Read songe Mateo 26 Bible Online

Mateo 26 - songe bible

Mateo 26

¹Binyibiabia bitabibakitshine habahwile Yesu (kwakula) yino myanda yoso, balungwile bana-be-ba-bukishi’shi:

²Anwiuku’shi, ahakidi mafuku abidi nyi kidibwa kia Paque na Mwan’a Muntu akehulukibwa mu kwihayibwa ha mutshi uhingakane.

³Henyihaha batshiite bakwidi-bakata na Bafundji-ba-Mikanda, na bakulu ba bantu, abekoñene hamune kwibalasa kwa tshiite-mwakwidi mukata, aitanyinwa bu Kaifasa.

⁴Tabahwandjikisha mu kukwatshila Y’esu ku bufyefye, mwa kumwihayila.

⁵Anka abakula’shi: Kushī h’efuku dia bidibwa bia kusehela bia Yehowa, tala eunga’diakatuku munkatshi mwa bantu.

⁶Habadi Yesu mu Betane mu nshibo ya Shimona, sha kifwi,

⁷Kubafikile kwadi mwana mukashi na mulangye wa mwimu wa mulashi wibuwa bukalabale buneme; beuhongolwele ha mutwe he habadi mushāle ha bidibwa.

⁸Anka bana-be-ba-bukishi habeumwene, babakwete nsungu, eshi; A kunu kushimisha nkwa kinyi?

⁹Mwanda uno mwimu ubadia kulombana kuhana ku mono yibungi, na kuhelwa balanda.

¹⁰Habeuukile Yesu, bebalungwile’shi; A nkinyi kianukalakasha mwana mukashi? mwanda e bankitshine mufubo wibuwa.

¹¹Mwanda’nwe nwi na balanda n’enu mafuku oso, anka’mi nki n’enu mafuku oso.

¹²Mwanda hakumpongolwela uno mwimu ha mbidi hande, e beukitshine ha mwanda wa kushīkwa kwande.

¹³Binyibinyi nenwamba’shi: Kosokoso akukalungulwa uno mukāndu wibuwa hanohansenga hoso, akukalungulwa namu kino kibakitshi uno mwana mukashi, takidi bu kiakumutentekyēsha.

¹⁴Henyihaha umune a mu b’ekumi na babidi, ētanyinwe bu Yudasa Isakadiota, bayile kwi batshiite-bakwidi-bakata,

¹⁵bebalungwile’shi: A nkinyi kia nukyebe kumpa, n’ami musokwela kwanudi? Abo abalombashena ne ku mono ya nfalanga bu makumi asatu.

¹⁶E babangile ku diadi’efuku kukimba mwadia kumwihulukila.

¹⁷H’efuku dia kwibedi dia (bidibwa bia kusehela) mampa ashī na kitatusho, bana-be-ba-bukishi abafikile kwi Yesu, tabamwihwisha’shi: Okyebe tukakulumbulwile kodi okudila kudibwa kia Paque kwi kunyi?

¹⁸E bebalungwile’shi: Ndai mu kibalo kwi muntu kampanda, nukamulungula’shi: Mulambukishi amba’shi: Kihindji kiande takidi hehi, nankadila kobe kidibwa kia Paque nabana-bande-ba-bukishi.

¹⁹Banaba-bukishi babakitshine anka mu bebalungudile Yesu; abalumbulwile kidibwa kia Paque.

²⁰Binyibiabia habafikile kiolwa kia bufuku, bashelele na b’ekumi na babidi.

²¹Habadi tabadi, bakwile’shi: Binyibinyi nenwamba’shi: Umun’ēnu akangihuluka kīhuko.

²²Biabia abafitshile ’mashimba, ababangile kumwihusha umune umune’shi: A nami su, Mwanana?

²³E bālulwile’shi: Yaw’asunu nami mboko ye mu kihulu, n’e winyi akangihuluka.

²⁴Mwan’a Muntu ēnda’nka mwa kibamutundjilwe; anka mpombo kwi yawa muntu amwihulukila kīhuko, bibadi buwa kwi yawa muntu su tamutandwe.

²⁵Henyihaha Yudasa winyi bamwihulukile kīhuko, bālulwile’shi: A Mulambukishi, a n’ami winyi su? E bamulungwile’shi: N’obe bākula.

²⁶Biabia habādi abadi, Yesu bātshile dimpa beditekyele mwabi, editshokola, ediha bana-ba-bukishi’shi: Tambulai, nudie; dino nyi mbidi yande.

²⁷Bātshile’nyi ekoho, editumbwila Efile Mukulu’ shi; Nutome’dio anwe boso.

²⁸Mwanda ano nyi mase ande a kilombeno kihya, āsumbukila bebungi, mwanda wa kulekyelwa kwa milwisho.

²⁹Ank’ami nenulungula’shi: Tankatomo dimonyi ku bino bikuba bia nfinyo, mpaa na ku diadi’efuku diankeyitomo n’enu, tangihya mu bufumu bwa Yaiya.

³⁰Biabia habahwile kuyimba lono, abakatukile, benda ku ngulu a Olefeta.

³¹Henyihaha Yesu bebalungwile’shi: Anwe boso anukakokoshwa ha mwanda wande buno bufuku; mwanda ngufundjibwe’shi: Nankakuhila mulami ayo, na mikoko ya mu lombe ayikahalakashwa kungi.

³²Anka hampu kusanguka (ku lufu) dimo, nankenubadidila ku Ngadilea.

³³Petelo bamwālulwile’shi: Sunga boso abakakokoshwa ha mwanda w’obe, ami tankakokoshwa sunga mpahela, ooo.

³⁴Yesu bamulungwile’shi: Binyibinyi nakulungula’shi: Buno bufuku, kwibedi kwa kusamina kw’etombole, okantunu misusa yisatu.

³⁵Petelo bamwalulwile’shi: Sunga nadia kufwa n’obe, tanadia kukutuna ayoyo. Bana-ba-bukishi boso abakwil’anka hamune.

³⁶Henyihaha Yesu bafikile n’abo aha hantu ahalumbibwa bu Ngetesemane, biabia e bambile bana-ba-bukishi’shi: Hanyiende ’kwa mu kuteka, anwe namu nushale hano.

³⁷E bayile na Petelo, na benyi bana babidi balume ba Sebede, babangile kufwambuka na kwikala n’eshimba dibushito di moo.

³⁸Henyihaha bebalungwile’shi: Eshimba diande dibakamba kwinyongola mpaa na ku lufu; Ikalai hano, nutengyele n’ami.

³⁹Binyibiabia bayile ku mpala kihindji kihi, babandamine mpala ye hashi, tatekye’shi: A Yaiy’ande, su nkilombane, kihulu kino kinkile’mi, anka bishī bu mwankyebela, ooo, anka mokyebela’be.

⁴⁰Biabia bafikile kwi bana-be-ba-bukishi, bebasānene balale mu tulo, bambile Petelo’shi: A nkinyi, nubakutwa kutengyela hamune n’ami, sunga nsa yimune?

⁴¹Hasukai, nutekei, tala nwakatwela mu kutompibwa; eshimba binyibinyi di na musanku, anka mbidi ngibofule.

⁴²Bayile kihindji diakabidi, batekyele’shi: A Yaiya’nde, su kihulu kino takiuku kunkila’mi, anka su nyi nkitome kianka, nyi mwamukyebel’eshimba diobe bikitshibwe mwanka.

⁴³Biabia bafikile kwi bana-ba-bukishi bebasañene balale mu tulo dimo, mwanda meso abo abadi bushito bibi.

⁴⁴Biabia bebalekyele, bayile dimo, batekyele diakasatu, bakwile bishima bioso hamune.

⁴⁵Henyihaha bafikile kwi bana-be-ba-bukishi, bebalungwile’shi: Lalai binobino shenu nwikishei, talai, nsa yibafiki’shi, Mwan’a Muntu behulukilwe kīhuko ku maasa a basodi ba myanda

⁴⁶Ebwei, twendei, talai winyi akungihuluka tadi hehi.

⁴⁷Biabia habadi kiakula, Yudasa, umune a mu b’ekumina-babidi, bafikile na kibumbu kikata kitwale mpete ya ngoshi na tubongye; kibatuku kwi batshiite-bakwidi bakata na kwi bakulu ba bantu.

⁴⁸Binyibiabia winyi bamwihulukile bebahele kitundwilo’shi: Yawa’nyi fifiena n’e ku milomo, nyi E; numukwate biya.

⁴⁹Kahindji n’āka bafikile kwi Yesu, tamwamba’shi; Nankuseme! Labi! befifiene n’e.

⁵⁰Yesu bamwambile’shi: A kūku, bofwilakinyi? Henyihahaabo abolwele maboko kwi Yesu, abamukwatshile abayile n’e.

⁵¹Talai, umune’ābo babadi na Yesu bōlwele mboko ye, batushishe luhete lwe lwa ngoshi, batahile mpika a tshiite-mwakwidi-mukata, bamutshibile etwi die.

⁵²Binyibiabia Yesu bamulungwile’shi; Alusha luhete lwobe mu kihusula kiakio, mwandā’bo boso abasomona luhete lwa ngoshi, abakalwila na luhete lwa ngoshi.

⁵³Otentekyesha’shi, ami tañuku binobino kwitanyina Shami, E namu akantumina bamwikeilu kukila binunu makumi musambobidi na bibidi su?

⁵⁴A biabia, Bifundwe bi’Efile abikakumbashwa na minyi’shi, anka biabia nyi mbihwandjikile kwikala nyi?

⁵⁵Ha yawa nguba Yesu balungwile bibumbu bia bantu’shi: A nubatuku na mpete ya ngoshi na tubongye mu kunkwata, bu biabakwata ngifi su? Kwifuku n’efuku nashalele n’enu nkwete kulambukisha mu ntempelo, n’anwe tanwibankwate.

⁵⁶Anka bino bioso bibakitshibwe’shi: Bifundwe bi’Efile bia batemuki bikumbashwe. Henyihaha bana-be-ba-bukishi boso babamulekyele, tabasuku.

⁵⁷Abo babakwete Yesu abamukunkwishe kwi Kaifasa, tshiite-mwakwidi mukata’ nyi kubebungīle bafundji-bamikanda na bakulu.

⁵⁸Anka Petelo bamulondele kulākula, mpaa na ku luhoho lwa tshiite mwakwidi mukata, batwelele, bashalele hamune na bafubi’ shi: Ntala kwabifudila.

⁵⁹Biabia batshiite-bakwidi bakata na bakulu, na kikoñeno kioso kia kimu, babakimbile tumonyi twa madimi kuhonesha Yesu mu kumwihā.

⁶⁰Anka tambamone ooo: Sunga tumonyi twa madimi twibungi tubafikile, tambamone, ooo. Kunyima, kubafikile tumonyi tubadi twa madimi’shi:

⁶¹Uno (muntu) bambile’shi: Neuku mwa kushindjila ntempelo y’Efile-Mukulu na kwībaka dimo mu mafuku asatu.

⁶²Biabia tshiite-mwakwidi mukata bebwele, tamwambashi: Obe tōlula mwanda su? A uno (mwanda) wi na minyi aukuhatula tumonyi?

⁶³Anka Yesu bauminyine nyaa. Binyibiabia tshiite-mwakwidi mukata bālulwile, bamulungwile’shi: nakutshihila mutshiho kw’Efile-Mukulu a muwa ami’shi, wetulungule su n’obe Kidisitu Mwan’Efile-Mukulu.

⁶⁴Yesu bamwalulwile’shi: Obe bohu kwakula: anka nenulungula’shi: Ahakayisha kihindji anukamono Mwan’a Muntu mushale ku mboko yibalume ya bukome, afiki namu ha makumbi a mwiilu.

⁶⁵Henyihaha tshiite-mwakwidi mukata besanwine bifwalwa bie’shi: E bahu kukā Efile-Mukulu, a nkinyi kiatukimbila tungi tumonyi? talai, binobino nubahusha kukā kwe.

⁶⁶Anwe namu anutentekyesha na minyi? Babālulwile’shi: E muhwandjikile lufu.

⁶⁷Henyihaha abamufidile mata mu mpala mwe, abamukuhile bikonyi; bangi tabamukuhila nsasu’shi:

⁶⁸Obe Kidisitu etuhatulwile bakukuhila nanyi?

⁶⁹Petelo badi mushale hasha mu luholio; henyihaha kitumwanga bafikile kwadi’shi: Obe namu bodi na Yesu a ku Ngadilea.

⁷⁰Anka e batune ku mpala kwa boso’shi: Tanyiuku na kinyi kiokula’ki, ooo.

⁷¹Habadi atuku mpaa na ku kishikamino, mungi (kitumwanga) bamumwene, tākula na babadi n’abo kwanka’shi: Na uno namu badi na Yesu a ku Nasaleta.

⁷²Batune dimonyi na kutshiha’shi: Tañuku yawa muntu.

⁷³Habayishishe kihindji abo babadi bemane hehi, habefubwile hehi, abakwile kwi Petelo’shi: Binyibinyi obe we anka’bo, mwanda kwakula kobe kubakutundusha.

⁷⁴Henyihaha e babangile kwela muloa na kutshiha’shi: Yawa muntu tamwiuku, ooo. Kahindji n’āka etombole dibasamine.

⁷⁵Biabia Petelo batentekyeshe mwanda ubakwile Yesu, ubamulungwile’shi: Kwibedi etombole tadiasamine, obe okantunu kasatu. Henyihaha e batukile hasha, badīle bikata.