Read songe Mateo 28 Bible Online

Mateo 28 - songe bible

Mateo 28

¹Kunfudilo kw’efuku dia Sabado, hakubanga bufuku kutoka, mwifuku dia kwibedi dia lubingo, Madiya Mangadalene na mungi Madiya abafikile kutala ku kilele.

²Biabia talangai, kubadi kusanasana kwa nsenga, mwanda mwikeilu a Yehowa bayikile mwiilu, bafikile, balalesh’ebwe dibadi ku kibelo, bashalele hanka.

³Ha mpala he habadi bu luhenyo lwa mpeshi, bifwalwa bie bibadi bitoka soo bu (niege).

⁴Ha mwanda wa kutshina moo, balami abasushile, abālulukile bu bafwe.

⁵Biabia mwikeilu bālulwile bana bakashi’shi: Tanutshinanga moo, mwanda neuku’shi: Nyi Yesu anukimbi, badi mwihayibwe ha nkulusu.

⁶E te muno, mwanda tahwile kubuka, anka mubadi akula. Fikai nutale amwikalanga mulale Nfumwetu.

⁷Biabia ndai lubilo, nukalungula bana-be-ba-bukishi’shi: E tabukile ku lufu, talangai, ngiawa benubadidila ku Ngadilea; anukamusañana kwanka; talai, nahu kwinulungula.

⁸Biabia abakatukile lubilo ku kilele na moo, na kusangala kukata; abakamine lubilo mu kufisha uno mwanda kwi bana-be-ba-bukishi.

⁹Ank’abo, ha kwenda mu kulungula bana-be-ba-bukishi, Yesu bafumankene n’abo; bakwile’shi: Nenwimunai; Abafikile kwadi, abamukwete ku ngwā, tabamulangwila.

¹⁰Henyihaha Yesu bebalungwile’shi: Ta nwikalanga na moo, ndai, nukalungule bande bakwetu bēnde ku Ngadilea, abakansañana kwanka.

¹¹Habadi abēnde, talangai, bangi ba balami abafikile mu kibalo, tabalubula kwi batshiite-bakwidi bakata bioso bibakitshinwe.

¹²Biabia hakwibungila hamune na bakulu, na hakudia lukūku, abahene mono yibungi kwi basalai, eshi:

¹³Nwamba’shi, bana-be-ba-bukishi abafikile bufuku, abamwibi hatwikalanga balale-tulo.

¹⁴Su uno mwanda aukafiki ku matwi a mutontshi mukata e hanundu ha bakwabo, atukamusendela’shi: tabekekale na mwanda.

¹⁵Biabia abatambwile mono, abakita’nka mwa bebalambukishwe; Yino ntumbo yibafumankene munkatshi mwa Bena Yuda mpaa na lelo uno.

¹⁶Binyibiabia bana-ba-bukishi ekumi naumune abayile mu Ngadilea, ku ngulu yibebalayidile Yesu.

¹⁷Abo habamumwene tabamulangwila: anka bangi babadi na mealasheno.

¹⁸Henyihaha Yesu bafikile, bakwile n’abo’ shi: Katshintshi koso kampebwe mwiilu na ha nsenga.

¹⁹Binyibiabia, ndai, nulambukishe milo yoso, na kwibabatshisha mwishina dia Yaiya, na dia Mwana, na dia Kikudi-E Selelee.

²⁰Nwibalambukisha kulama bioso binenukamikile, biabia talangai, nyi n’enu mafukuoso mpaa na kunfudilo kwa hanohansenga. Amena.