Read songe Luka 23 Bible Online

Luka 23 - songe bible

Luka 23

¹Binyibiabia, abebwele kibumbu kiabo kioso, abamutakwishishe ku mpala, ta bende n’e kwi Pilato.

²Ababangile kumwimukila’shi: Uno muntu tubamusañene kwete kulwisha mwīlo wetu, ahelesha (bantu) kulambula Kesala’shi: Ami na mwinyi nyi Kidisitu, Nfumu.

³Biabia Pilato bamwihwishe’shi: Obe we nfumu a Bena Yuda su? E bamwalulwile shi: Obe bwekiakula.

⁴Henyihaha Pilato balungwile batshiite-bakwidi bakata na bibumbu’shi, Nkimumone uno muntu na mwanda.

⁵Ank’abo abakambile kunyisha mwanda’shi: A bembula bantu, kwete kulambukisha kosokoso mu Yudea, kubanga ku Ngadilea mpaa na kuno.

⁶Habahushishe Pilato mwanda wa Ngadilea, bahwishe’shi: A uno muntu mwina Ngadilea su?

⁷Anka kahindji n’aka, habeukile ’shi, e nga ku kihindji kia matalwa a Heloda, batumine kwi Helodo, winyi e badi mu Yelusalema mu ā mafuku.

⁸Binyibiabia Heloda habamwene Yesu basehelele bikata: mwanda badi akyebe kumumona kihindji kila, mwanda bahushishe myanda yibungi ha mwanda we; badi atengyela’shi: ’mone kilengeleshi kikitshibwe kwadi.

⁹Henyihaha bamwihwishe mu myanda yibungi, anka E tamumwalule sunga mpahela.

¹⁰Batshiite-bakwidi bakata na bafundji ba-mikanda abaimene, abanyishishe bikata kumudimbila.

¹¹Biabia Heloda na bantu be ba ngoshi tabamufukula na kumusēnga, abamufwadikile mutwelo auyingayinga, abamwalwishe dimonyi kwi Pilato.

¹²Ha dinyi efuku diadia Pilato na Heloda abekwatenene bukūku; mwanda kwibedi abadi beshikwene’bo banabene.

¹³Binyibiabia Pilato habetamine batshiite-bakwidi bakata, na batontshi ba bantu hamune,

¹⁴bebalungwile’shi: Nubamfwishisha uno muntu bu winyi alwisha bantu, talai namu, tampwila kumutompa ku mpala kwenu, nki musañane mwanda mu uno muntu yinemene mu yinyi myanda yanumwimuka.

¹⁵Ayoyo, sunga Heloda winyi, mwanda nenutumine kwadi, talai takwi mwanda wadi mukite auhwandjikila tufu.

¹⁶Binyibiabia ’mukuhile, ’muhosole.

¹⁷(Mwanda ubadi n’au ngwa kuhosola umune ha bidibwa bia kusehela).

¹⁸Biabia abo boso abanyishishe mayi hamune, eshi: Katusha uno’u, wetuhoswele Balabasa;

¹⁹(e winyi mwelwe mu nshibo ya lukano, ha mwanda wa kutusha bitulu mu kibalo na mwanda wa buntomboshi).

²⁰Binyibiabia Pilato mwanda badi akyebe kuhosola Yesu, bakwile kwabadi dimonyi.

²¹Ank’abo abēle musase’shi: Mubambei ha nkulusu, mubambe ha nkulusu,

²²Biabia e baihwishe diakasatu’shi: A mpa mwanda kinyi, a mbubi kinyi bwadi mukite? Ami nkimumone mwanda wadia kufwila. Biabia ’mukuhile, ’muhosole.

²³Ank’abo abanyingamene na mayi e bukoho, na kukyeba’shi: Abambibwe ha nkulusu. Mayi a abo, n’a batshiite-bakwidi bakata abakambile a boso.

²⁴Henyihaha Pilato batshibile kimu’shi: Biabatekyele bikitshibwe.

²⁵Biabia e bebahoswelele winyi badi mwelwe mu nshibo ya lukano, ha mwanda wa kutusha bitulu na buntomboshi mwabakyebele; anka e bafishishe Yesu (kukita) amukyebela mashimba’bo.

²⁶Habamukunkwishe, abakwete muntu umune Shimona, mwina Sailenia, badi atuku ku mahia, abamutentekyele mutshi uhingishene mwadia kulonda n’au Yesu.

²⁷Kubamulondele kibumbu kikata kia bantu, na kia banabakashi babadi abamudidi namu na lukalo.

²⁸Anka Yesu hakwialula kwabadi, bambile’shi: A bana-bakashi ba ku Yelusalema, tanundjilanga, anka mwīdile’nwe bana bene.

²⁹Talai, mafuku anafikye mwanākule’shi: Mwabi kwi bankunga, na mafu ashī atande bana, na mabele ashī omeshe.

³⁰Henyihaha banakabangye kwakula kwi mangulushi: Etuhonenei, na ku miengye namu’shi: Etubwikilei.

³¹Mwanda su abakitshi yino myanda ha mutshi ubishi, a nkinyi akikakitshibwa ha mutshi ūme?

³²Kubadi bangi babidi namu balwishi babakunkwishwe n’e mu kwihaibwa.

³³Biabia habādi abafiki henyi hantu habatemwinwe bu Kabale, henyi’ho nyi habamubambile ku nkulusu, na benyi balwishi, umune ku mboko yibalume, mungi ku mboko yibakashi.

³⁴Henyihaha Yesu bakwile’shi: A Yaiya, ebalekye le, mwanda tabeuku kiabakitshi. N’abo abābanene bifwalwa bie, bebita bubale.

³⁵Binyibiabia bantu abadi bemane abatala, na batontshi namu tabamufukula’shi: E bahashishe bangi, ehashe e na mwinyi su e Kidisitu musangulwe e Efile Mukulu.

³⁶Basalai namu abamusēngyele, abafikile (kwadi) tabamutambika nfinega,

³⁷eshi: Su obe we nfumu a Bena Yuda ehashe’be na mwinyi.

³⁸Kubadi kifundwe namu kifundjibwe hanundu he mu bishimi bia Ngidiki, na bia Latshine, na bia Bahebelu’shi: UNO WINYI NYI NFUMU A BENA YUDA.

³⁹Henyihaha umune a benyi balwishi abahudikilwe, bamukāyile mulomo’shi: Su obe we Kidisitu, ehash’obe na mwinyi, n’atwe (namu).

⁴⁰Anka mungi bālulwile, amutosha’shi: obe twe mutshine Efile Mukulu, mwanda obe namu we mu kuhīshibwa kumunenka.

⁴¹Anka’twe nkwitulombene, mwanda atutambula bwinyi bwedi bwa bikitshino bietu; anka e tamusole mwanda, ooo.

⁴²Binyibiabia bākwile kwi Yesu’shi: A Nfumwami, ontentekyesha hokāfiki mbufumu bobe.

⁴³Biabia Yesu bamwalulwile’shi: Binyibinyi nakulungula’shi: Lelo’yo uno okekala n’ami mu mpaladisa.

⁴⁴Nguba tabadi bu nsa yisamombo, mufito ubafumankene nsenga yoso mpaa na ku nsa kitema.

⁴⁵Nguba namu bafitshile anka fututu. Kilamba kia lushiko kia mu ntempelo kibabālukile hankatshi.

⁴⁶Henyihaha Yesu habadile n’eyi dikata, bakwile’shi: A Yaiya, natulu kikudi kiande mu māsa obe: habahwile kwakula biabia, batule muwa we.

⁴⁷Binyibiabia winyi mulami a basalai lukama, habamwene bibakitshinwe, tatumbisha Efile Mukulu’shi: Biosobi uno badi muntu mululame.

⁴⁸Biabia bibumbu bioso bia bantu bibekoñene hamune ku wawa mwanda, hakumona mwaubakitshinyinwe, abebabile ha biadi biabo, abālukile.

⁴⁹Na boso abadi bamwiukye, na banabakashi babafikile ku Ngadilea abadi abamulondo, babadi bemane kula, bakwete kubandjila yino myanda.

⁵⁰Talai, kubadi muntu atemunwa bu Yosefo, mwina kimu, badi muntu ebuwa, n’a kululama:

⁵¹(E winyi tabadi mukumine ku binangu na ku’kia abakitshine.) (Badi) mwina Adimatea, kibalo kia Bena Yuda, e na mwinyi namu badi atengyela bufumu bw’Efile Mukulu.

⁵²Uno (muntu) bayile kwi Pilato tatekye kitanda kia Yesu.

⁵³Bekikishe, ekihombela mu kilamba kia linene, ekiladika ’muta ubabangwilwe mwībwe, mubadi tamwaladikilwe kitanda.

⁵⁴Diadi’ efuku dibadi diakulumbula, dia Sabado namu dibefubwile hehi.

⁵⁵Bana bakashi namu abafikile n’e ku Ngadilea, abalondele kunyima, abamwene kilele, na mwabaladikīle kitanda kie.

⁵⁶Biabia abālukile, bakalumbula abinunku mahembwe na mimu ya malashi. Efuku dia Sabado abeikishe mulombene kishila (ki’Efile Mukulu.)