Read songe Mako 3 Bible Online

Mako 3 - songe bible

Mako 3

¹N’E batwēle dimo mu kitumbwilo, amo mubadi muntu badi na mboko yiume.

²Henyihaha tabamutala’shi, su amuhwisha mu dia Sabado, biabia bamone mwa kumutewila.

³E tākula kwi muntu badi na mboko yiume’shi: Ebwele munkatshi.

⁴E tebamba’shi: A nkishila kukita bibuwa mu dia Sabado’nyi, su nkukita bibubi? Su nkuhasha muwa, su nkwihā? Anka’bo babauminyine nyaa.

⁵Hakubatala na kukyengwila boso na meso a nsungu, na kwishimba fututū mwanda wa kukoma kwa mashimba’bo, E bākwile muntū’wa’shi: Ola mboko yobe! N’e bōlwele yanka; na mboko ye yibealulwile, tayidi bukome hamune na yikwabo.

⁶Henyihaha bafadiseo babatukile mwanka, tabamudila lukuku na bena Heloda lwa kwituhishena n’e lwa mwa kumwihayila.

⁷Anka Yesu batentulukile kwishiba dia mema na bana be ba bukishi, na kibumbu kikata kia bantu ba ku Ngadilea abamulondele kwanka, na bangi namu be bungi ba mu Yudea.

⁸Na ba mu Yelusalema, n’aba ku Idyumea, n’aba ’diēshia dia Yodana, n’aba ku luhese lwa Tyila, na Sedona, boso kwanka kibumbu kikata kinyi, habahushishē’bia bikata bibadi akitshi, tabafiki kwadi.

⁹E bambile bana be ba bukishi’shi: Nyeshei na kāto, mwanda wa kibumbu, tala kianfina.

¹⁰Mwanda e bahwishishe bangi bangi, nyi habamūngwidile boso abakumbu bihuha mwabadi akumukumina.

¹¹Na bikudi bi butete hakumumona bibahonehashi ku mpala kwe, tabiele musase’shi: Obe e Mwan’Efile Mukulu.

¹²E bebisashile’shi, ta nukanukishanga ku bantu.

¹³Binyibiabia bakamine ku ngulu, taitanyina’ba akyebe kwishimba die, n’abo abayile kwadi.

¹⁴Basangwile b’ekumi na babidi bakwikala n’e, mwadia kwibatumina kulungula mukāndu-wibuwa.

¹⁵Dingi nyi’shi, babahebwe matalwa akuhasha abakumbu kubofula kwa mbidi, na kubinga mikishi.

¹⁶E baudikile Shimona ding’eshina’ashi, bu-Petelo.

¹⁷Na Yakoba mwan’a Sebede na Yoano mukwabo, abo bebaudikile’shi bu-Boanejye, nyi kwamba’shi, bana ba kukungula kwa mpeshi.

¹⁸Andeleyo, na Fidipa, na Batolomyu, na Mateyo, na Tomase, na Yakoba mwan’a Alafesa, na Tadeusa, na Shimona mwin’a Kenane.

¹⁹Na Yudasa Isakadiata, winyi bamuhene kwi bangi. N’abatwele mu nshibo.

²⁰Kibumbu kibebungile dimo hamune, ta mbamone sunga mwa kudila (bidībwa,) ooo.

²¹Bakwabo (na Yesu) habeuhushishe, abayile mu kumukwata, mwanda abadi abamba’shi, e ’mutesha.

²²Bafundji ba mikanda babatukile ku Yelusalema abo’shi: E na Bēlesebuba. Tabamba’shi: Nkwi nfumu a mikishi kwadi muate bukome bwa kubinga mikishi.

²³Binyibiabia hakwibetanyina kwadi, bebele nkindji’shi: A Satana euku kwiibinga e na mwinyi?

²⁴Su bufumu namu abwilamuna, abu bu na mwinyi, biabia bwabwa būfumu abukutwa kushāla.

²⁵Su nshibo namu ayilamuna ayo yi na mwinyi, biabia ayikutwa kwimana.

²⁶Su Satana namu beībwelele na mwinyi, n’ēlamuna, biabia akutwa kwimana, biabia bafudila.

²⁷Sunga ngumune, su mpa kinyi, su mpa kinyi, euku kutwela mu nshibo ya kimankinda kuhaula bintu bie, anka abadila kuanya kinyi kimankinda, biabia biakimona mwa kuhaula bia mu nshibo ye.

²⁸Binyibinyi bia nyinuamba’shi; Yoso milwisho ayikalekyelwa bana ba bantu, na milomo yoso yabakaanga.

²⁹Anka’awa akakaa Kikudi-E-Selelee, ta kalekyelwa mwanda, ooo, anka adimukye akekala bahīle myanda ya kuhona mpaa na kwikalaika:

³⁰Mwanda abamwambile’shi: We na kikudi ki butete.

³¹Henyihaha bakwabo abafikile na nyin’e, tabemene hāsha, abo nkumutumina, akumwitanyina.

³²Kibumbu kia bantu kibadi bashāle hādi, tabamwamba ’shi: Tala, nyin’obe na bakwenu be hāsha abakukyebe.

³³N’e bebālulwile’shi: A nyin’ami na bakwetu mbanyi?

³⁴Hakutala ha boso babadi bashāle kibumbu kimushemeshe tākula’shi: Talai, nyin’ami na bakwetu ank’aba.

³⁵Mwanda ese akakitshi amukyebela eshimba di’Efile Mukulu, yawa nyi mukwetu mulume, na mukwetu mukashi, na nyin’ami.