Read songe Luka 6 Bible Online

Luka 6 - songe bible

Luka 6

¹Bitabibakitshine h’efuku dia Sabado dia kabidi, badi akidi mu mafuba a ngano, na bana-be-ba-bukishi abadi abakulu ngano, tabeyikunyu maasa, badianga.

²Bangi ba ku Bafadiseo abebehwishe ’shi: A nkinyi kianukitshi ki shidikwe h’efuku dia Sabado?

³Yesu bebālulwile’shi: Tanwibabale sunga kiakia kibakitshine Dafidi habadi na nsala, e na mwinyi n’aba babadi n’e.

⁴Mubatwelele mu nshibo y’Efile Mukulu, āta mampa aleshwe ku meso kw’Efile Mukulu, e adia, e aha namu babadi n’e, ao abadi ashidikwe kishila kudibwa, anka kwi batshiite-bakwidi buhenka.

⁵Biabia bebalungwile’shi: Mwan’a muntu namu nyi Nfumu a Sabado.

⁶Bitabibakitshine ha dingi dia Sabado namu batwēle mu kitumbwilo, alambukisha: Mwanka mubadi muntu badi na mboko ye yibalume yifwe.

⁷Biabia bafundji-bamikanda na Bafadiseo abamutadile su akahwisha h’efuku dia Sabado; bamone mwabadia kumwimukila.

⁸Ank’e beukile binangu biabo, balungwile muntu badi mufwe mboko’shi: Ebwe, wemane hankatshi. Biabia bebwele, emana hanka.

⁹Binyibiabia Yesu bebalungwile’shi: Nankenwihusha mwanda umune; Nkihwandjikile mwifuku dia Sabado kukita bibuwa’nyi, su nkukita bibubi? kuhasha muwa, su nkwiulwisha?

¹⁰Hakutala boso, abadi bamwifunye, balungwile winyi muntu’shi: Ola mboko yobe; bakitshine biabia, na mboko ye yibahandjile bu yikwabo.

¹¹Biabia abakwetwe na nsungu yikalabale, tabelungushena mwabadia kukitshina Yesu.

¹²Bitabibakitshine mu aa mafuku, bayile ku ngulu mu kuteka; batosheshe bufuku boso na luteko kw’Efile Mukulu.

¹³Habubatokyele, betamine bana-beba-bukishi, basangwile ekumi na babidi munkatshi mwabo, bebaudikile bu batumibwa.

¹⁴Shimono (abaudikile namu bu Petelo) na mukwabo Andeleo, na Yakoba, na Yoano, na Fidiha, na Batolomyu,

¹⁵na Mateo, na Tomase, na Yakoba, mwan’a Alafeasa, na Shimona ayitanyinwa bu Selote.

¹⁶Na Yudasa (mukwabo) na Yakoba, na Yudusa Isakadiota, winyi badi mwihulukile.

¹⁷Balalele n’abo, bemene mwibanda, na kibumbu kia bana-be-ba-bukishi, na kibumbu kikata kia bantu ku mpese yoso ya Yudea na ku Yelusalema, na ku bukunkula kwa mema a Tyila na Sidona abafikile kumuhusha, na huhashibwa ku masungu abo.

¹⁸N’abo abamweshwanga malwa na bikudi bia butete abahashibwe.

¹⁹Biabia kibumbu kioso kibakyebele kumukuma; mwanda bukome bubatukile kwadi bwa kwibahasha boso.

²⁰Henyihaha babushishe meso e ha bana-be-ba-bukishi’shi: Mwabi wikale kwi’nwe balanda, mwanda bufumubw’Efile Mukulu mbwenu.

²¹Mwabi ngwenu (anwe) be nansala binobino, mwanda anukēkuta. Mwabi ngwenu (anwe) abadidi binobino, mwanda anuka sehela.

²²Mwabi ngwenu habakenushikwa kwi bantu, na habakenulamuna (munkatshi mwabo,) na kwinutohēka, na kusumbula eshina dienu bu dibi, ha mwanda wa Mwan’a Muntu.

²³Nusehele mu diadi’efuku, nutumbukye mwanda wa tuseho; mwanda bwedi bwenu mbukata mwiilu; mwanda bashabo-kulu abakitshine anka biabia kwi batemuki.

²⁴Anka mpombo kwanudi anwe bampeta! mwanda nubahu kutambula kisambilo kienu.

²⁵Mpombo kwanudi anwe bēkute, mwanda anukakwatwa na nsala. Mpombo kwanudi anwe abasehela binobino! mwanda anukōkakana na kudila mpolo.

²⁶Mpombo kwanudi ahakenwakwila bantu boso buwa! mwanda biabia nyi bibakitshine bashabo-kulu kwi batemuki ba madimi.

²⁷Anka nenulungula’nwe abahusha, ami’shi: Ikalai na kifulo kwi benushikwe; nukite bibuwa kwi be n’enu mushikwa.

²⁸Nuele mwabi kwi abenuele muloa, nutekyele abenuhombola.

²⁹Kwi’wa akukuhila kwi’tama dimune, omwa lulwile dingi namu; akukwata mutwelo wobe, tomutunanga kuata ekotshi diobe namu.

³⁰Kwi muntu oso enutekye, omuhe; n’awa akukwata bintu biobe, tomukyendanga.

³¹Bianukyebe bantu kwinukitshina, biabia anwe namu kebakitei anka biabia namu.

³²Mwanda su nwi na kifulo kwi be n’enu kifulo, anukatumbulwa na minyi? mwanda balwishi namu be na kifulo kwi be n’abo kifulo.

³³Su anukitshi bibuwa kwa’benukitshi bibuwa, anukatumbulwa na minyi? mwanda balwishi abakita anka hamune.

³⁴Su anwāhusha kwi ’banukuluhila kutambula dimonyi, anukatumbulwa na minyi? mwanda balwishi namu abeahushā kwi balwishi ha mwanda wa kutambula kilombane dimo.

³⁵Anka’nwe nwikale na kifulo kwi be n’enu mushikwa, nukite bibuwa; tanwahushanga na kutengyela dimonyi sunga mpahēla, biabia bwedi bwenu abukekala bukata, anukekala bana ba Mukile boso bukata, mwanda e na kalolo kwi bashī na lutumbu na kwi balwishi.

³⁶Binyibiabia nwikale na kanya, bu Shyenu namu e na kanya.

³⁷Tanuhwandjikishanga (muntu mwanda), biabia anwe (namu) tanukahwandjikishwa: tanuhīshanga (muntu) n’anwe (namu) tanukahīshwa: nulekyele, biabia anwe (namu) anukalekyelwa.

³⁸Nuhane, anukahebwa, kihimo kibuwa, kifitshinwe, kikonkwe hamune, kikwete kusumbuka akikenuhebwa na ku kiadi kienu. Mwanda ku kiakia kihimo kianuhimi, akikenuhiminwa kwanudi dimonyi.

³⁹Biabia bebēle lukindji’shi: Mpofu euku kukunkusha mpofu n’e su? tabakahono boso m’bwina?

⁴⁰Mwan’a bukishi takilā mulambukishi e bukata; anka ese muntu mulombane akekala bu mulambukishi e.

⁴¹A nki nyi kiotala kasoma ke mwīso dia mukwenu, anka bokutwa kumona mulamba wi mwīso diobe’be na mwinyi?

⁴²Ouku na minyi kwamba mukwenu’shi: A mukwetu, okyebe nkukatushe kasoma ke mwīso diobe, obe na mwinyi twemumone mulamba wi mwīso diobe’u. Obe nsesa, badila kukasha mulamba wi mwīso diobe, biabia okamono biya mwa kukashisha kasoma ke mwīso dia mukwenu.

⁴³Mwanda mutshi wibuwa tauheya bikuba bibubi sunga mutshi ubi tauheya bikuba bibuwa.

⁴⁴Mwanda mutshi woso awiukibwa ku bikuba biao. Mwanda bantu tabakulā bikuba bia kikuku ku mitshi ya milobo, sunga kwahula bikuba bia mioshi ya nfinyo ku tusanyungu.

⁴⁵Muntu ebuwa atusha bibuwa bu mwabidi bilombeleshwe bibuwa mwishimba die, na muntu mubi atusha bibubi bu mwabidi bilombeleshwe bibubi mwishimba die; mwanda ku bifwime bi mwishimba die, nyi kwe bikulu ku kanwa kwe.

⁴⁶A nkinyi kianuntemwina’shi: Nfumu, Nfumu, anka tanukitshi mwanakwila?

⁴⁷Awa afiki kwandji’mi na kuhusha bishima biande, na kwibikita, nankenulesha adi mwifwane.

⁴⁸E mwifwane muntu baibakile nshibo, babundwile mula, batudile kibangilo ha lubwebwe; na habaule mema na mu mambwe, myeshi yibakuhile bikata ha yaya nshibo, yibakutshilwe kwiyisanyisha, mwanda yibebakilwe ha lubwebwe.

⁴⁹Anka yawa ahusha, na takitshi, e ’mwifwane muntu baibakile nshibo ye ha nsenga yishī na kibangilo: biabia myeshi yibeyikuhila bikata, na kahindji n’āka yibahone; biabia mulwikilo wa yaya nshibo ubadi ukata.