Read songe Luka 20 Bible Online

Luka 20 - songe bible

Luka 20

¹Bitabibakitshine, ha ding’efuku di’ā mafuku, habadi alambukisha bantu mu ntempelo, na kulungulu mukāndu-wibuwa, batshiite-bakwidi bakata bafikile kwadi na bafundjiba-mikanda na bakulu.

²Abamwambile’shi: Etulungule. A bino bintu webikita na matalwa kinyi? A winyi bakuhele ano matalwa nanyi?

³E bebālulwile’shi: N’ami namu nankenwihusha mwanda umune ñunalule.

⁴A lubatshisho lwa Yoano, lubadi lwa mwiilu, su ndwa ku bantu?

⁵Abo abeleshene mpaka ba na bene’shi: Su atwakula’shi: Ndwa mwiilu, aketwihusha’shi: Ankinyi tamwibamukumi ne?

⁶Anka su atwamba’shi: Ndwa ku bantu: biabia bantu boso abaketwasa mabwe: mwanda’bo abadi basumine’ shi: Yoano badi mutemuki.

⁷Biabia abālulwile’shi; Tatwiuku kwa lubafikile.

⁸Yesu bebambile’shi: Anka’mi namu tankenulungula ku namwene ano matalwa ankita yino myanda.

⁹Henyihaha babangile kwakula kwi bantu luno lukindji’shi: Muntu bakunyin’efuba dia mitshi ya nfinyo, bedijekyele bafubi, bayile kwi yingi nsenga yibadi, kula kihindji kikata.

¹⁰Habakumbene kihindji (kia kumonga bikuba) batumine mpika kwi bafubi ba nfinyo biabadia kumuha bikuba bia mwifuba: anka bafubi abamukuhile, abamwalwishe bisumanga.

¹¹Biabia ebatumine mungi mpika dimo: abamukuhile namu, abamukitshine bibubi, abamwalushe bisumanga.

¹²Biabia batumine dimo a kasatu, abamutahile namu, abamubingile.

¹³Henyihaha sh’efuba dia nfinyo bakwile’shi: A nkite na minyi? Nankatumu mwanā’nde a kifulo: habakamumono su mbiabakamunemeka.

¹⁴Anka bafubi b’efuba habamumwene; abamudidile lukūku’shi: Uno nyi mpyanyi: fwai tumwihe, biabia buhyanyi bwikale bu bwetu.

¹⁵Biabia abamubingile mwifuba dia nfinyo, abamwihayile. A biabia shy’efuba akebakitshi na minyi?

¹⁶Akafiki mu kutukisha baba bafubi, akaha bangi efuba dia nfinyo. Habahushishe biabia, abambile’shi: A Efile Mukulu tabikekalanga biabia.

¹⁷E bebatale, bakwile’shi: A biabia nkinyi kibafundjibwe’shi: Ebwe dibahele bebaki, ankā’dio dibālulukile bu mutwe w’ehaka?

¹⁸Ese akahona ha diadi’ebwe, akatshimuka; ank’ese adikahona, adikamufingakana.

¹⁹Binyibiabia batshiite bakwidi bakata na bafundji-ba-mikanda, abakyebele kumukwata anka ha yawa nguba; biabia abatshine bantu: mwanda abashingulwile’shi: n’atwe bebele luno lukindji.

²⁰Biabia abamutengyele, abatumine bampūha babadi abehwandjikisha’bo bana bene bu bantu balulame, ha mwanda wa kubembula myanda ye’shi, tukamufishe kwi bukome na matalwa bia mutontshi mukata e hanundu ha boso.

²¹Abo abamwihwishe’shi: A Mulambukishi, atwiuku’shi, okula na kulambukisha bilulame, totalā mpala (ya muntu), anka olambukisha eshinda d’Efile Mukulu na binyibinyi.

²²Kwi kishila’twe kulambula Kesala su?

²³Ank’e bashingulwile bulamalama lwabo, biabia bebehwishe’shi: A nkinyi kianuntompela?

²⁴Ndeshei nfalanga ya ndenadi. Kihwandjikisho na kifundwe bi hanka’bi mbianyi? Abālulwile’shi: Mbia Kesala.

²⁵E bebalungwile’shi: Binyibiabia lambulai bia Kesala kwi Kesala, na bintu bi’Efile Mukulu namu, kw’Efile Mukulu.

²⁶Ank’abo tambamone bia kumukwata ku bishima bi’e ku mpala kwa bantu: abakanyine lwalulo lwe, n’abo abauminyine nyaa.

²⁷Henyihaha kwadi kubafikile bamo ba ku Basadusea? benyi abatunanga’shi: Takwi lusanguko lwa ku lufu: abamwihwishe’shi:

²⁸A Mulambukishi, Mosesa betufundjile’shi: Su mukwabo na muntu afwa, aleka mukashi, shī na bana; biabia mukwabo ahyane mukashi e, atandjisha mukwabo bana.

²⁹Biabia kubadi bana balume musambobidi ba munda mumune: a kwibedi bātshile mukashi, e bafwile shī na bana.

³⁰A kabidi namu bamuhyene, e’nyi nkufwa shī na bana.

³¹Biabia a kasatu’nyi bamuhyene; mpaa na boso musambobidi anka hamune; tambalekye bana, abafwile.

³²Ku nyima kwa boso winyi mukashi bafwile namu.

³³Binyibiabia ha lusangukilo lwa ku lufu, akekala mukashi’ānyi? Mwanda boso musambobidi abādi balume b’e.

³⁴Yesu bebālulwile’shi: Bana ba hanohansenga ababambā na kubambibwa,

³⁵ank’abo abatemunwa’shi, mbahwandjikile kufika ku’ya nsenga, na ku lusangukilo lwa ku lufu, abo tababambā sunga nkubambibwa, ooo.

³⁶Mwanda’bo tabeuku’nyi kufwa dimo: abakekala bu bamwikeilu, nyi mbana b’Efile Mukulu, bana ba lusangukilo.

³⁷Anka Mosesa habadi kwī’būla betulesheshe, ’shi, bafwe ababukā ku lufu, habatemwine, Yehowa’ shi: Efile Mukulu a Abalahama, bw’Efile Mukulu a Isaka, na bw’Efile Mukulu a Yakoība.

³⁸Mwanda E t’Efile Mukulu a bafwe, ooo, anka ngā ba batala, mwanda boso be na muwa kwadi.

³⁹Henyihaha bamo ba ku bafundji-ba-mikanda bamwalulwile’shi: Mulambukishi ōkula biya.

⁴⁰Ku nyima abatshine kumwihusha mwanda dimonyi.

⁴¹E bebehwishe’shi: A nkinyi kia bambila’shi: Kidisitu: nyi mwan’a Dafidi?

⁴²Dafidi na mwinyi ākula mu Ñono ya Milangwilo’shi: Yehowa bambile Nfumwami’shi: Oshale ku mboko yande yibalume.

⁴³Mpaa na hanangalula beshikwanyi n’obe bu kitulo-kia-ngwa yobe.

⁴⁴Binyibiabia Dafidi amutemuna bu Nfumu; a biabia e Mwan’e bi kunyi?

⁴⁵Henyihaha ku mpala kwa bantu boso, balungwile banabe-ba-bukishi’shi:

⁴⁶Dimukai bafundji-ba-mikanda abakyebe kutambuka na mitwelo yila, be na kifulo kia nyimuno mu bisalwe, na bishalelo bia ku mpala mu bitundwilo, na mbalo ya ku mpala ku bidibwa bia kusehela.

⁴⁷Abafina mashibo a bakashi-ba-bafwe, na kuteka nteko yila-yila ya kwilungula: a abo bana bene banakahīshwe ku kimu bikilakile.