Read songe Mako 7 Bible Online

Mako 7 - songe bible

Mako 7

¹Henyihaha BaFadiseo, na bamo ba bafundji ba mikanda babafwile ku Yelusalema abekongyele kwadi.

²Habamwene bamo ba bana be ba bukishi bakwete kudia mikate na māsa ashī eoshwe, bebabwele n’abo.

³Mwanda baFadiseo na baYudea boso, su ta mbeoshe biya ku māsa, ta bakudia, mwanda wa kulama lungalunga lwa bakulu.

⁴Na hakwaluka ku kisalwe, su ta mbeoshe ta bakudia; babadi namu na bingi bihikwa bi bungi bibatambwilwe kulama, na bia kusula makoho na ngesu, na bihulu bibakitshinwe na bilonda bia munyinga, na bia kusula mambata.

⁵Henyihaha baFadiseo na Bafundji ba mikanda abamwihwishe’shi: A nkinyi bana bobe ba bukishi tabe mu bihikwa bia lungalunga lwa bakulu, anka bakwete kudia na māsa ashī eoshwe.

⁶E bebālulwile’shi: Mbinyi Eseasa benutemukile’nwe bansesa bu bibafundjilwe’shi: Aba bantu mbanemekye ku milomo, anka mashimb’abo e kula n’ami.

⁷Tala, abandangwila bisumanga, abalambukisha bantu lulambukisho lwa milangilo ya bantu.

⁸Mwanda anulekye milangilo y’Efile-Mukulu, anulamata ku lungalunga lwa bantu mu kusula kwa ngesu na makoho, na bingi bintu biabia namu bianukitā.

⁹E bebambile’shi: Nyi binyibinyi bianuhele mulangilo w’Efile-Mukulu eshi, tulame lungalunga lwetu.

¹⁰Mwanda Mosesa bakwile’shi: Nemeka shobe na nyin’obe; awa akaa nshye, sunga nyin’e, āfwe lwinyi lufu.

¹¹Ank’anwe’shi: Su muntu āmba shye su nyin’e eshi; kintu kibotshile ki Kobana, kuhatula nkwamba’shi, Nkintu kia buntu bw’Efile-Mukulu.

¹²Henyihaha ta nukuminanga e kukwashia shye sunga nyin’e, su nkinyi su nkinyi.

¹³Nyi henyi hanwalulwila mwanda w’Efile-Mukulu, taudi bu bisumanga ha mwanda wa lungalunga lwenu lwanwibatumbishe, na bingi bikitshino bi biabia.

¹⁴(Yesu) habetamine kibumbu kioso kwifubula kwadi, bebalungwile’shi: Hushai kwandji’mi anwe boso, nushingule binangu.

¹⁵Ta kwi kintu ki hasha ha muntu akitwele munda mwe akiuku kumulwisha; anka biabia abituku munda, nyi biobio abilwishā muntu.

¹⁶Su muntu e na matwi a kuhusha, ahushe.

¹⁷Binyibiabia habalekyele kibumbu kia bantu ku kibelo, batwelele mu nshibo, bana be ba bukishi abamwihwishe mwanda w’alwa lukindji.

¹⁸E bebehwishe’shi: Anwe namu ta nwi na binangu, ta nushingula kioso kintu ki hasha akitwele mu muntu, kiakia ta kiuku kumulwisha, a-a?

¹⁹Mwanda ta kiiya mwishimba, anka akienda mwifu, mpaa na ku nkumba, (Nyi muyile yino myanda kuhatula’shi) ku biakudia bioso bi selelee.

²⁰E bambile’shi: Akituku munda mwa muntu, nyi akimulwisha.

²¹Mwanda ku munda, mu mashimba a bantu amutukā binangu bi bubi, na mabasa, na makyebanokyebano, na matombo,

²²na bwifi, na meso-a-tone, nabubi, na ndjindji, na mudioholo w’eshimba dia bubi, n’eiso dibi, na kusabūla, na kwinemeka, na butesha.

²³Yaya myanda yibi yoso ayitukā munda, ayilwisha muntu.

²⁴Henyihaha bakatukile kwanka, bayile ku mpese ya Tyla na Shidona, batwelele mu nshibo, ta mukyebe muntu, sunga ngumune kwiuka, anka ta mumone mwa kufwamina.

²⁵Mwanda kubadi mwana mukashi, mwan’e badi na kikudi ki butete bamuhushishe, bafikile, bahonene ku ngwa y’e.

²⁶Winyi mwana mukashi badi mwina Ngidiki, a kwiilo dia Sailofenishya. Bamusendelele’shi, Ambingile mukishi munda mwa mwan’ande.

²⁷Anka Yesu bamwambile’shi, Bana babande kwīkuta kwibedi, mwanda ta mbilombana kuata biakudia bia bana na kuela mbwa.

²⁸E bamwalulwile’shi, Uolo yaiya Nfumwami, anka mbwa su yi mūshi mwa mesa aīdi bifingifingi bia bana.

²⁹E bamulungwile’shi: Ha mwanda mwa bino bishima biobi eyile shobe, mukishi ubahu kutuka mwan’obe.

³⁰Biabia habafikile mu nshibo y’e basānene mwana ha lusala, na mukishi tautukile.

³¹Dimo’nyi, hakutuka ku mpese ya Tyla na Shidona bafikile kwīshiba dia Ngadilea, bakile munkatshi mwa mpese ya Dekahodise.

³²Babafishishe kwadi muntu sha kwitwi, n’eūkuta namu, abamusendelele’shi, amutentekye maboko.

³³Yesu bayile n’e ku bukunkula kwa kibumbu, bamwelele minwe mwitwi, bafidile mata, bamukumine kwidimi.

³⁴E batadile mwiīlu beikishe muwa, bamwambile’shi, Ehafata. Nyi nkwamba’shi; mwikale mushikukye.

³⁵Kahindji n’āka matwi e abashikukile, na koshi k’edimi die kabatshibikile, badi takula bibuwa.

³⁶E bebakamikile’shi, Ta nulungulanga muntu, sunga ngumune; anka habakambile kwibakamika, abo abakambil’eshimba dia kuhalakasha nkumo.

³⁷Abakambile kukanya bikata’ shi; Bakitshi myanda yoso bibuwa, E ahwishā basha kitwi, tabahushā, n’abe kamama tabākulā.