Read songe Mateo 4 Bible Online

Mateo 4 - songe bible

Mateo 4

¹Henyihaha Yesu badi akunkwishwe na Kikudi-E-Selelee mu kabāka, mu kutompibwa na dyabola.

²Na habashīle biakudia mafuku makumi ananka, kanya na bufuku, kumongo badi na nsala.

³Habafikile mutompi-a-munda kwadi, bakwile’shi: Su obe we mwan’Efile Mukulu, kamika’shi, ano mabwe ealule ta ntampa.

⁴Anka e bālulwile’shi: Ubafundjibwe’shi; Muntu takekala na muwa ku mampa anka’o, anka ku bishima bioso abituku kukanwa kw’Efile Mukulu.

⁵Biabia: diabola bamukamishe ku kibalokihatulwe-kishila, bamushadikile ku masaka wa ntempelo.

⁶Bamulungwile’shi: Sue Mwan’Efile Mukulu weihone hashi, mwanda ubafundjibwe’shi: Akakulayila bamwikeilu b’E, abo namu abakakutwala mu maboko abo, tala okakokola lwā lwobe kwībwe.

⁷Yesu bamulungwile’shi: Kibafundjibwe kabidi’shi: Tokatompa Yehowa, Efile Mukulu obe.

⁸Dimonyi diabola bamukamishe ha ngulu mula eyee, bamulesheshe mafumu oso a hanohansenga na ntumbo yao;

⁹Bamulungwile’shi, nankakuha bino bintu bioso s’onkunamine kundangwila.

¹⁰Binyibiabia Yesu bamulungwile’shi: Katuka Satana, mwanda ubafundjibwe’shi: Okalangwila Yehowa, Efile Mukulu obe, anka E okafubila.

¹¹Henyihaha diabola bamulekyele, bamwikeilu abafikile mu kumukwashia.

¹²Habahushishe’shi, Yoano belwa mu lukano, batentulukile ku Ngadilea;

¹³Bakatukile mu Nasaleta, bayile mu kushāla ku Kahanauma, kibalo ki ku bukunkula bw’eshiba, ku mahia a Sebuluna na Nefatale.

¹⁴Biabia kukumbasha bibakwile mutemuki Esaiye’shi.

¹⁵Mahia a Sebuluna, na mahia a Nefatale kw’eshinda di’eshiba dia mema kwishīya dia Yodano, Ngadilea a Badjentaila;

¹⁶Bantu babashēle’mufito babamwene etata dikata, na kwi bantu babashēle mu kihindji na ku mwesheshe wa lufu, etata dibamwekyele.

¹⁷Ku kia kihindji Yesu babangile kulungula’shi; Elangei munda, mwanda bufumu bwa mwiilu butadi hehi.

¹⁸Yesu habatambukile kwishiba dia Ngadilea, bamwene balume babadi ba muntu’mune, Shimone aitanyinwa bu Petelo, n’Andeleyo mukwabo, kwete kwela bukondja’mema, mwanda babadi bampībwe ba mishiha.

¹⁹Bebalungwile’shi, Ndondei, nenwalule nwikale bu bampībwe ba bantu.

²⁰N’abo namu kahindji nāka babalekyele makondja’bo, tabamulondo.

²¹Habadi ende kumpala, bamwene bangi balume babidi, Yakoba mwan’a Sebede, na Yoano mukwabo mu bwato na Sebede shabo; abatelula makondja’bo; E bebaitanyine.

²²Abo, kahindji nāka babalekele bwato na shabo, tabamulondo.

²³Yesu batambukile luhese lwoso lwa Ngadilea, balambukishe mu bitumbwilo biabo, balungwile mukāndu wibuwa wa bufumu bwa mwiilu, bahashishe bihaso bioso bia masungu, na kubofula koso kwa mbidi kwa bantu.

²⁴Ntumbo ye yibahalakene mu luhese lwoso lwa Sidiya; babafikile kwadi E bantu boso babadi abakumbu, babakwatwa na masungu e bungi, na kwinyenga kwa mbidi, na baba bakwatshibwa na mikishi, na baba babadi na mombe, na bangi babadi na busungu bwa kususa, E bebahashishe.

²⁵Biabia bibumbu bikata bibamulondele, bibafikile ku Ngadilea, na ku Dekahodi, na ku Yelusalema, na ku Yudea, na kwishīya dia Todano.