Read songe Luka 13 Bible Online

Luka 13 - songe bible

Luka 13

¹Ha kiakia kihindji kubadi bamo abamulungwile mwanda wa Bena Ngadilea’shi: Pilato badi asangakana mase abo na milambu ya bitahilo biabo.

²Biabia Yesu bebālulwile’shi: Anutentekyesha’shi, bano Bena Ngadilea abadi balwishi kukila Bena Ngadilea boso ha mwanda abamwene ano malwa?

³Nenulungula’shi, ooo, anka su tanwilanga ’mashimba enu, anwe boso anukalwila’nka hamune.

⁴Sunga mbaba ekumi na mwanda abahonenwe na musungo wa Siloama ubebahayile boso, anutentekyesha’shi abadi basha balwishi bakile bantu boso ababombela mu Yelusalema su?

⁵Nenulungula’shi: ooo, anka su tanwilanga ’mashimba enu anwe boso anukalwila’nka hamune.

⁶E bēle luno lukindji’shi: Kubadi muntu badi na mutshi wa kikuku ukunyibwe mwifuba die dia nfinyo, bafikile mu kukimba bikuba hanka, tamusanane sunga nkimune.

⁷Henyihaha balungwile mulami’efuba’shi: Talanga bino bihwa bisatu nafikile kukimba bikuba ha uno mutshi wa kikuku, nki musa nane’bio, sunga nkimune: eushinde, a nkinyi kiaukwete kulwisha nsenga bisumanga.

⁸E bamwalulwile’shi: A Nfumu banda kwiulekye namu kino kihwa, mpā na hankeudimina na kutshinkisha nsenga hanka.

⁹Biabia su ngwa kuha bikuba (biabia bibuwa), su mbisumanga okeushinde hashi.

¹⁰Binyibiabia badi alambukisha mu kitumbwilo kimune; h’efuku dia Sabado.

¹¹Tala! kubadi mwana mukashi badi na kikudi kimubofushe bihwa ekumi na mwanda; badi mu tontshibwe kiongo, badi teuku kubanduluka sunga mpahelahela.

¹²Yesu habamumwene, bamwitanyine bamulungwile’shi: Obe mwana mukashi bohosolwa ku busungu bwobe.

¹³Bamutentekyele masa, biabia kahindji n’āka bolokyele, batumbishe Efile Mukulu.

¹⁴Binyibiabia mulami a kitumbwilo, badi na nsungu mwanda Yesu bahashishe (bantu) mwifuku dia Sabado, balungwile bantu’shi: Kwimafuku asamombo alombene bantu kufuba: binyibiabia nufikye mu aa mafuku kuhashibwa kushī h’efuku dia Sabado, ooo.

¹⁵Anka Nfumwetu bamwalulwile’shi: Obe nsesa, ese’enu shyashitula ku kikutu ngombe’e sunga mpunda hadilā, kwiyifungila ku mema h’efuku dia Sabado, nanyi?

¹⁶A uno mwana mukashi biadi mwikale mwan’Abalahama mwanyibwe kwi Satana, bihwa ekumi na mwanda: tambilombane kumuhosola h’efuku dia Sabado su?

¹⁷Biabia habākwile yino myanda, boso abadi betuhishena n’e, abakwetwe na būfu: na bantu boso abasehelele mwanda wa bintu bioso bia ntumbo bibakitshine kwadi e.

¹⁸Henyihaha bakwile’shi: Bufumu bw’Efile Mukulu bwi bu kinyi? Nankebuhwandjikisha namu bu kinyi?

¹⁹Mbuhwandjikile bwimuma dia lubyo lwa moutade dibātshile muntu, edimina mwifuba die, diamena diatama, tamutshi ukata; biabia tonyi twa mwiilu tubalalanga mu ntabi yao.

²⁰Bakwile dimonyi’shi: Bufumu bw’Efile Mukulu mbuhwandjikile bu kinyi?

²¹Bwi bu kitatusho kibātshile mwana mukashi, ekifia mu bihimo bisatu bia bukula, mpā na hakibatatwishe bioso.

²²E batambukile mu bibalo bioso na misumba yoso, badi alambukisha bantu badi ēnde luendo ku Yelusalema.

²³Henyihaha umune bamwihwishe’shi: Obe, Nfumwa mi: aba hashibwa mbahela su? E bebālulwile’shi:

²⁴Nyishai bikata kutwela mu kibelo kihela, mwanda nenulungula’shi: Bebungi abakakyebe kutwela, abakakutwa.

²⁵A hakabuku sha nshibo, na kushita ku kibelo, anwe nwanabangye kwimana hasha, na kukukula ku kibi’shi: A Nfumwetu! A Nfumwetu, etushitwile; biabia anakalule na kwinulungula’shi: Tanyinwiuku kwa nufiki.

²⁶Henyihaha nwanabangye kwakula’shi: Tubadile, tubatomene ku mpala kobe, n’obe bolambukishe namu mu misē yetu.

²⁷Ank’e anakālule’shi: Nenulungula’shi: Tanyinwiuku kwa nufiki, katukai kwandjimi, anwe boso bakitshi ba bubi.

²⁸Kwanakekale kudila na kukyeneka meno, hanwanakamone Abalahama, na Isaka, na Yakoba na batemuki boso, mu bufumu bw’Efile Mukulu, n’anwe (bana bene) nwanakatakulwe hasha.

²⁹Abakafiki kwa kutunduka nguba, na kwa kuhon’a nguba, na ku Noda na ku Sude, abakashāla mu bufumu bw’Efile Mukulu.

³⁰Biabia talangai, kwi ba kunfudilo, banakekale ba kwibedi, na ba kwibedi banakekale ba kunfudilo.

³¹Ha diadi’efuku kubafikile bamo ba ku Bafadiseo, banwambile’shi: Katuka wende, mwanda Heloda akakwiha.

³²E bebalungwile’shi: Ndai mulungule wawa museu: Tala biambingi bikudi bibi, nahwisha masungu lelo na maloba, na h’eluku dia kasatu nankahudisha mpā.

³³Sunga mbiabia wandji n’au nyi ngwa kutambuka lelo, na maloba, n’āmaloba: mwanda ushyauku mutemuki kushimina mu Yelusalema, ooo.

³⁴A ee! Yelusalema, Yelusalema oiha batemuki na kwasa binyi bakutuminā mabwe; misusa na misusa nadia kukongyelesha bana bobe hamune bu nsolo akongyelesha bana be mushi mwa mbaba, anka’nwe nubatune.

³⁵Talangai! nshibo yenu ayinulekyelwa bu kishiboshibo, binyibinyi nenulungula’shi: Tanukamono mpā na (ha kihindji) kia nwanakakule’shi, Mwabi kwi yawa afikī mwishina dia Yehowa.