Read songe Mateo 6 Bible Online

Mateo 6 - songe bible

Mateo 6

¹Nudimuke, tanukitanga biabuntu bienu kumpala kwa bantu’shi, benumone, ooo; mwanda su mbiabia tanwi na bwedi kwi Shyenu E mwiilu.

²Binyibiabia hokitshi biabuntu (biobe) ha kuhana, twelanga mpungi kumpala kobe, bu amukitshine bansesa mu bitumbwilo na mu mpata, mwa biadia kutumbishibwa kwi bantu. Nenulungula, binyibinyi’shi, abakwete kutambula bwedi bwabo.

³Anka ha kuhana biabuntu biobe, tweukishanga eyasa diobe dibakashi kikite eyasa diobe dibalume;

⁴Biabia biabuntu biobe bikale ku bufyefye; na Shyobe amono mu bufyefye, na mwinyi akakuha bwedi ha toka.

⁵Hōtekye, twekalanga bu bansesa; mwanda abasehela kwimana mu bitumbwilo na ku masank’a mpata mwa kumwekibwa kwi bantu. Nankulungula, binyibinyi abakwete kutambula bwedi bwabo.

⁶Ank’obe hōtekye, twela mu kadimbo kobe, hobohwile kushita kibi kiobe, otekye kwi Shyobe E mu bufyefye, na Shyobe amono mu bufyefye, akakuha bwedi ha toka.

⁷Anka hanutekye, tanutontomonanga mitontomonyi bisuntanga bu basendji, mwanda’bo abatentekesha’shi, atukahushwa ha mwanda wa kwakula kwetu kwi bungi.

⁸Tanwifwananga’bo, mwanda Shyenu euku abia bintu bianudi n’abio lukalo kwibedi kwa nutekye.

⁹Binyibiabia nutekye anka bino’shi, Yaiya etu E mwiilu, Eshina diobe dishilwe kishila.

¹⁰Bufumu bwobe bufikye. Bikitwe hanoha-nsenga abikyeb’eshimba diobe, bu biabidi bikitshibwe mwiilu.

¹¹Etuhe lelo uno bidibwa bietu kwifuku n’efuku.

¹²Etulekyele kusola kwa myanda yetu bu mwatubalekyela be n’etu kusola kwa myanda.

¹³Twetufishanga mu kutompibwa, anka etumañune ku bubi: Mwanda bufumu nyi mbobe, na katshintshi, na ntumbo, mpaa na kwikalaīka. Amena.

¹⁴Mwanda su anulekyela bantu kusola kwabo, Shyenu a mwiilu namu akenulekyela kusola kwenu.

¹⁵Anka su tanulekyela bantu kusola kwabo, Shyenu a mwiilu takenulekyela kusola kwenu namu.

¹⁶Dimonyi, hanushidi biakudia namu, tanwikalanga bongame bu bansesa, mwanda’bo abanyengye nkyebo yabo bebamone’shi mbashile biakudia. Binyibinyi, nenulungula’shi, abakwete kutambula bwedi bwabo.

¹⁷Ank’obe hōshidi biakudia, shinga mwimu ha mutwe hobe, wetumpe mema ha lukyebo lwobe.

¹⁸Biabia tomweka na lushilo kwi bantu, anka kwi Shyobe e mu bufyefye, na Shyobe amono mu bufyefye akakuha bwedi ha toka.

¹⁹Tanwibombeleshanga buheta buneme hano-ha-nsenga, nyi hanka tubaubau na nkongolo abilwisha, na bangifi abatubwīla kwiba:

²⁰Anka nwibombeleshe buheta buneme mwiilu, mushī tubaubau sunga nkongolo abilwishā, na bangifi bakutubwila mukwiba.

²¹Mwanda, hē buhete buneme bwobe, eshimba diobe adikekala hanka namu.

²²Etata dia mbidi nyi eiso, binyibiabia su eiso diobe adikala sōo, mbidi yobe yishima ngitoshwe n’etata.

²³Anka su eiso diobe dibubi, mbidi yobe yishima ayikaulu mufito. Biabia su etata di munda mwobe di mufito, bukata bwa uno mufito bwi na minyi?

²⁴Ta kwi muntu euku kufubila banfumu babidi, ooo: mwanda su akekala na umune mushikwa, na mungi kifulo, su akalamata kwi umune, akabende mungi. Tanwiuku kufubila Efile Mukulu na buheta hamune.

²⁵Binyibiabia nenulungul’amishi, tanwinyenganga mwanda wa muwa wenu’shi, Atudi kinyi? sunga’shi, atutomo kinyi? sunga mbia mbidi’shi; Atukafwala kinyi? Muwa tangukile bidibwa su? na mbidi tangikile bilamba su?

²⁶Talai tonyi twa mwiilu, mwanda tatukunā sunga kuumbulā, sunga kubomboleshā mu mikulu anka Shyenu a mwiilu etudishā; Anwe tanwibetukile?

²⁷Muntu kinyi a munkatshi mwenu euku kulunga kishisa kie bu centimetre makumi atano’nyi hakwinyenga mwishimba?

²⁸A ha mwanda kinyi namu anukamba kutentekyesha ha bifwalwa? nwambulai ku bilongo bia mahia mwabimena, abio tabifubā, sunga kuluka:

²⁹Anka ’mi nenulungula’shi: Sunga Solomone mu ntombo ye yoso tabadi mufwadikwe bu kimune kia bino, ooo.

³⁰Binyibiabia, su Efile Mukulu afwadika lubishi lwa ku mahia, alo lwi kwanka lelo uno, na maloba alwedibwa mwidingidingi dia kālo, E teuku kukila kwinufwadika su? anwe ba lukuluhilo luhela.

³¹Binyibiabia, tanwinyenganga mwishimba’shi: Atudi kinyi? sunga’shi: Atukatomo kinyi? sunga’shi: atukafwadikwa na kinyi?

³²(Mwanda, bino bintu bioso nyi abikimbi Badjentaila:) Mwanda Shyenu a mwiilu euku’shi, nwi na lukalo lwa bino bintu bioso.

³³Anka kwibedi kimbai bufumu bw’Efile Mukulu, na kululama kw’eshimba kwe, na bino bintu bioso abikenutentekyelwa.

³⁴Binyibiabia, tanwiyenganga mwishimba ha mwanda wa bia maloba; mwanda maloba adikanyenge ha mwanda wa bintu bia’bio. Bubi bwifuku bubalombana bwadio.