Read songe Mako 8 Bible Online

Mako 8 - songe bible

Mako 8

¹Mu aa mafuku namu, kibumbu kia bantu biakibadi kikale kikata ki moo, babadi bashī na biakudia: Henyihaha Yesu baitanyine kwadi bana be ba bukishi, bebalungwile’shi:

²Nyi na bano bantu lusa, mwanda’bo babashala n’ami binobino mafuku asatu, tabe na bidibwa bia kudia.

³Su nebahalakasha na nsala, abo kwenda kwabo, abakakoko mwishinda, mwanda bangi mbafikye kula.

⁴Bana be ba bukishi abamwihwishe’shi; Muntu euku kwikutshisha bano bantu mu kabāka kwi kunyi?

⁵E bebehwishe’shi: A nwi na mitanda ya mikate yingi? Abamwalulwile’shi: Nyi musambobidi.

⁶E balungwile kibumbu kia bantu’shi: Bashale hashi; bātshile mitanda ya mikate musambobidi, batumbwile Efile-Mukulu, beitshimwine, beihele bana be ba bukishi’eshi; Kebatudilei, biabia abeitudile bantu.

⁷Babadi’nyi na kasasa ka tushiha, biabia hakutumbwile n’ato, bebambile’shi: Kebahei na twinyi tuno.

⁸Biabia babadile, abaikwite. Abātshile bisele musambobidi bia bifingifingi bibashele.

⁹Beyi babadile babadi su mbinunu binanka, n’E bebahalakeshe.

¹⁰Henyihaha bekile mbwato na benyi bana be ba bukishi, bafikile mu mpese ya Ndalamanuta.

¹¹Bafadiseo babatukile kwadi, ababangile kumwihusha mwanda’shi: Etuleshe kitundwilo kia mwiīlu, anka nyi nkumutompa.

¹²E beikishe muwa bikata mwishimba die, bambile’shi: Ba mu kino kihindji abakyebela kitundwilo mwanda kinyi? Binyibinyi nenuamba’shi: Takwi kitundwilo akikahebwa kwi ba kino kihindji, ooo.

¹³E bebalekyele, bakekile m’bwato dimo’nyi bayile adi’eshia.

¹⁴Bana be ba bukishi abailwa kutwala (n’abo) ya bidibwa, m’bwato namu tamubadi mukile mutanda umune wa mukate.

¹⁵E bebakamikile’shi: Dimukai, nwikale badimukye ku kitatusho kia Bafadiseo na kinyi kia Heloda.

¹⁶Baba, tabahatakasha munkatshi mwabo’shi: Nyi mpa mwanda ta twi na mikate.

¹⁷Yesu habeushingulwile bebālulwile’shi: Mwanda ta nwi na mitanda ya mukate, a nkinyi kianuāmbishena ’nyi, ta nunangushena sunga kushingula, nukī na mashimb’enu e bukoho’nyi?

¹⁸A meso anwe n’ao ta numonā, a matwi namu anwe n’ao, ta nuhushā, ta nutentekyesha’nyi?

¹⁹Hanatshimwine mitanda yitano munkatshi mwa binunu bitano, ā bungi bwa bisele bibaule na bifingifingi bianubātshile mbinga? Abamwalulwile’shi: Nyi ekumi na bibidi.

²⁰A ha mitanda musambobidi namu ku binunu binanka, a mbisele binga bia bifingifingi bianubātshile? Abamwalulwile’shi; Nyi musambobidi.

²¹E bebehwishe’shi: A nkinyi ta nushingula?

²²Bafikile ku Betaseda. Abafikile kwadi na muntu mpofu, abamusendelele’shi; bamukume.

²³Henyihaha bakwete mpofu ku mboko, bamukunkwishe ku bukunkula kwa kibalo; habamufidile mata ’meso na kumutenteka maboko, bamwihwishe’shi: Omono kintu su?

²⁴N’e babandulukile’shi: Namono bantu bēfwane mitshi bakwete kutambuka.

²⁵Kumongo, bamutentekyele maboko ku meso e dimo, bamutadishe mwiīlu, (mpofu) bahwishibwe, badi tamono bantu boso anka bibuwa.

²⁶(Yesu) bamutakwile ku nshibo ye eshi: Totwelanga mu kibalo, sunga nkulungula umune mu kibalo.

²⁷Henyihaha Yesu na bana be ba bukishi babakatukile, abayile mu bibalo bia Kesalea Fidihai; mwishinda behwishe bana be ba bukishi’shi: A bantu abanamba’shi; Nanyi?

²⁸Abamwalulwile’shi: Bangi abakwete kwamba’shi: E nyi Yoano Mubatshishi, bangi’shi: E nyi Elaidja, bamo nyi’shi: E nga batemuki.

²⁹E bebehwishe’shi: Anka anwe anutemuna bu’nyi? Petelo bamwalulwile’shi: Obe we Kidisitu mwinyi.

³⁰E bebakamikile’shi: Tanundungwilanga muntu.

³¹Binyibiabia babangile kwibalambukisha’shi: Mwan’a muntu ngwa kumweshibwa malwa e bungi, na kuhedibwa kwi bakulu, na kwi batshiite-bakwidi bakata, na kwi bafundji ba mikanda, na kwīhayibwa; na hahakakidi mafuku asatu kusanguka dimo.

³²E batubwidile bantu boso uno mwanda. Biabia Petelo bayilen’E ku bukunkula, babangile kumutosha.

³³Anka habālulwile kutala bana be ba bukishi batosheshe Petelo’shi: Kile kumongo kwande, obe Satana, mwanda obe twe na kanya ka bintu bi’Efile-Mukulu, anka ku bia bantu.

³⁴Yesu habetamine kibumbu kwadi, na bana be ba bukishi namu, bebambile’shi: Ese akyebe kundonda, ehele e na mwinyi, eboshe nkulusu ye, andonde.

³⁵Mwanda ese akyebe kuhasha muwa we akeushimisha, ank’ese ashimisha muwa we, ha mwanda w’ande, na ha mwanda wa mukāndu wibuwa, nyi winyi akeuhasha.

³⁶A muntu akasungula kinyi, su bāta bioso bia hano ha nsenga na kushimisha muwa we u na mwinyi?

³⁷A biabia namu muntu e na kintu kinyi kia kushintushena mu kusungula muwa we dimo’nyi?

³⁸Binyibiabia awa akamwena’mi būfu na ku bishima biande, mu kino kihindji kia basha mabasa na kia basodi ba myanda, biabia Mwan’a muntu namu akamufwila būfu ahakafiki mu ntumbo ya Shye na bamwikeilu bahatulukye selelee.