Read songe Luka 3 Bible Online

Luka 3 - songe bible

Luka 3

¹Mu kihwa ki’ekumina bitano kia kumuna kwa (bufumu) bwa Tebeleusa Kesala, habekele Ponteusa Pilata mutontshi mukata a mu Yudea, Heloda namu badi kilolo kia ku Ngadilea, na mukwabo Fidiha badi kilolo kia ku Itulea, na ku luhese lwa Takonetshi; Lesaneasa namu badi kilolo kia ku Abilene.

²Habadi Anasa na Kaifasa bu batshiite-bakwidi bakata, eyi di’Efile Mukulu dibafikile kwi Yoano mwan’a Sakadiasa mu kabāka.

³Bayile ku mpese yoso yibadi hehi na Yodano, badi alungula lubatshisho lwa kwilanga ’mashimba mwa kulekyelwa kwa myanda.

⁴Mukibafundjilwe mu mukanda wa bishima bia Esaiye mutemuki’shi: Eyi dia umune adiele musase mu kabāka’shi: Lumbulai eshinda dia Yehowa, lulamishai bikilo bie.

⁵Mpongo yoso ayikaushibwa, na mangulu oso, na miengye yoso abikayishibwa; (mashinda) ebikonyobikonyo abikaludikwa, na mashinda etukunutukunu ākekala atēmeshwe.

⁶Na ba mbidi boso abakamono kihandjilo ki’Efile Mukulu.

⁷Henyihaha balungwile kibumbu kibatukile kwadi kubatshishwa’shi: Anwe kifuko kia manyoka, a nanyi benudimuna kusuka bukyelo abwanafikye?

⁸Nuhei biabia bikuba bihwandjikile kwilanga kwishimba; tanubanganga kwakula munda mwenu’shi: Twi na Abalahama bu shyetu, ooo, mwanda’mi nenulungula’shi: Efile Mukulu euku kubushisha Abalahama bana ku ano mabwe.

⁹Bino namu, kabengyele nkatulwe ku mushi wa mutshi. Binyibiabia mutshi woso ushyauha bikuba bibuwa aukatshibibwa, welwe mu kālo.

¹⁰Biabia kibumbu kibamwihwishe’shi: A henyihaha atwe atukakitshi na minyi?

¹¹E bebālulwilwe’shi: Sha mitwelo yibidi āhe yawa shi n’ao; e namu na bidibwa akite hamune.

¹²Henyihaha basangishi-ba-milambu abafikile kubatshiswa, abamulungwile’shi: A mulambukishi, atwe atukakitshi na minyi?

¹³Bebalungwile’shi: Tanusangakananga kisubukye kia (mulāmbu) kibenusangwilwe.

¹⁴Basalai namu abamwihwishe’shi: N’atwe atukakitshi na minyi? E bebalungwile’shi: Tanunyengananga bantu, sunga ngumune, tanudimbilanga muntu bisumanga, nukumine efuto dienu na musanku.

¹⁵Habadi bantu abatengyela, na bantu boso abadi abēle binangu mu mashimba’bo ha msanda wa Yoano’shi, su e nyi Kidisitu su e nanyi.

¹⁶Yoano bālulwile kwi boso’shi: Binyibinyi ami nenubatshisha mu mema; anka umune munkile’mi bukome afiki, nkimuhwandjikile kwangula mioshi ya bikondo bie: E akenubatshisha mu Kikudi-E-Selelee na kālo.

¹⁷E na kihehulo mwiasa die, akatosha ha kitwilo kie selelee, akahongwela ngano mu mutengye we, anka mpaha akeyishikye na kālo kashyakashimibwa.

¹⁸Myanda yibungi namu ebalungwile bantu mwilango die.

¹⁹Anka Heloda, winyi badi kilolo, ha kusashilwa kwadi mwanda wa Helodiasa, mpiana a Fidiha mukwabo n’e, na ha mwanda wa myanda yoso ya bubi yibakitshine,

²⁰batentekyele namu uno mwanda hanundu ha yoso, ēla Yoano mu nshibo ya lukano.

²¹Binyibiabia hababatshishwe bantu boso, biabia Yesu babatshishwe namu; na hakuteka, mwiilu mubabulukile.

²²Henyihaha Kikudi-E-Selelee bayikile hadi na mwikēlo wa mbidi bwikutshi, n’eyi dibatukile mwiilu’shi: Obe we Mwan’ande a kifulo, modibe nyi mu nasehela bibi.

²³Yesu na mwinyi tabadi bu bihwamakumi asatu, biabadi mwikale (ahwandjikishwa) mwan’a Yosefe, mwan’a Hedi,

²⁴mwan’a Matata, mwan’a Lefi, mwan’a Meleki, mwan’a Yana, mwan’a Yosefe,

²⁵mwan’a Matateasa, mwan’a Amose, mwan’a Nauma, mwan’a Esedi, mwan’a Nange,

²⁶mwan’a Maata, mwan’a Matateasa, mwan’a Semei, mwan’a Yosefe, mwan’a Yuda,

²⁷mwan’a Yoanano, mwan’a Lehesa, mwan’a Selububele, mwan’a Salatele, mwan’a Nedi,

²⁸mwan’a Meleki, mwan’a Adi, mwan’a Kosama, mwan’a Elemodama, mwan’a Ele,

²⁹mwan’a Yose, mwan’a Ediesa, mwan’a Yodima, mwan’a Matata, mwan’a Lefi,

³⁰mwan’a Shimione, mwan’a Yuda, mwan’a Yosefe, mwan’a Yonana, mwan’a Elaīkimi,

³¹mwan’a Melea, mwan’a Menana, mwan’a Matata, mwan’a Natana, mwan’a Dafidi,

³²mwan’a Yese, mwan’a Obede, mwan’a Boasa, mwan’a Salemona, mwan’a Nashona,

³³mwan’a Aminadaba, mwan’a Lama, mwan’a Hesona, mwan’a Halese, mwan’a Yuda,

³⁴mwan’a Yakoba, mwan’a Isaka, mwan’a Abalahama, mwan’a Tela, mwan’a Nakola,

³⁵mwan’a Seluka, mwan’a Leu, mwan’a Mpeleke, mwan’a Ibele, mwan’a Sala,

³⁶mwan’a Kanana, mwan’a Afakasada, mwan’a Shema, mwan’a Noa, mwan’a Lameka,

³⁷mwan’a Metusala, mwan’a Enoka, mwan’a Yalede, mwan’a Mahalalea, Mwan’a Kanana,

³⁸mwan’a Enosa, mwan’a Sete, mwan’a Adama, mwan’Efile Mukulu.