Read songe Luka 7 Bible Online

Luka 7 - songe bible

Luka 7

¹Henyihaha habahudishe mīsambo ye yoso mu matwi a bantu, batwēle mu Kahenauma.

²Biabia mpika a mulami a basalai lukama abadi n’e kifulo, badi na busungu hehi na kufwa.

³Habahushishe mukāndu wa Yesu, batumine bakulu ba bena Yuda kwadi kumusendela’shi, afikye ahashe mpik’ande.

⁴Abo, habafikile kwi Yesu, abamwiyayile’nka hanka’shi: E muhwandjikile biodia kumukitshina biabia.

⁵Mwanda e mukumine mwilo wetu, betwibakile kitumbwilo.

⁶Binyibiabia Yesu bayile n’abo; na habadi hehi ku nshibo, mulami a basalai lukama batumine bakūku be kwadi’shi: A Nfumu, tokalakalanga; mwanda’mi nkimuhwandjikil’obe ku twela mu nshibo mwande, ooo.

⁷Biabia namu nkimutentekyesha’shi, nyi muhwandjikile kufika kodi, ooo: anka wakul’eyi, na mpik’ande akahanda.

⁸Mwanda’mi namu nyi muntu mutulwe mushi mwa matalwa; nyi na basalai mushi mwande, ami nalungula mungi’ shi: Nda, biende; na kwi mungi’nyi’shi: Fika, biafiki; kwi mpik’ande namu’shi: Kita biabia, biakitshi.

⁹Habahushishe Yesu biabia, bamukanyine, bealulwile kwi kibumbu kibamulondanga’shi: Nenulungula’shi: Nkimusañane lukuluhilo lukata biabia, ooo, sunga mu Isalele.

¹⁰N’abo abatuminwe, hakwaluka ku nshibo, abasañene mpika badi akumbu tadi musangēla.

¹¹Bitabibakitshine h’efuku dia kulonda, bayile mu kibalo akilumbwa bu Naine; na bangi ba bana-be-ba-bukishi abayile n’e, na bantu be bungi.

¹²Binyibiabia habafikile hehi ku kibelo kia kibalo, talai, kubadi kutwadibwe mufwe hasha, badi mwan’eleka a nyin’e; namu badi mukashi a mufwe; na bantu be bungi ba mu kibalo abadi n’e.

¹³Nfumwetu habamumwene, bamukwatshile lusa, bamulungwile’shi: Todilanga mpolo.

¹⁴Befubwile hehi, bakumine muselo, babadi batwale abemene. E bakwile’shi: Obe nsongwalume nakulungula’shi: Buka.

¹⁵Na yawa badi mufwe babukile, ashala, babangile kwakula. Bamutule kwi nyin’e.

¹⁶Boso abakwatshibwe na moo; abatumbishe Efile Mukulu’shi: Mutemuki mukata bamweka munkatshi mwetu; dimonyi’shi: Efile Mukulu basamba bantu be.

¹⁷Yino nkumo y’e yibahalakene moso mu Yudea, na ku mpese yoso yibadi hehi.

¹⁸Biabia bana-ba-bukishi ba Yoano abamulungwile yino myanda yoso.

¹⁹Binyibiabia Yoano baitanyine bana-beba-bukishi babidi, bebatumine kwi Yesu’shi: Obe nyi winyi atutengyelanga kufika, su atutengyela mungi?

²⁰Habafikile baba bana balume kwadi, abakwile’shi: Yoano Mubatshishi betutumu kodi’shi: Obe nyi winyi atutengyelanga kufika, su atutengyela mungi?

²¹Ku yawa nguba bahashishe bebungi ku masungu, na ku bihuha, na ku mikishi yibi; na kwi bampofu bebungi bebahele meso.

²²Henyihaha Yesu biakibālula’shi: Ndai mwishinda dienu, nulungule Yoano bianubamono na bianubahusha; mubatambwila bampofu meso, basha bilema abatambuka, basha kifwi abatoshwa, basha bitwi abahusha, bafwe ababushibwa, na kwi balanda kubalungulwa mukānduwibuwa.

²³Mwabi kwi yawa shī muntombokyele.

²⁴Habakatukile mikiendji ya Yoano babangile kwakula kwi bibumbu ha mwanda wa Yoano’shi: A nkinyi kianubayidile kumona mu kabāka? Elengye adisanyishibwa na luhahi su?

²⁵Anka a nkinyi kianubayidile kutala? Nyi muntu mufwale bifwalwa bibuwa bukalabale su? Talangai, abo abafwadikwa na bifwalwa bibuwa bukalabale, be na muwa wabo mu buheta, be mu mpoho ya banfumu.

²⁶Anka nkinyi kianubayidile kumona? Mutemuki su? Ee, nenulungula’shi: E mukididīle mutemuki.

²⁷Unonyi (winyi) bafundjilwe’shi: Talai, natumine mukiendji wande ku mpala kobe, aukakulumbulwila eshinda diobe ku meso kobe.

²⁸Mwanda nenulungula’shi: Munkatshi mwa batandjibwe na bakashi, takwi mutemuki mukile Yoano Mubatshishi bukata; anka yawa ’mukile buhela mu bufumubw’Efile Mukulu nyi mukile e bukata.

²⁹Biabia bantu boso abahushishe, na balambushi-ba-milambu ababingishe Efile Mukulu, abadi ababatshishibwa na lubatshisho lwa Yoano.

³⁰Anka Bafadiseo na bahatudi-ba-bishila, abo ba na bene abatune binangu bi’Efile Mukulu, mwanda tababadi babatshishibwe (kwi Yoano).

³¹Biabia Nfumwetu bakwile’shi: Nankahwandjikisha bantu ba kino kihungilo bu kinyi? A mbefwane kinyi?

³²Mbefwane bana bakinga bashale mu kisalwe, abeitanyishena, na kwakula’shi: Tubeñombela, anka’nwe tanwibāshe, tubenudīla, anka’nwe tanwibadīle.

³³Mwanda Yoano Mubatshishi bafikile, tabadi adi mampa sunga nkutoma nfinyo: anwe tanwakula’shi: E na kikudi kibi.

³⁴Mwan’a muntu mufikye kwete kudia na kutoma; anwakula’ shi: Talai nkipyafi na bu ntomi a nfinyo, kūku a balambushi-ba-milambu na balwishi!

³⁵Anka binangu bibabingishwe kwi bana ba’bio boso.

³⁶Biabia umune a ku Bafadiseo bamwihwishe kudia n’e. Batwēle mu nshibo ya Mufadiseo, bashalele ku bidibwa.

³⁷Biabia talanga mwana mukashi a mu kibalo, badi mulwishi, habeukile’shi, (Yesu) mushale kudia mu nshibo ya Mufadiseo, bafikile na kalangi (k’ebwe) di’alabasata kabadi mwimu wa malashi.

³⁸Bemene ku ngwa ye, kunyima tadidi mpolo, babangile kusula ngwā ye na mpolo (ye), beyikumwine na nyene ya ku mutwe we, banyishishe kumufifya ku ngwā ye, na kwiyishinga mwimu.

³⁹Binyiabibia winyi Mufadiseo bamwitamine kudia n’e, habamwene biabia, bākwile munda mwe’ shi: Uno (muntu) su ekalanga mutemuki, badia kwiuka uno mwana mukashi na nyikashi ye biabamukumu, mwanda e mulwishi.

⁴⁰Biabia Yesu bamwālulwile’shi: Shimona, nyi na mwanda kukulungula. E bakwile’shi: Mulambukishi akula.

⁴¹Kubadi mwāhushi, badi mwāhuiwe na bantu babidi, umune badi na kishio kia ndenadi ya bu nkama yitano, mungi makumi atano.

⁴²Hababakutshilwe biakumufuta, bebalekyelele bubidi bwabo. Binyibiabia ndungule akakidi n’e kifulo ku baba babidi?

⁴³Shimona bamwālulwile’shi: Nahwandjikisha’shi, anka yawa abalekyela yikile. Biabia (Yesu) bamulungwile’shi: Botshibi bibuwa.

⁴⁴Bealulwile kwi mwana mukashi, balungwile Shimona’shi: Omono uno mwana mukashi? Natwēle mu nshibo yobe, twemumpe mema a kusula ngwā yande, ank’e beyitohesha na mpolo, na kwiyikumuna na nyene ya ku mutwe we.

⁴⁵Obe twemunyimune lwimu lwa ku kanwa, anka uno mwana mukashi, kashā ntwele tamulekye kunyimuna ku ngwā yande na lwimu lwa nkanwa.

⁴⁶Obe twemufikinye mutwe wande mwimu; ank’uno mwana mukashi bafikinya ngwā yande na mwimu.

⁴⁷Nyi ha mwanda uno nankulungula’shi: Milwisho ye yi bungi yibamulekyelwa; mwanda badi na kifulo kikata: anka kwi yawa mulekyelwe bihela (e namu) e na kifulo kihela.

⁴⁸Biabia bamulungwile’shi: Milwisho yobe yibalekyelwa.

⁴⁹Binyibiabia aba babadi bashale n’e ku bidibwa, ababangile kwakula munda mwabo’shi: A uno namu alekyela milwisho nanyi?

⁵⁰Henyihaha balungwile mwana mukashi’shi: Lukumino lobe lubakuhasha; nda na kufukama.