Read songe Mateo 8 Bible Online

Mateo 8 - songe bible

Mateo 8

¹Habaikile ha ngulu, bibumbu bikata bibamulondele.

²Talai! kubafikile muntu sha kifwi, bamulangwile’shi, A Nfumu, s’okyebe, weuku kuntosha.

³Yesu bōlwele eyasa di’E, bamukumine’shi: Nankyebe, wekale mutoshibwe. Na kahindji n’āka busungu bwe bwa kifwi bubatoshibwe.

⁴Yesu bamulungwile’shi, Tala! tolungulanga muntu sunga ngumune; anka wende, okeleshe kwi tshiite-mwakwidi, lambula buntu bwobe bubakamikile Mosesa bu kitundwilo ku mpala kwa bantu.

⁵Habatwelele Yesu mu Kahanauma, mulami a basalai lukama bafikile kwadi, kwete kumwiyayila ’shi:

⁶A Mwanana, mufubi ande mulale mu nshibo na busungu bwa mufwe-mbidi, kwete kumona malwa e moo.

⁷Yesu bamulungwile’shi, Nankafiki, nkamuhwisha busungu.

⁸Mulami a basalai bamwalulwile’shi, A Mwanana, nkimuhwandjikil’obe kutwela munda mwa nshibo yande; anka akula’nka n’eyi diobe anka’dio, biabia mufubi ande akahwishibwa (busungu).

⁹Mwanda, ami nyi muntu muhebwa matalwa, nami namu nyi na bashidika ku nyima kwande; nalungula uno’shi, nda, ēnde; na kwi mungi’shi: Fika, afiki; na kwi mpika ande, kita kino’ki, akikitshi.

¹⁰Habahushishe Yesu biabia bakanyine, balungwile babadi abamulondo’shi: Binyibinyi, nenulungula’shi: Nkimumone lukuluhilo lukata hamune luno, ooo, sunga mu Isalele.

¹¹Nenulungula’shi: Bantu be bungi abakafiki ku akutunduka na kuhono nguba, abakashala n’Abalahama na Isaka, na Yakoba mu bufumu bwa mwiilu.

¹²Anka bana ba bufumu abakēlwa ’mufito wi fututu, mukekala kudila na kwisuma kwa meno.

¹³Biabia Yesu balungwile mulami a basalai’shi: Nda kwobe, bu bibokumina, bikukitshinwe k’odi. Na ha nguba yawa mufubi e badi muhashwe busungu.

¹⁴Habatwelele Yesu mu nshibo ya Petelo, bamwene mukwa e mukashi mulale na busungu bwa kālo ku mbidi.

¹⁵Biabia bakumin’eyasa die, na kālo kabamulekyele; biabia e na mwinyi babukile, tebafubila.

¹⁶Hakuhona kwa nguba, babafikile na be bungi abakwatshibwe na bikudi bibi: bebibingile n’eyi di’E, bahashishe boso abakumbu.

¹⁷Biabia kukumbashwa bibākwilwe ku mutemuki Esaiye’shi: Na mwinyi bātshile mikumbo yetu, bātwadile namu masungu (etu).

¹⁸Yesu habamwene bibumbu bikata bibamwifunyine, E bambile’shi: Tukatukyei, twabukyei adi’eshia.

¹⁹Biabia mufundji-a-mikanda bafikile kwadi, bamulungwile’shi: Mulambukishi nankakulondo koso kwende.

²⁰Yesu bamwalulw’ile’shi, miseo yi na mena’yo, tonyi tw’eilu twi na maswa; anka Mwan’a muntu te na hakusamina mutwe (we).

²¹Mungi mwan’a bukishi e bamulungwile’shi: A! Mwanana, onkumina’mi kwibedi nyende mu kushīka shami.

²²Anka Yesu bamwalulwile’shi: Ndonde, olekye bafwe bashīkye batwe babo bana bene.

²³Habaikile mu bwato, bana be ba bukishi abamulondele.

²⁴Talai! kihahi kikata kibabukile h’eshiba; ha uno mwanda, bwato bubaule na mantanki a mbundambunda a mema, ank’e badi mulale mu tulo.

²⁵Bana be ba bukishi abafikile kwadi, abamubushishe’shi: A Mwanana etuhashe ngiu watufu.

²⁶Bebalungwile’shi: A nkinyi kibenukwata mō, ō anwe ba lukuluhilo luhela? Henyihaha bebwele, basashile bihaha na mema’eshiba, na kubafikile anka nyaa talō.

²⁷Bantu balume abakanyine’shi: Au nga kihaso kinyi? Bihahi bi na mwinyi n’eshiba dia mema abimukokyela!

²⁸Habadi mufikile adi’ eshīa mu nsenga ya Bena Ngadalene, kubafumankene n’e bantu babidi babadi bakwatshibwe na bikudi bibi, babatukile ku mashama, babadi bakambe bukyelo, biabia mungi muntu tabadi euku kukila dianka.

²⁹Talai! ab’ēle musase’shi: Obe Yesu Mwan’Efile Mukulu twi n’obe mwanda kinyi? Obe bofiki kwitufwambusha kwibedi kwa kihindji takiabandjila kufika su?

³⁰Kubadi lombe lwa ngulube kula n’abo yikwete kudia.

³¹Biabia, bikudi bibi bibamusendelele’shi; Su etukatushe, etukumine kwenda mu lombe lwa ngulube.

³²N’e bebilungwile’shi: Ndai; habibadi bakatukile bibayile mu lombe lwa ngulube, talai! lombe lwoso lwa ngulube lubabututukile lubilo ha ngalala yimo, yibahone mwishiba, yibafwile.

³³Abo babeyilamanga babasukile, babayile mu kibalo kiabo, babakwile mwanda woso, nao ubakitshinwe kwibo bakwatshibwe na bikudi bibi.

³⁴Binyibiabia, bantu boso ba mu kibalo, babafikile kufumankana na Yesu: Habamumwene, babamusendele’shi: Akatukye ku yino mpese yetu.