Read songe Mako 4 Bible Online

Mako 4 - songe bible

Mako 4

¹E babangile dimo kulambukisha ku bukunkula kw’eshiba. Kubamwibungile kibumbu kikata, henyihaha e baikile m’bwato, tashalele ha mema; kibumbu kioso kia bantu kibaimene ku mahia ku bukunkula kwa mema.

²E tebalambukisha bintu bi bungi mu nkindji, tebalungula mu lulambukisho lwe’shi;

³Hushai; talangai, biakubatukile mukunyi’ēbala’shi: Nkakune.

⁴Bibakitshine hakukuna, yingi yibahone ku bukunkula kw’eshinda, na tonyi twa mwiilu tubeimene yoso.

⁵Yingi yibahone ha lubwebwe, ha shī nsenga yi bungi; kahindji na kano yibamene, mwanda yibakutshilwe nsenga yingi ya kwiisha mūshi.

⁶Anka nguba hakukamina yibatatshile, mwanda yibakutshilwe mishi, yibaumina’nka hoo.

⁷Yingi namu yibahone’ milobo, anka milobo yibakūle, yibeibondele, na bikuba bibakutshilwe kuhā.

⁸Yingi namu yibahone mu nsenga yibuwa; yibamene, ayo nkuha bikuba bifwime, yingi makume asatu, yingi makume asamombo, yingi namu lukama.

⁹E bebambile’shi: Sha matwi a kuhusha, ahushe.

¹⁰Habadi buhenka, na bangi babadi n’abo hehi, na b’ekumi na babidi, tabamwihusha mwiyile lwa lukindji.

¹¹E bebalungwile’shi, Kwanudi nubahebwa kushingula bifibwe bia bufumu bw’Efile Mukulu, anka kwi’ba be hasha, bintu bioso abikitshibwa mu nkindji’shi.

¹²Kumona, abakamono, anka ta bashingula; kuhusha, abakahusha, anka tabashingula; tala abakālula mashimba’bo, na milwisho yabo ayikebalekyelwa.

¹³E bebehwishe’shi: Tanushingula luno lukindji’nyi? biabia anukashingula nkindji yoso bi kunyi?

¹⁴Muminyi nyi amina mwanda (w’Efile Mukulu).

¹⁵Aba nyi benyi be ku bukunkula kwishinda, nyi habadi baminwe awa mwanda; anka baba habahu kuhusha, Satana, kahindji na kano afiki kumañuna mwanda uminwe ’mashimba’bo.

¹⁶Anka hamune n’aba abaminwe mu mbalakata; nyi hakuhusha mwanda, kahindji n’āka abeutambula nakusehela.

¹⁷Hakukutwa mishi munda mwabo bana bene, biabia abanyingi anka kihindji kihi; kumongo, ahakafiki malwa su kusābulwa ha uno mwanda, binobino abakakokolwa hanka.

¹⁸Aba namu nyi benyi baminwe munkatshi mwa milobo, nyi benyi abahusha winyi mwanda.

¹⁹Anka binango bia myanda bia hanohansenga, na kudimbwa kwa mono, na kwabila kwa bingi bintu abitwela mwanka, abifinena mu uno mwanda, nyi haubakutshilwe kuha bikuba.

²⁰Aba namu nyi benyi abaminwe ha nsenga yilumbulukye, nyi benyi abahusha winyi mwanda, na kwiutambula na kuha bikuba, au makumi asatu, au makumi asamombo, mungi namu lukama.

²¹N’E bebehwishe’shi: Etala aditushwa mu kutweshwa mūshi mw’ekumbo, su mūshi mwa lusala’nyi? ta ditulwa ha kitudilo kiadio su?

²²Mwanda ta kwi sunga nkimune kifībwe kishī akikaleshibwa, sunga nkidibwe lukuku kishī akikatushibwa hatoka.

²³Sha matwi akuhusha, ahushe.

²⁴E bebalungwile’shi: Dimukai bianuhusha, anka ku kihīmo kianuhīmi n’akio, altikenuhīmwa namu; na kwanudi anuhusha, yingi ayikatentekwa’nyi.

²⁵Mwandā’ wa e n’akio, kwadi e akahebwa bingi’nyi; ank’awa shī n’akio akaatshibwa na kinyi kiadi n’akio.

²⁶E bākwile’shi, anka biabia namu mbufumu bw’Efile Mukulu bwi hamune muntu aminyi mbio ha nsenga.

²⁷Alala tulo, abuku bufuku na kanya, mbio namu ayituluka na kutama, anka ta shingula mwaimena.

²⁸Nsenga ayitusha bikuba yi na mene; kwibedi kutuluka, kumongo mieho.

²⁹Anka ahakamongo mbio, akatumu bena miele bakunoa, mwanda mafuku a hakunwaa abafiki.

³⁰E behwishe’shi, Atukahwandjikisha bufumu bw’Efile-Mukulu na minyi? sunga nkwibwelela lukindji, atwibwelela na minyi?

³¹Nyi hamunenka katete ka mutada, ako ke ntshā, anka hakwikakuna mu nsenga, nkakile mbio yoso yi ha nsenga.

³²Anka hakwikakuna akatuluka, akatama, na kukila midioko yoso bukata, na kutshimpila ntabi yikata; biabia tonyi twa mwiīlu atwiuku kubombela mu mutala wao.

³³Biabia mu yingi nkindji yibungi bebelanga mwanda (w’Efile-Mukulu) mwabadia kwiukila kuhusha.

³⁴Anka kushī na nkindji ta mwisambe n’abo, anka habadi n’abo buhenka bwabo, bahatulwidile bana be ba bukishi myanda yoso.

³⁵Diadia efuku hakutwela nguba, bebalungwile’shi, tuabukei adi’eshia.

³⁶Hakwandula mwilo abamwikishe mbwato anka mubadi mwikele. Kubadi namu tungi twato n’e.

³⁷Kubebwele kihukuhuku kia luhahi, na mbundambunda yibekuhilanga mbwato; kahindji n’āka bubaulendaa.

³⁸E badi kwikolo kwa bwato mulale tulo ha musamo; abamubushishe, tabamwamba’shi: A mulambukishi, a tokanya biatukyebe kufwā’be?

³⁹E babukīle, batosheshe luhahi, bākwile kwi mema’shi: Fukama nyaa. Luhahi lubafukamine nyaa, kubadi anka tāloo.

⁴⁰N’E bebehwishe’shi: A Anubakwatshila moo kinyi? Kianushī na lukuluhilo nkinyi?

⁴¹Babakambile kukwata moo, tabeihushena’shi: A uno e bino nanyi a kokyelwa na luhahi na mema?