Read songe Luka 4 Bible Online

Luka 4 - songe bible

Luka 4

¹Biabia Yesu badi muule na Kikudi-E-Selelee, bālukile ku Yodano, bakunkushibwe na Kikudi-E-Selelee mu mahia a kabāka.

²Batompibwe na kafilefile mafuku makumi ananka. Tamudi kintu mu aa mafuku, anka hābaku mbene nsala yibamukwete.

³Biabia kafilefile bamulungwile’shi: Su obe we mwan’Efile Mukulu, kamika dino ebwe dialulukye dimpa.

⁴Yesu bamwālulwile’shi; Kibafundjibwe’shi: Muntu takekala na muwa ku dimpa bisumanga, ooo, anka ku myanda yoso yabākwile Efile Mukulu.

⁵Henyihaha kafilefile hakumukamishe ngulu yikata, bamulesheshe mafumu oso a hanohansenga mu kahindji kahela.

⁶Binyibiabia kafilefile bamulungwile’shi: Nankakuha ano matalwa oso, na ntumbo yao, mwanda bibampelwe, na kwi ese ankyebe nankamuha’bio.

⁷Biabia, s’okandangwila’mi, bioso abikekala biobe.

⁸Anka Yesu bamwālulwile’shi: Nda ku nyima kwande obe Satana, mwanda ubafundjibwe’ shi: Okalangwile Yehowa Efile Mukulu obe, ank’E nyi okafubila.

⁹Binyibiabia bamufishishe ku Yelusalema, bamukamishe ha musaka wa ntempelo, bamulungwile’shi: Su obe we mwan’Efile Mukulu, weituhikye hanka hashi,

¹⁰mwanda ubafundjilwe’shi: Akalayila bamwikeilu be, bakulame.

¹¹Na mās’abo akakutwala, tala okakokola lwā lobe kwibwe.

¹²Biabia Yesu bamwālulwile’shi: Ubākwilwe’ shi: Obe tokatompanga Yehowa Efile Mukulu obe, ooo.

¹³Kafilefile habahudishe mitompo yoso, bakatukile kwadi kihindji.

¹⁴Henyihaha Yesu bālukile ku Ngadilea mu bukome bwa Kikudi-E-Selelee: ntumbo ye yibahalakene ku mpese yoso.

¹⁵Biabia balambukishe mu bitumbwilo biabo, badi atumbishwa kwi boso.

¹⁶Bafikile ku Nasaleta ku bakudile, batwēle mu kitumbwilo h’efuku dia Sabado, bu bibadi kihikwa kie, baimene kubala (mukanda w’Efile Mukulu).

¹⁷Biabia kubamuhelwe mukanda wa mutemuki Esaiye. Habafungulwile mukanda, basañene hantu habafundjibwe’ shi:

¹⁸Kikudi a-Yehowa e handji’mi, mwanda banshingile (mwimu) mu kulungula mukāndu-wibuwa kwi balanda; bantumine kusangulusha mashimba abenyengye; kulungula kuhosolwa kwa misungi, na kubūlwa kwa meso kwi bampofu, kuhosola bafwambukye.

¹⁹Kulungula kwa kihwa kikuminyibwe kia Yehowa.

²⁰Henyihaha bafungile mukanda, bewalwishe kwi mulungudi e Efile, bashalele: Biabia meso a boso abadi mu kitumbwilo abamutadile swee, swee.

²¹Babangile kwibalungula’shi; Lelo uno kino kifundwe ki Efile kibakumbashwa mu matwi enu.

²²Na boso abamwakwidile bibuwa, abakanyine ku bishima bia bu-muntu bibatukile mu kanwa mwe. Biabia abehwishe’shi: A uno tamwan’a Yosefe su?

²³E, bebalungwile’shi: Binyibinyi anukangyele luno lukindji’shi: Obe ñanga ehash’obe na mwinyi: Biatubahushishe bibakitshinwe mu Kahenauma, okite namu muno mu nsenga yenu.

²⁴Ank’ebambile’shi: Binyibinyi nenulungula ’shi: Takwi mutemuki akuminyibwa mu nsenga ya kwabo.

²⁵Anka nenulungula biabinyibinyi’shi: Kubadi bakashi-ba-bafwe bebungi mu Isalele mu mafuku a Elaidja, hakubashitshilwe eilu bihwa bisatu na mieshi yisamombo, habafikile kihuha kikata kia nsala ha nsenga hoso.

²⁶Anka Elaidja tamutumibwe kwi umun’abo, anka ku Saleheta, (kibalo) kia Sidona, kwi mwana mukashi badi a mufwe.

²⁷Kubadi namu basha-kifwi bebungi mu Isalele mu kihindji kia Elaisha mutemuki; takubadi umune mutoshwe, anka Nāmana mwina Sydia.

²⁸Henyihaha boso abadi mu kitumbwilo, hakuhusha yino myanda, abaule nansunguyikata,

²⁹Abebwele, abamutakwile hasha ha kibalo abamukunkwishe ku mulomo wa ngulu habadi hebakwe kibalo kiabo, babadia kumwelē’lundu, akahone mbā.

³⁰Anka e bakile munkatshi mwabo, ēnda mwishinda die.

³¹Biabia, bālalele ku Kahenauma, kibalo kia ku Ngadilea, bebalambukishe ha mafuku a Sabado.

³²N’abo abakanyine ku lulambukisho lwe; mwanda eyi die dibadi na matalwa.

³³Mu kitumbwilo mubadi muntu na kiso kia kikudi kibi, kibēle musase n’eyi dikata’shi,

³⁴Aaa! twi n’obe mwanda kinyi obe Yesu a Nasaleta? Bofiki kwitulwisha su? Nankwiuk’obe n’obe Muhatulwe-a-kishila ’Efile Mukulu.

³⁵Biabia Yesu bamusashile’shi: Umina nyaa, tuka munda mwe. Biabia kikudi kibi hakumuhonesha hashi munkatshi mwabo, batukile munda mwe, tamukumbile, ooo.

³⁶N’abo boso abakanyine, abākushene munkatshi mwabo’shi: Dino eyi ndia kinyi? mwanda akamikā bikudi bibi na matalwa na bukome, n’abio abituku.

³⁷Biabia ntumbo ye yibahalakene ku mpese yoso ya nsenga yibadi hehi.

³⁸Henyihaha bēbwele mu kitumbwilo, batwēle mu nshibo ya Shimona. Muko a Shimona mukashi badi mukwatwe na busungu bukata bwa mbidi yi kālo; biabia abamwiyayile ha mwanda we.

³⁹Biabia bayinamine kwadi, batosheshe busungu bwa mbidi yi kālo, bubamukatukile: kahindji n’aka babukile, ebafubila.

⁴⁰Henyihaha nguba hakuhona, aba bantu boso abadi na bakumbi ba masungu a bihaso na bihaso, abebafishishe kwadi; batentekyele boso maas’e, bebahashishe.

⁴¹Bikudi bibi namu bibatukile munda mwa bantu be bungi, bibēlele musase’shi: Obe we Kidisitu Mwan’Efile Mukulu. Bebisashile na kwibilekesha kwakula: mwanda bibamwiukile’shi, E nyi Kidisitu.

⁴²Habubatokyele, bakatukile, bayile mu mahia a kabāka: na bibumbu bia bantu bibadi abimukimbi, abafikile kwadi kumushadika’shi: Tokatukanga kwatudi.

⁴³Biabia bebalungwile’shi: Tandji n’au ngwa kulungula mukāndu-wibuwa wa bufumu bw’Efile Mukulu ku bingi bibalo namu: nyiu natuminwe.

⁴⁴Binyibiabia balungule (mukānduwibuwa) mu bitumbwilo bia mu Ngadilea.