’ayo yingi yibidi.

²³Nfumwe bamulungwile’shi: Obe shobe bolumbula, mpika mulumbulukye a kishima; bodi na kishima mu bintu bihela, nankakutulu bu mulami hanundu ha bintu bi bungi; twel’obe mu muloo wa nfumwobe.

²⁴Henyihaha yawa batambwile ntalanta yimune bafikile’shi: A Mwanana, neukile’shi, obe e muntu ebukoho, oumbula hashī mumine, okōngola namu hoshī muhalakashe;

²⁵N’ami nadi na moo, nayile, nafya ntalanta yobe mu nsenga; talanga, ngiyi yodi n’ayo yaya nginyi yobe.

²⁶Nfumwe bamwālulwile’shi: Obe mpika e bubi mulekane, bweukile’shi, naumbula hanshī mumine, nakongolā namu hanshī muhalakashe;

²⁷Bodia kutula biabia mono yande kwi bashintudi, biabia ami, hakutika hande, nadia kusañana yande na yaya yibasungulwile.

²⁸Binyibiabia, mumanei ntalanta kwadi, nwiyihei yawa e na ntalanta ekumi.

²⁹Mwanda kwi muntu ese e n’abio akahebwa (bingi), e namu akekala na bifwimi; anka kwi’wa shī n’akio, akamañunwa’kia kiadi n’akio.

³⁰Nuele yawa mpika a bisumanga hasha he mufito fututū; akwa akukekala kudila na kwisuma meno.

³¹Ahakafiki Mwan’a Muntu mu ntumbo ye, na bamwikeilu boso balamunwe-be-kishila n’e, henyihaha akashala ha luhun’a nsulu lwa ntumbo ye:

³²Mīlo yoso ayikakongolwa ku mpala kwe; E akebalamuna halahala, bu mulami alamuna mikoko ku mbushi.

³³Akatulu mikoko ku mboko ye yibalume, anka mbushi ku mboko ye yibakashi:

³⁴Henyihaha Nfumu akalungula be ku mboko ye yibalume’shi: Fikai anwe basha mwabi kwi Shami, nuhyane bufumu bubenulumbulwilwe ku mbangilo kwa hanohansenga.

³⁵Mwanda nadi na nsala, nubampele biakudia; nadi na nyota, nubampele biakutoma; nadi mwenyi, nubankukile;

³⁶nadi musekenyi, nubamfwadikile, nadi na busungu, nubafikile kuntompa; nadi mu nshibo ya lukano, n’anwe nubafikile kwandji’mi.

³⁷Henyihaha balulame abakamwalula’shi; A nfumu, efuku kinyi diatubakumwene na nsala, twakudisha? sunga na nyota, twakutomesha?

³⁸Kihindji kinyi kiatuba-kumwene bu mwenyi, twakukukila? sunga musekenyi, twakufwadisha?

³⁹Na kihindji kinyi kiatubakumwene na busungu, sunga mu nshibo ya lukano, twafika kukutompa?

⁴⁰Ntumu akebālula’shi: Binyibinyi nenulungula’shi: Anka mwanubakitshinyine kwi umune a bano mukile kihēla kwi’ba bakwetu, biabia nubankitshinyine’mi.

⁴¹Henyihaha akalungula be ku mboko yibakashi’shi: Katukai kwandji’mi, anwe bēlwe muloa, mpaa na mu kālo ka ikala-ika, kabalumbulwilwe diabola na bamwikeilu be;

⁴²Mwanda nadi na nsaia, tanubampele biakudia; nadi na nyota, tanu bampele a kutoma,

⁴³nadi mwenyi, tanwibankukile; nadi muswa tanwibanfwadisha; nadi na busungu, na mu nshibo ya lukano, tanwibafikile kuntala, ooo.

⁴⁴Henyihaha abo namu abakamwalula’shi; A Mwanana, efuku kinyi diatuba, kumwene na nsala, sunga na nyota, su bu mwenyi, sunga muswa, su mbusungu, su mu nshibo ya lukano, n’atwe tatwibakukwashie?

⁴⁵Henyihaha E akebālulwila’shi; Binyibinyi nenulungula’shi: Anka mwanushībakitshine kwi umune a bano mukile kihela, biabia tanwibankitshine’mi, ooo.

⁴⁶Binyibiabia bano abakēnde mu malwa a ikala-ika; anka balulame (abakatwele) mu muwa wa ikala-ika.