Read songe Luka 5 Bible Online

Luka 5 - songe bible

Luka 5

¹Bitabibakitshine habadi bantu abamufinyi efina kuhusha mwanda w’Efile Mukulu, e badi mwimane hehi kwishiba dia Ngenesaleta.

²Bamwene mato abidi abadi ku bukunkula kwishiba: anka bampībwe ba mishiha abadi ababuka, tabasula makondja’bo.

³E bayikile mu umune a enyi mata bubadi bwa Shimona, bamwihwishe’shi, afubwishe bwato kihindji ku mema. Bashalele, balambukishe bibumbu bia bantu ku bwato.

⁴Henyihaha habahwile kwakula, balungwile Shimona’shi: Fubwila kwidinji, nwikishe makondj’enu a kukwata mishiha.

⁵Shimona bamwalulwile’shi: Nfumwami tubafuba bufuku boso bushima, tatwibakwate kintu: anka bubibōkul’obe nkatengye bukondja.

⁶Habakitshine biabia abakongyele kibumbu kikata ka mishiha hamune, biabia bukondja bwabo bubasanukile.

⁷Abalobwele bena’bo abadi mu bungi bwato’shi: Fikai kwitukwatshishena. Abo abafikile, abaushishe mato oso abidi, tākyebe kwitshikila.

⁸Habamwene Shimona Petelo (biabia) bahonene hashi ku manwi a Yesu’shi: A Nfumwami katuka kwandji, mwanda nyi muntu mulwishi.

⁹Mwanda bakanyine bikata, na boso abadi n’e, ha mwanda wa bungi bwa mishiha yiabakwete.

¹⁰Anka hamune namu Yakoba na Yoano, bana ba Sebede abadi abekwashena na Shimona. Biabia Yesu balungwile Shimona’shi: Tokwatshibwanga na moo; binobino, mpaa na kumpala okalobo bantu.

¹¹Habafishishe mato ku mahia, abalekyele bioso, tabamulondo.

¹²Bitabibakitshine, habadi mu kingi kibalo, talai, muntu badi kwanka mumoshwe na kifwi; e, hakumona Yesu, bahone, akuhila mpala hashi, bamwiyayile’shi: Nfumwami s’okumina weuku kuntosha.

¹³N’e bōlwele mboko ye, amukuma’shi: Nakumina, wekale mutoshibwe. Kahindji n’aka busungu bwa kifwi bubamukatukile.

¹⁴Bamukayikile’ shi: Tolungulanga muntu, sunga ngumune; anka ndokeleshe kwi tshiite mwakwidi, olambule ha mwanda wa kutoshibwa kobe, bubibakamikile Mosesa, kwikala kwabadi bu kamonyi.

¹⁵Anka nkumo yibakambile kuhalakana ha mwanda we, na bibumbu bikata bibekoñene kuhusha na kuhashibwa ku masungu abo.

¹⁶Biabia bakungulukile, ēnda mu kabāka, tatekye.

¹⁷Bitabibakitshine, ha ding’efuku habadi alambukisha, kubadi Bafadiseo, na balambukishi bakata ba mukandawa-bishila, abadi bashale hehi abafwile ku bibalo bioso bia mu Ngadilea na ku Yudea, na ku Yelusalema; na bukome bwa Yehowa bubadi kwanka kwibahasha.

¹⁸Abo’shi, tutale’bi bana balume abafikile na muntu mutwalwe ha lusala, mukwatwe na busungu bwa lunkalabe, abakimbile kwa kumutwesha, na kumutula ku mpala kwe.

¹⁹Habakutshilwe kumona ha kumutwesha ha mwanda wa kibumbu, abakamine ku masaka wa nshibo, bamwisha hankatshi ha mbambalo, ha lusala lwe, mpaa na ku mpala kwa Yesu.

²⁰Biabia habamwene lukuluhilo lwabo, bamulungwile’shi: Mulumiana, milwisho yobe yibakulekyelwa.

²¹Biabia Bafundji-ba-mikanda na Bafadiseo, ababangile kuhakanya munda’shi: A uno nanyi e na kasābu-kakanwa? A nanyi euku kulekyesha milwisho anka Efile Mukulu na mwinyi?

²²Anka Yesu hakushingula binangu biabo, bebālulwile’shi: A nkinyi kianuhakanya ’ashimb’enu?

²³A kibakidi kubofule nkinyi? kwamba’shi: Milwisho yobe yibakulekyelwa, su nkwamba’shi: Ebwē, otambukye?

²⁴Anka bianudia kwiuka’shi, Mwan’a Muntu e na matalwa kulekyela milwisho hanohansenga, balungwile winyi mukwatwe na busungu bwa lunkalabe’shi: Nankulungula’shi: Ebwe, weboshe lusala lobe, wende ku nshibo yobe.

²⁵Biabia kahindji n’āka bēbwele ku mpala kwabo, bebosheshe kiabadi mulale, bakatukile, ēnda ku nshibo ye, badi atumbish’Efile Mukulu.

²⁶Biabia boso abakanyine, abatumbish’Efile Mukulu, na moo ubebakwete’shi: Tubamono bia lubasu lelo.

²⁷Ku nyima kwa yino myanda batukile, bamwene mulambushi a milambu, eshina die bu Lefi, badi mushale ha kilambwilo; bamulungwile’shi: Ndonde.

²⁸E balekyele bioso, bebwele, bamulondele.

²⁹Lefi bamutēkyeshe kidibwa kikata mu nshibo ye: kwanka kubadi kibumbu kikata kia balambushi ba milambu, na kia bangi abadi bashale n’abo.

³⁰Anka bafundji-ba-mikanda babo na Bafadiseo abadi abaununa bana be ba bukishi’shi: A nkinyi kianudila na kutomana balambushi ba milambu na balwishi?

³¹Biabia yesu bebālulwile’shi: Abo be ’musangela ta be na lukalo lwa ñanga, ooo, ank’abo basha busungu.

³²Ami nkimufwile kwita nyina balulame ba mashimba, anka balwishi belangye.

³³Abo abamwihwishe’shi: A nkinyi bana-ba-bukishi ba Yoano abashila biakudia misusa na misusa, na kuteka nteko n’aba ku Bafadiseo namu anka hamune; anka bobe abadi n’abatomo?

³⁴E bebālulwile’shi: Anwiuku kushidisha bana ba mubambi biashi, hakī mubambi n’abo su?

³⁵Anka mafuku akafiki ha kuatwa mubambi kwabadi, henyihaha abakushidi biakudia mu aa mafuku.

³⁶Bebalungwile namu lukindji’shi: Takwi muntu a kwela kihese kia mbwisha yihya ku mutwelo ukulu; mwanda su ekitela kwanka, kinyi kihya akikasanukidila, na kinyi kihindji kibalamunwa ku kinyi kihya tankilombana na kikulu, ooo.

³⁷Takwi muntu namu akulongyesha nfinyo yihya mu madimba a misokya yikulu tala nfinyo yihya yiakatubula madimba, yiakasumbuka, biabia madimba akalwila namu.

³⁸Anka nfinyo yihya ngihwandjikile kulongyesha mu madimba a misokya yihya, biabia bioso abikabombela kalolo.

³⁹Takwi muntu namu hahu kutoma (nfinyo) yikulu, anka hanka nyi takyebe yihya: mwanda ākula’shi, Yikulu ngikile buwa.