Read songe Mateo 27 Bible Online

Mateo 27 - songe bible

Mateo 27

¹Habubatokyele tanamashika, batshiite-bakwidi bakata boso na bakulu ba bantu, abebungile hamune ku lukuku lwa kukimba mwa kwihayila Yesu.

²Habamwanyine, abayile n’e, abamufwishishe kwi mutontshi mukata hanundu ha bakwabo, Pontyusa Pilato.

³Biabia Yudasa, winyi bamwihulukile kīhuko, habamwene badi muhīshwe, belangile mwishimba die, bālwishe dimo binyi bihindji bia nfalanga ya nfedha makumi asatu kwi batshiite-bakwidi bakata na bakulu,

⁴eshi, nasolo mwanda hakwihuka kīhuko ki mase a muntu shī na mwanda. Abo abamwālulwile’shi; A wawa mwanda ngwetu su? n’obe na mwinyi a kutala wawa.

⁵Binyibiabia basumbwile binyi bihindji bia nfalanga hashi mu ntempelo, bakatukile, bayile akehudika.

⁶Batshiite-bakwidi bakata abātshile bino bihindji bia nfalanga, bamba’shi; tatwibitulanga mu kilambwilo, nyi nkishila, mwanda yino mono ngia mase.

⁷Abeididile lukuku, abeihene kwifuba dia mbūfi, bu mwabadi kushika mwanka bantu bēnyi.

⁸Binyibiabia diadi’efuba dibatemwinwe bwifuba dia mase, mpaa na lelo uno.

⁹Henyihaha bibakumbashwa bibākwile mutemuki (Yelemiya) ’shi; Abātshile bihindji bia nfalanga ya nfedha makumi asatu, nyi winyi mūlo wa winyi abatungile, E, nyi abatungile kwi Bena Isalele ba na bene.

¹⁰Biabia abebihene kwifuba dia mbūfi mubansangwidile Yehowa.

¹¹Yesu baimene ku mpala kwa mutontshi mukata e hanundu ha mukwabo. Henyihaha mutontshi mukata bamwihwishe’shi: Obe we nfumu a Bena Yuda su? Yesu bamwālulwile’shi: Obe tohwa kwibiakula.

¹²Biabia habatewilwe kwi batshiite-bakwidi bakata na bakulu, E tamwibalule mwanda.

¹³Biabia Pilato bamwihwishe’shi: A twemuhushe myanda yibungi yabakuhatūla na yoyi su?

¹⁴E ta mwalule sunga nkishima kimune; biabia mutontshi e hanundu ha bakwabo bakanyine bi moo.

¹⁵Ha bidibwa bia kusehela, mutontshi mukata e ha nundu ha bakwabo, badi na kihikwa kie kia kwibahoswela mwina lukano, ese abakyebe.

¹⁶Babadi kwanka mwina lukano a ntumbo, atemunwa bu Balabasa.

¹⁷Binyibiabia habebungile hamune, Pilato bebehwishe’shi: A nukyebe’nyi nuhoswele Balabasa su Yesu atemunwa bu Kidisitu?

¹⁸Mwanda beukile abamufwishisha ha mwanda wa kiutu.

¹⁹Habadi mushale ha kimu, mpian’e bamutumine eyi eshi: Twekalanga na mwanda sunga mpahelahela na yawa muntu mululame, mwanda lelo uno nafwambuka na bintu bibungi mu kilotwa ha mwanda w’e.

²⁰Anka batshiitebakwidi bakata abanyishishe binyi bibumbu’shi: Nutekye Balabasa, aihe (anka) Yesu.

²¹Mutontshi mukatae hanundu ha bakwabo bebālulwile’shi: A habadi-bubidi bwabō’ha a nyi nuhoswele’nyi? Abakwile’shi: Balabasa.

²²Pilato bebalungwile’shi: Binyibiabia a nakitshi na minyi na Yesu atemunwa bu Kidisitu? Boso abamwambile’shi: Abambībwe ha nkulusu.

²³Biabia mutontshi mukata e hanundu ha bakwabo bambile’shi: A kibubi kibakitshine nkinyi? Ank’abo abanyishishe kwela ntisase’shi: Abambībwe ha mutshi uhingishene.

²⁴Biabia Pilato habamwene bakutwa kwibakambile sunga mpahelahela, anka eunga dibabushwa, e bātshile mema, beosheshe ku maas’e ku mpala kwa bibumbu’shi: Amintshi mwamwa’mi a mase a uno mululame, ooo; talangai wanka anwe bana bene.

²⁵Henyihaha bantu boso abamwalulwile’shi: Enyi mase e akekale kwinyi kwatudi, mpaa na kwinyi ku bana betu.

²⁶Binyibiabia bebahoswelele Balabasa, na habahwīle kukuhila Yesu, bamutushishe mu kubambibwa ha nkulusu.

²⁷Henyihaha basalai ba mutontshi mukata e hanundu ha bakwabo, abayile na Yesu kwibalasa dia winyi mutontshi, biabia bebakongeshe kwadi e kibumbu kioso kia basalai.

²⁸Biabia abamūfule (bilamba) tabamufwadika na mutwelo umonga hyaa.

²⁹Abalukile kilongo kia milobo, abamutentekyele’kio ku mutwe, na mulengye mwiasa dibalume, abakune manwi ku mpala kwe, tabamusengye’shi; Atukwimuna nfumu a Bena Yuda.

³⁰Biabia abamufidile mata, abātshile mulengye, abamukuhila nao ku mutwe.

³¹Habahudisha kumusēnga, abamufudila mutwelo, abamufwadikile bifwalwa bie na bene, abayile n’e kumubamba ha nkulusu.

³²Na hakutuka, abafumankene na mwina Sailene, eshina die bu Shimona: Yawa abamufinyikile kutwala nkulusu ye.

³³Habafikile ku kihindji akitemunwa bu Ngolongota, nyi nkuhatula’shi, kihindji kia kabāla.

³⁴Abamuhele nfinyo yisase, yibasangakenwe na bibulo kutoma; habatompele kutoma beitūne.

³⁵Biabia abamwihā ha nkulusu, abeabishene bifwalwa bie, bakwete kuta (n’abio) bubale, mwakidia kukumbeshwa kibatemukile mutemuki’shi: Baneabishene bifwalwa biande munkatshi mwabo, na bifwalwa biande banebitee na bubale.

³⁶Habadi abashāla abamutadile kwanka.

³⁷Abatūle kunundu kwa mutwe we kitewilo kifundjibwe’shi: UNO NYI YESU A BENA YUDA.

³⁸Biabia, banyenanyi babidi abadi kwanka, ababambilwe n’e, umune ku mboko ye yibalume, mungi ku mboko yibakashi.

³⁹Abo abakidi eshinda tabamufukūle, bakwete kuhuka mitwe’shi:

⁴⁰Obe bodi ofūna ntempelo’shi; Nankeishindji, nankeibaka’nyi mu mafuku asatu, ehashengye obe na mwinyi. Su we Mwan’Efile-Mukulu oikyengye ku nkulusu.

⁴¹Batshiite-bakwidi bakata namu, na bafundjiba-mikanda na bakulu, tabamusēngye’nka hamune, eshi:

⁴²Badi ahasha bangi, (anka) e na mwinyi bakutwa kwīhasha. Su e nfumu a Isalele, ayikengye binobino ku nkulusu, biabia atwe atukamukumina.

⁴³E bakuluhilanga mw’Efile-Mukulu; amuhasliengye binobino, su’mukumine; mwanda e bakwile’shi: Ami nyi Mwan’Efile-Mukulu.

⁴⁴Banyenanyi namu ababambilwe n’e, tabamusēngye anka hamune.

⁴⁵Talangai, kubanga ha nguba mitwe, mpaa na ku nsa yisatu, mufito ubadi ha nsenga hoso.

⁴⁶Henyihaha nsa tayidi hehi na yisatu, Yesu bēle musase ukata’shi: Eli, Eli, lama sabakatani, kuhatula nkwamba’shi: Efile-Mukulu ande, Efile-Mukulu ande, a nkinyi kibonfutala?

⁴⁷Bamo abadi bemane kwanka, habahushisheo, abakwile’shi: Ngiu taitanyina Eleasa.

⁴⁸Biabia kahindji n’āka umune abo bayile lubilo, bakātshile ehondje, bediushishe na nfinyo yisase, beditentekyele ha mulengye, bamuhele kutoma.

⁴⁹Bangi abambile’shi: Bandai kuleka, tutale su Eleasa akafiki mu kumuhasha.

⁵⁰(Biabia) Yesu habēle musase n’eyi di bukoho diakabidi, batūle muwa w’e.

⁵¹Henyihaha talangai, kilamba kibadi kikingwe mu ntempelo kibasanukile bihese bibidi, kubanga kunundu mpaa na kūshi; nsenga yibasanyine, na mabwe abatanyikile;

⁵²Bilele (bia bafwe) bibabulukile, bitanda bia bantu be bungi balulame bibadi bilale mu tulo, bibabushishwe.

⁵³Abatukile mu bilele kumongo kwa lusangukilo lwa lufu lwe, tabende mu kibalo kibahatwilwe kishila, abamwekyele kwi be bungi.

⁵⁴Biabia mulami a basalai lukama, na baba abadi n’abo, abadi abalama Yesu, habamwene kusanasana kwa nsenga ’a yaya myanda yibakitshinwe, abakwatshilwe na moo bibi, babambile’shi: Binyibinyi au ekalanga Mwan’Elile-Mukulu.

⁵⁵Na bana bakashi be bungi abadi kwanka, bakwete kubandjilakula; nyi babalondele Yesu ku Ngadelea kumusamba.

⁵⁶Munkatshi mwabo mubadi Madia Mangadalene, na Madiya, nyin’a Yakoba, na Yosese, na nyin’a bana ba Sebede.

⁵⁷Hakufika kiolwa kia bufuku, muntu mpeta, mwina Adimatea, atemunwa bu Yosefe, e namu badi mwan’a bukishi a Yesu.

⁵⁸Bayile kwi Pilato, batekyele kitanda kia Yesu. Henyihaha Pilato bakamikile’shi: Muhei kianka.

⁵⁹Yosefe, habātshile kitanda, bekihombele mu kilamba kitoka kia linene.

⁶⁰Bekitudile mu nyenyi yihya yibadi mubangule ku lubwebwe; balalesbē’bwe dikata ku kibelo kia nyenyi, bakatukile.

⁶¹Kubadi kwanka Mangadalene na mungi Madiya, abashalele mbulushi na ku kilele.

⁶²Binyibiabia efuku dibadi adilondena n’adia Kilumbulwilo, batshiite-bakwidi bakata na Bafadiseo abebungile kwi Pilato,

⁶³aboshi, A Mwanana, tubatentekyesha’shi; awa sha madimi, habadi kiatala bambile’shi: Mafuku asatu hākakidi, nankabuku dimo.

⁶⁴Binyibiabia ebakamik’obe’shi, lamai kilele kalolo mpaa na kwifuku dia kasatu tala bana be-ba-bukishi bakafika bufuku kumwiba, bakalungula na bantu’shi: Babuku ku lufu. Biabia kōngola kwa kunyima akukakidi kwa kwibedi.

⁶⁵Pilato bebalungwile’shi: Balami nwi n’abo, nwende, nukekinyishe hoo mwanudi beukile bia kunyisha.

⁶⁶Biabia abayile, abanyishishe kilele hoo, abalamikile ñanga kwibwe, na kutula kwanka balami.