Read songe Mako 11 Bible Online

Mako 11 - songe bible

Mako 11

¹Henyihaha habefubwile hehi na ku Yelusalema ku Befajyi na Betane, ku ngulu ya Olefeta, E bebosheshe bana be ba bukishi, babidī’nka.

²Bebalungwile’shi: Ndai mu kibalo ki mbulushi mwa nutalamu; hanukatwele mwanka, anukahete mwan’a mpunda mushitshike shī atentaminwe na muntu sunga ngumune; numwangule, nufikye n’e.

³Su muntu akenwihusha’shi: A nkinyi kianukitshina biabia? Nukamulungule’shi: Nyi nfumwetu amukyebe, n’e kahindji n’āka akamutumu kuno.

⁴Henyihaha abebwele kwenda, abahetele mwan’a mpunda mushitshikwe hasha ’masanka, ku kibelo kwa nshibo; abamushitwile.

⁵Biabia bangi babadi bemane kwanka bebehwishe’shi: A nkinyi kianwangwila mwan’a mpunda?

⁶N’abo babebalungwile mu bebalungidile Yesu; babakuminyine’shi: Bibuwa eyilei.

⁷Henyihaha babafishishe mwan’a mpunda kwi Yesu, babamwadile mitwelo yabo ha mongo we, na Yesu batentamine hanka,

⁸Bantu be bungi badishe mitwelo yabo mwishinda, bamo namu batshomonanga mahuhwa a mitshi, bālanga mwishinda.

⁹Baba babadi abēnde ku mpala, na babadi abalondo kumongo kwe, babadi abasama’shi: Hosana! Elelee! Elelee! A mwabi kwi yawa kwete kufika mwishina dia Yehowa.

¹⁰Mwabi wa bufumu abufiki mwishina dia shetukulu Dafidi; Hosana! mpaa na mwiilu.

¹¹Biabia Yesu batwelele mu Yelusalema, mpaa na mu ntempelo; habashokolweshe meso ku bioso bibadi mwanka, mwanda wa nguba tabadi muhone, E bakatukile mwanka, bayile ku Betane na b’ekumi na babidi

¹²Maloba habakatukile mu Betane badi na nsala.

¹³E habamwene mutshi wa kikūku kulaa wikale na mabishi, bafikile kwaudi’shi, Su ’mone bikuba hanka; habafikile kwaudi, basañene anka mabishi nyaa, mwanda wa kihindji kia bikūku ta kibadi kikumbane.

¹⁴Henyihaha Yesu bewambile’shi: Muntu ta kudia kikuba kiobe mpaa na kwikala-ika. Bana be ba bukishi na kuhusha abeuhushishe.

¹⁵Abafikile ku Yelusalema, Yesu batwelele mu ntempelo, babangile kubinga’ba babadi abahana na kusumba bintu mu ntempelo. Bahonesha hashi namu mesa a abeshintushenanga n’ao ’mono, na mankwasa a baba babadi abahana tonyi twa nkudimba.

¹⁶Ta bakuminanga muntu kukila na kintu mu ntempelo.

¹⁷N’E bebalambukishe’shi: A shī mufundjibwe’nyi, eshi; Nshibo yande ayikatemunwa’shi, nshibo ya milangwilo ya mīlo yoso? ank’anwe nubeialula bu muta wa bangifi.

¹⁸Bafundji ba mikanda na batshiitebakwidi bakata abahushishe (uno mwanda,) babadi tabakimbi mwa kumwihayila; babadi abamutshina, mwanda wa kibumbu kioso kia bantu kibadi akikanya ku lulambukisho lwe.

¹⁹Hakuhona ha nguba bakatukile mu kituka.

²⁰Habadi abakidi mwishinda na mashika, babamwene wawa mutshi wa kikūku taumina’nka hoo mpaa na ku mīshi.

²¹Henyihaha Petelo kwete kutentekyesha bamulungwile’shi: A mwanana, tala kikūku kioele mūlwa, kibafumbu.

²²Yesu bebalulwile’shi: Nwikale na kukumina kw’Efile-Mukulu.

²³Mwanda binyibinyi nenwamba’shi: Muntu oso akāmba ngulu uno’shi, otentule, okēlwe mwishiba dia mema; e namu te na mialasheno kwishimba kwe, ank’e akakumina’shi, bioso bianyiakula abikamweka, biabia akamono’nka mubakwidile.

²⁴Nyi ha mwanda uno nenulungula’shi: Bioso bianukyebe ha kuteka, kuminai’shi, tubahu kwibitambula, biabia anukebitambula.

²⁵Hanwimana kwete kuteka (Efile-Mukulu) nulekyele muntu mwanda we su nwikale n’e kilumbu; biabia Shyenu e mwiīlu akenulekyela namu kusola kwa myanda kwenu.

²⁶Anka su anwe ta nulekyela (bakwenu) myanda, anka biabia namu, Shyenu e mwiīlu ta kenulekyela kusola kwa myanda kwenu, ooo.

²⁷Binyibiabia babālukile ku Yelusalema; habadi efunyu mu ntempelo batshiite-bakwidi bakata b’Efile-Mukulu na bafundji ba mikanda, na bakulu, babafikile kwadi E.

²⁸Babamwihwishe’shi; Obe okitshi yino myanda na bukome kinyi? A bakuha buno bukome bwa kukitshina n’abu yino myanda nanyi?

²⁹Yesu bebālulwile’shi: Ami namu nenwihushe eyi dimune; su anwiuku kungitaba, biabia ami namu nankenulungula mwikyele bukome bwande buno’ mwankitshina.

³⁰A lubatshisho lwa Yoano ndwa kunyi? A ndwa kwiilu’nyi, ndwa ku bantu? Akulangai.

³¹Abo abanangushenene munda mwabo’shi: Su atwamba’shi, nyi ku mwiilu, biabia namu aketwalula’shi: Binyibiabia a nkinyi ta nwibamukumine?

³²Anka su atwamba’shi, nyi ndwa bantu, babatshina bantu, mwanda bantu boso abakumine Yoano’shi, nyi mutemuki e Efile-Mukulu binyibinyi.

³³Abalungwile Yesu’shi; Ta twiuku’twe, ooo. Na Yesu bebālulwile mwanda’shi: Ami namu ta nyi nulungula mwikyele bukome bwande mwankitshina n’abu myanda’mi, ooo.