Read songe Mako 14 Bible Online

Mako 14 - songe bible

Mako 14

¹Hakubakile mafuku abidi bidibwa (bikata) bia Paque na bia mukate ushī na kitatusho bibafikile; batshiite-bakwidi bakata na bafundji ba mikanda, bakyebele mwa kumukwatshila na bulamalama’shi, tumwihe.

²Anka babākwile’shi: Kushī h’efuku dia bidibwa bikata (bia Hashika) ooo, tala akukekala eunga dia bantu kwanka.

³Na mwinyi biabadi mwikale mu Betane mu nshibo ya Shimona mwina kifwī; habadi mushāle ku bidibwa, kubafikile mwana mukashi na mulangi w’e w’ebwe ditoka soo, wa mwimu wa malashi, aneme akalabale; batanyine mulangi, bamututumwinyine mwimu ku mutwe w’e.

⁴Anka bangi babadi na nsungu ’mashimb’abo, abamba ’shi: A mpa mwanda wa kinyi okwete kulwisha bisumanga mwimu?

⁵Su kubadi akuhana (mwimu wa malashi) ku mulo ukile nfalanga bu nkama yisatu ya ndenadi mu kuha balanda, biabia babamununwine.

⁶Yesu bamba’shi; Mulekyei, a numuhatakyesha kinyi? e bankitshina’mi bibuwa.

⁷Mwanda nwi na balanda munkatshi mwenu mafuku oso; anwiuku kwibakitshina bibuwa kihindji kioso kianukyebe, ank’ami ta nwi n’ami ikala-ika, ooo.

⁸E bakitshi bu biadi mushingule kukita; babadile kala kufika mu kumpongwela malashi ku mbidi yande habashīanshikile.

⁹Nyi binyibinyi binenulungula’shi, Ku mpese yoso ayilungulwa myanda yamukāndu-wibuwa, abakākula namu uno mwanda ubakitshi umo mwana mukashi; aukekala bu kitentekyesho kie.

¹⁰Henyihaha Yudasa Isakadiota, umune akubatumibw’ekumi na babidi, bayile kwi batshiite-bakwidi bakata’shi, nkyebe nenusokwele Yesu.

¹¹N’abo habahushishe wawa mwanda, mashimb’abo abasehele anka soo; abamulayile namu’shi: Atukakuha mono, henyihaha bakimbile hadia kumusokwela.

¹²Habafikil’efuku dia kwibedi dia mukate ushī na kitatusho diabehayile bana mikoko ya Paque, bana be ba bukishi babamwihwishe’shi, Okyebe twende tukakulumbulwile hodia kudila Paque kwi kunyi?

¹³E batumine bana be ba bukishi babidi, bebalungwile shi, ndai mu kibalo, anukafumankane mwanka na mulume kwete kutwala ebuka dia mema: numulondei.

¹⁴Mwinyi mwakatwele mwamwa, biabia nukehushe sha nshibo’shi; Mufundishi ehusha’shi: A nshibo ya benyi yi kwi kunyi yandjia nkadila Paque na bana bande ba bukishi?

¹⁵Biabia E akenulesha nshibo yikata ya kwiīlu yihwe kulumbula bintu bioso, anwe namu nuketulumbuiwile mwanka.

¹⁶Henyihaha bana be ba bukishi habayile, babafikile mu kibalo, babahetele mubebambile, biabia babalumbulwile Paque.

¹⁷Biabia Yesu na b’ekumi na babidi namu, babafikile, nguba tadi kiolwa.

¹⁸Habashalele ku bidibwa Yesu bambile’shi: Binyibinyi nenulungula’shi: Kwi umune w’anwe kwete kudia n’ami akansokola (ku bangi bantu).

¹⁹Henyihaha mashimb’abo ababangile kufita, babamwihwishe ku muntu ku muntu’shi: A n’ami su? mungi namu’shi, A n’ami’ngi?

²⁰N’e bebālulwile’shi: Nyi ngumune a mwikume na babidi atukasabika n’e mwilonga hamune.

²¹Mwan’a muntu ēnde bu mwabafundjile, anka nyi muloa aukafiki kwi winyi akasokola Mwan’a muntu; bibuwa su e tekalanga shī mutandjibwe (hano ha nsenga).

²²Habadi bakwete kudia, Yesu bātshile mutanda wa mukate, batumbwil’Elile-Mukulu, beutshimwine, bebahele’ shi: Atai, nudie, yino nyi mbidi yande.

²³Bebosheshi’nyi ekoho namu, batumbwile dianka, bebahele namu, babatomene (babelekyeshenene boso).

²⁴Biabia bebalungwile’shi: Ano nyi mase ande a mu kilombeno kihia, akasumbukila be bungi.

²⁵Binyibinyi nenwamba’shi: Ta ntomo’nyi ku bikuba bia nfinyo, mpaa na ku di’efuku hankatomo nfinyo yihia ’mbufumu bw’Efile-Mukulu.

²⁶Henyihaha habahwile kuyimba lono abayile ku ngulu ya Olefeta.

²⁷Na Yesu bebalungwile’shi: Anwe boso anukakokoshwa ha mwanda wande buno bufuku, mu kibafundjilwe’shi: Nankataha katshunga ka mikoko, mikoko namu ayikahalakana.

²⁸Anka hankasanguka ku lufu, nankenubadila ku Ngadilea.

²⁹Petelo bamulungwile’shi: Sunga boso abakakukolwa, ami ta nkakukolwa, ooo.

³⁰Yesu bamulungwile’shi: Nyi binyibinyi nankwamba’shi, Anka buuo bufuku bwa lelo uno nsolo (etombole) ayikashī yisamine misusa yibidi kwibedi obe okampele diakasatu.

³¹Nyi henyi habanyisheshi bi bukoho’shi: sunga biabia nadia kufwa anka n’obe, ami ta nkakutunu, ooo, sunga nkahelehela. Abo boso bakwile namu anka hamunenka

³²Binyibiabia baBafikile ku kihindji kibatemunwa’shi, bu-Ngetesemane, n’E bambile bana be ba bukishi’shi: Bande kushalai hano binankatekyele Efile-Mukulu.

³³Hakwenda, bātshile Petelo na Yakoba na Yoano, biabia babangile kukanya bikata, n’eshimba dibamunen’anka fututu.

³⁴E bebalungwile’shi: Eshimba diande dibakamba kunfita tandufu luno; shalai hano nuntengyele.

³⁵Biabia bayile kumpala kihindji, bahone hashi, tatekyele Efile-Mukulu’shi: su nkihwandjikile biabia, yino nsā yinkile’nge.

³⁶Bakwile namu’shi: Abe Yaiya, bintu bioso mbilombene kodi, katushe dino ekoho kwandji’mi, anka kishī mu nkyebe’mi mwinyi, anka mukyebele obe na mwinyi.

³⁷Bālukile, bebahetele mu tulo, behwishe Petelo’shi: Obe Shimona biosobi we mulale mu tulo, bokutwa kutengyela sunga nsa yimune su?

³⁸Biabia binobino nwikalai na kutengyela na kuteka Efile-Mukulu, tala nwakatompibwa; nyi binyibinyi eshimba adikyebe, anka mbidi ngibofule.

³⁹Bakatukile dimo’nyi, batekyel’Efile Mukulu, bākwile’nyi bishima anka hamunenka.

⁴⁰Henyihaha habāluldle’nyi, bebahetele’nyi mu tulo dimo, (mwanda meso abo abadi ebanemene na tulo), ta bamwene namu mwa kumwalulwil’abo.

⁴¹Bafikile mususa wa kasatu, bebalungwile’shi: Binobino lalangai nwiosole: kubahu, nsa yibakumbana; talai, Mwan’a muntu ngiu tafishwa ’masa a bantu babi.

⁴²Bukai, twende; talai, akunsokola ku bangi (bantu) tadi hehi.

⁴³Kahindji n’āka, hakiakula, Yudasa a mwikumi na babidi, bafikile na kibumbu kikata, abatwale mpete na tubongye; abatukile kwi bakulu, batshiite-bakwidi bakata, na ku bafundji ba mikanda na ku bakulu.

⁴⁴Winyi mufishi a Yesu ku bangi bantu badi bebahele kitundwilo’shi: yawa anuka’mono mwimuna ku kanwa nyi E na mwinyi; numukwate, mwendeshe biya biya.

⁴⁵Habafikile, kahindji n’āka bayile kwi Yesu lubilo, bamwambile’shi: A mulambukishi, mulambukishi, bamwimwine ku kanwa.

⁴⁶N’abo abamukwete, abayile n’E.

⁴⁷Binyibiabia umune a baba babadi bemane hehi n’E, basomwene luhete (lwa ngoshi) betahile n’alo mpika a tshiite mwakwidi mukata, bamutshibil’etwi.

⁴⁸Yesu bebehwishe’shi: A kianubafwila na mpete na tubongye mu kunkwata, hamunenk’ami ngifi a nkinyi?

⁴⁹Nadi n’enu mu ntempelo kwifuku kwifuku kwete kulambukisha, nubankwatanga su? Anka nyi mpa mwanda wa kukumbasha bibafundjibwe mu Mukanda w’Efile-Mukulu.

⁵⁰Henyihaha boso babasukile, bamuleka (buhenka bwe).

⁵¹Mungi nsongwalume bamulondele, mwi ku mbidi’shi, kilamba kia linene mu kifuka badi mbidi muswa; (bangi) basongwalume namu babamukwete.

⁵²N’e bebalekyele kinyi kilamba kie kia linene ku maboko abo, bafutumukile muswa.

⁵³Biabia babēndeshe Yesu kwi mukwidi-tshiite mukata, e ha nundu ha bene; kubadi bakoñene n’e batshiite-bakwidi boso, na bakulu na bafundji ba-mikanda.

⁵⁴Petelo namu badi kwete kumulonda kumongo kula, bikyebikye, mpaa na mu luhoho lwa tshiite-muakwidi mukata e ku nundu a benē yawa, bashalele na batuhita, ku mwididi wa kālo tadi w’oto.

⁵⁵Biabia batshiite-bakwidi bakata na ba ha kimu kikata boso babakimbile mwanda wa kumwanyina n’ao’shi, tumwihe, anka babeukutshilwe.

⁵⁶Mwanda bebungi babamudjimbile, anka biakanwa biabo bibatuhishenene.

⁵⁷Kubadi bangi abemene kumudjimbila’shi:

⁵⁸Atwe tubamuhushishe’shi: Nankahonesha yino ntempelo yībakwe na maasa, anka mu mafuku asatu nankashimika yingi yishī yībakwe na maasa.

⁵⁹Sunga mbiabia biakanwa biabo bibatuhishenene.

⁶⁰Henyihaha tshiite-muakwidi mukata e ku nundu kwa benē, bēmene munkatshi mwabo behwishe Yesu’shi: Obe tōlula sunga ndjimune ku yino myanda yābakwanyina n’ayo kwi tuno tumonyi’be?

⁶¹Anka E bauminyine nyaa, ta mwalule, ooo. Dimo’nyi winyi tshiitemuakwidi mukata e ha nundu ha benē bamwihwishe’shi: Obe we winyi Kidisitu mwan’a mwabi’nyi?

⁶²Yesu bambile’shi: Nami uno; Anukamono namu Mwan’a muntu kwete kushāla ku mboko yi balume ya bukome, na kwete kufika ’makumbi a mwiīlu.

⁶³Binyibiabia winyi tshiitemuakwidi mukata besanwine bifwala bie’shi: A kiatukyebela’nyi tumo tumonyi a nkinyi?

⁶⁴A ta nwihusha ku kaa na kwa k’Efile-Mukulu’ku? A nwakula kinyi? Biabia boso babamuhīshishe’shi: E muhwandjikile’nka kufwa.

⁶⁵Henyihaha bamo ababangile kumufila mata, na kumuhuta meso, babamukuhile nsasu, babamwambile’shi: Temuna mwanda (womono); batuhita namu babamukuhile mahi.

⁶⁶Habadi Petelo mūshi mu luhoho, kubafikile nsongwakashi, umune a bafubi ba tshiite-muakwidi mukata e ha nundu ha benē.

⁶⁷Habamwene Petelo kwete kōta kālo, bamutale kanana, bamwambile ’shi: Obe namu bodi na Yesu mwina Nasaleta.

⁶⁸Anka e batune’shi: Ta nuku’mi, ooo, sunga kushingula kioakula. Biabla batukile mpaa na mukisanga, na nsolo etombole basamine.

⁶⁹Winyi nsongwakashi mufubi yawa, habamumwene dimo’nyi, babangile kulungula’badi bemane hanka’shi; Uno nguabo.

⁷⁰E beutune dimo’nyi; habayishishe kihindji kihi baba babadi bemane hanka babambile Petelo dimo’nyi’shi: Mbinyibinyi obe we a kisaka kie, mwanda obe we mwina Ngadilea na kwisamba kwobe nkwifwane kwabo.

⁷¹Henyihaha babangile kwelena milwā na kutshiha’shi: ntashingula uno muntu a nwamba-u-mi, ooo.

⁷²(Kahindji n’aka) nsolo etombole basamine diakabidi. Henyihaha Petelo batentekyeshe wawa mwanda ubamulungwile Yesu’shi: Kwibedi kwa nsolo etombole nkusama misusa yibidi, obe okampele diakasatu. Biabia hakutentekyeshe n’abia, badīle.