Read songe Luka 17 Bible Online

Luka 17 - songe bible

Luka 17

¹Henyihaha, balungwile bana be ba bukishi’shi: Tabikakutwa kufika biakukokola anka mpombo (kwi yawa) akebifisha.

²Kuanya kwa yawa muntu ebwe adihelwa mu nshingo, kumwela mu kalunga ka mema, nkukile buwa e kukokosha umune ā’ba bahela.

³Nwilamei’nwe bana bene. Su mukwenu bakusola mwada, nomusashile; su bēlanga omulekye.

⁴Su bakusola misusa musambobidi kwifuku dimune, na mwifuku dimune akaluka kodi misusa musambobidi’shi nelanga, okamulekyele.

⁵Biabia batumibwa abakwile kwi Nfumwetu’shi: Atufwimishe lukuluhilo lwetu.

⁶Nfumwetu bālulwile’shi: su nubadi na lukuluhilo bu kamuma ka mutshi wa mutade nwi bianudia kwakula ku uno mutshi wa (buki) syeamine: wekale mu shūdikye mpa na ku mishi, okyekune mu kalunga ka mema; n’au aukenukokyela.

⁷Anka nanyi ēnu e na mpik’e kwete kudima sunga kudisha bimunwa, ahayisha kihindji ha kwaluka kwifuba, amwambe’ shi: Fika oshale ha bidibwa.

⁸Ank’e takakishakisha kumulungula’shi: Ndumbulwila biakudia biande, nyisha kilamba kiobe mu kifuka ontambikye, mpaa na hampu kudia na kutoma, kunyima okadi na kutoma namu?

⁹Atumbula yawa mpika ha mwanda bakitshi uno mwanda ubamulangikishe su? Ooo.

¹⁰Anwe namu hamune, hanukahudisha kukita aya myanda yoso, yianubalangikishwe, nuakule’shi: Twi bahika ba bisumanga: tubahwile kukita kiakia kia tubadi nakio mwanda kukita.

¹¹Bitabibakitshine ha kwenda ku Yelusalema, bakile munkatshi mwa Samadia na Ngadilea.

¹²Hakutwela mu kingikibalo, kubamufumankene bana balume ekumi, babadi basha kifwe, abadi bemane kula.

¹³Abanyishishe mayi’abo’shi: A Yesu Nfumwetu, etusambe lusa.

¹⁴Habebamwene, ebalungwile’shi: Ndai nukeleshe kwi batshiite bakwidi. Bitabibakitshine ha kwenda, abatosheshwe.

¹⁵Na umun’abo, habamwene’shi natoshwa, bālukile, atumbishe Efile Mukulu n’eyi dikata.

¹⁶Ahona ha mpala (ye) ku ngwa ye, na kumutumbula: n’e badi mwina Samadia.

¹⁷Biabia Yesu bālulwile’shi: A takwikalanga ekumi batoshibwe, anka kitema ki kwi kunyi?

¹⁸Takwi basananwe baluke kwela ntumbo kw’Efile Mukulu anka uno mwenyi.

¹⁹Biabia bamulungwile’shi: Ebwe, oende luendo īobe: lukuluhilo lwobe lubakuhasha.

²⁰Binyibiabia ha behwishwe kwi Bafadiseo, ahakafiki bufumu bw’Efile Mukulu mpa kinyi, ebebālulwile’shi: Bufumu bw’Efile Mukulu tabukafiki na kutadibwa na meso.

²¹Sunga abakamba’shi: Talai kuno! Sung’ashi: Talai yikwa! mwanda, talai bufumu bw’Efile Mukulu bwi munda mwenu.

²²Balungwile bana-ba-bukishi’shi, Mafuku akafiki hanukakyebe kumona efuku dimune dia Mwan’a muntu, takedimono, ooo.

²³Abakenwamba shi: Talai kuno; sunga’shi, Talai yikwa: tanwendanga, sunga nkulonda.

²⁴Mwanda’nka mwikela kuhenya kwa mpeshi, ahenya ku luhese lumune’nka lweilu, akutosha ku lungi luhese lweilu; anka biabia namu abikekala Mwan’a muntu mwifuku die.

²⁵Anka kwibedi akafwambuka mu bintu bibungi, na kuhedibwa ku kino kihungilo.

²⁶Bu bibadi bikale mu mafuku a Noa, biabia namu abikekala mu mafuku a Mwan’a muntu.

²⁷Abādi abādi, abādi abatomo, abādi abehelena malunda, abādi a bahebwa malunda, mpā na kwifuku dibatwele Noa mu bwato, na kieshi kia mpeshi kibafikile na kwibatukisha boso.

²⁸Biabia namu bu bibadi mu mafuku a Lota; abādi abadi, abādi abatomo, abādi abaulu, abādi abahana, abādi abakunu na kwabaka.

²⁹Anka diadi’efuku dibālukile Lota mu Sodoma, kubanokyele kālo na nsulufa mwiilu na kwibatukisha boso.

³⁰Anka biabia namu abikekala mwifuku dia kufumbulwa kwa mwan’a muntu.

³¹Mu diadi’efuku yawa akeleala hanundu lia nshibo, na bintu bie bi mu nshibo, takaiki mu kwibiata, ooo, na yawa e mwifuba tāluka namu.

³²Tentekeshai mpian’a Lota.

³³Ese akimbi kuhasha muwa we akeushimisha: n’ese akashimisha muwa we akeubombelesha.

³⁴Nenulungula’shi: Mu bwabwa bufuku bantu babidi abakekala ha lusala; umune akātshibwa, mungi akashala.

³⁵Bana bakashi babidi abakekala abahele kwibwe hamune, umune akātshibwa, mungi akashala.

³⁶Bana balume babidi abakekala mwifuba, umune akatshibwa, mungi akashala.

³⁷Binyibiabia abamwālulwile’shi: Kwi kunyi Nfumwetu? E bakwile kwabadi’shi: Kosokoso kwi mbidi yifwe nyiakukoñena mpungwe.