Read songe Luka 9 Bible Online

Luka 9 - songe bible

Luka 9

¹Henyihaha betanyine bana-be-ba-bukishi ekumi na babidi hamune, bebahele bukome na matalwa kunundu kwa bikudi bibi bioso, na kuhwisha masungu oso.

²Bebatumine kulungula bufumu bw’Efile Mukulu, na kuhwisha basha masungu.

³Bebalungwile’shi: Tanutwalanga kia ha luendo, sunga mukombo sung’edimba, sunga mampa sunga mono: sunga makotshi abidi.

⁴Mu nshibo yoso yanukatwele, nwikale mwanka mpaa na hanukatuku.

⁵Boso bashyabakenukukila, hakukatuka ku kiakia kibalo, nwikukule lufūfi lwa ku ngwā yenu kwikala bu kamonyi ku mpala kwabo.

⁶Abo abakatukile, bēnda mu bibalo bioso mu kulungula mukāndu-wibuwa, na kuhwisha (masungu) kosokoso.

⁷Binyibiabia Heloda kilolo bahushishe bioso bibakitshine (Yesu) badi na mialasheno, mwanda bangi abākwile’shi: Nyi Yoano babuku ku lufu.

⁸Bamo’shi: Elaidja bamweka; na bangi’ nyi’shi: Ngumune a mu batemuki ba kala basanguka dimo.

⁹Biabia Heloda bakwile’shi: Yoano namutshibile mutwe, anka unou namu nanyi anahusha bino bintu? Binyibiabia bakyebanga kumumona.

¹⁰Batumibwa habālukile, abamulungwile bioso biabakitshine. Biabia bebātshile, benda ku bukunkula mbufyefye, kukihindji ki kabāka, ka ku kibalo akitemunwa bu Betesaida.

¹¹Biabia bibumbu bia bantu habibeukile abamulondele, e bebakukile, bākwile n’abo ha mwanda wa bufumu bw’Efile Mukulu, bahwishishe babadi na lukalo lwa kuhwishibwa.

¹²Habadi nguba takyebe kuhona, biabia b’ekumi na babidi abefubwile kwadi; abamulungwile’shi: Takula kibumbu, kiende mu bibalo na ku mpese yoso yi hehi, kwa kulala na kumona bidibwa; mwanda’ twe kuno twi mu mahia a kabāka.

¹³Ank’e bebalungwile’ shi: ebahei’nwe biakudia. Abo abakwile’shi: Tatwi n’abio, anka mitanda yitano ya mampa, na mishiha yibidi; anka su tuenda mu kūdila bano bantu boso biakudia.

¹⁴Mwanda abadi bana balume bu binunu bitano. Biabia balungwile bana-be-ba-bukishi’shi: Ebashadikyei kibumbu makumi atano, kibumbu makumi atano.

¹⁵Biabia abakitshine, abashadikile boso.

¹⁶Henyihaha e bātshile mampa atano na mishiha yibidi, babushishe meso mwiilu, bebitekyele mwabi, bebitshokwele, bashele bana-be-ba-bukishi kutula ku mpala kwa bibumbu.

¹⁷N’abo abadile, boso abekwite; kubasangwilwe bihese bibashele, bisele bi’kumi na bibidi.

¹⁸Bitabibakitshine habadi mu kuteka buhenka, bana-beba-bukishi abadi n’e: e bebahwishe’shi: A bantu abākula’mi’shi, nanyi?

¹⁹Abo abālulwile’shi: Mbu Yoano Mubatshishi; anka bangi’shi: Elaidja; bangi’shi: Ngumune a batemuki ba kala basanguka dimo.

²⁰Biabia bebambile’shi: Ank’anwe añunamba’shi, nyi’nyi? Petelo bālulwile’ shi: We Kidisitu ’Efile Mukulu.

²¹Bebalungwile bi bukoho, na kwibakayika’shi: Tanulungulanga muntu uno mwanda.

²²Eshi, Mwan’a Muntu anka kufwambuka mu bia malwa bibungi, na kuhedibwa kwi bakulu, na kwi batshiitebakwidi bakata, na kwi bafundji-ba-mikanda, nakwihayibwa, na kusanguka h’efuku dia kasatu.

²³Bebalungwile boso’shi: Su kwi muntu akandondo, ehele na mwinyi, eboshe nkulusu ye kwifuku n’efuku, andonde.

²⁴Mwanda ese akyebe kuhasha muwa w’e, akeushimisha; ank’ese akeshimisha muwa we ha mwanda wande, e akeuhasha.

²⁵Mwanda muntu asungula kinyi, su atambula nsenga yoso, anka e na bene’nyi beshimisha, su nkusumbudibwa?

²⁶Mwanda ese ammwena būfu na bwa myanda yande kumune, Mwan’a Muntu namu anamumwene būfu hanakafikye mu ntumbo ye na mwinyi, na ya Nshye, na ya bamwikeilu balamunwe-bakishila.

²⁷Anka nenulungula bia binyibinyi’shi, kwi bamo bemane hano, tabakamono lufu, mpaa na habakamono bufumu bw’Efile Mukulu.

²⁸Bitabibakitshine ku nyima kwa yino myanda, ha kukila hehi mafuku mwanda, bātshile Petelo na Yoano, na Yakoba, abakamine ku ngulu mu kuteka.

²⁹Habadi atekye, mwikelo wa mpala ye yibālulukile, na bifwalwa bie bibatokyele na kuhenyahenya.

³⁰Biabia, talangai, kubadi bana balume babidi, abēsambile n’e, nyi Mosesa n’Elaidja.

³¹Abamwekyele mu ntumbo, abēsambile mwanda wa lufu lwe lubadi akakumbasha ku Yelusalema.

³²Anka Petelo na babadi n’abo abanemenenwe na tulo, habadi ababuku, abamwene ntumbo ye, na bana balume babidi abadi bemane n’e.

³³Bitabibakitshine, habakatukile kwadi, Petelo bākwile kwi Yesu’shi: A Nfumwami, bibuwa atwe kwikala hano; tushimikei bitanda bisatu; kimune nkiobe, kimo nkia Mosesa, na kingi nkia Elaidja: anka tamwiukye kibadi ākula.

³⁴Habadi ākula biabia, kubafikile ekumbi, diebabwikila; n’abo abakwetwe na moo habebabwikile ekumbi.

³⁵Biabia eyi dibatukile mwikumbi’shi: Uno nyi Mwan’ande a kifulo: Numwifwakene.

³⁶Habakile dino eyi, abamwene’nka Yesu buhenka bwe. N’abo abauminyine, tababalungwile muntu, sunga ngumune mu aa mafuku biabia bintu biabamwene.

³⁷Bitabibakitshine, h’efuku dia maloba, habayikile ku ngulu, bantu bebungi abafumankene n’e

³⁸Biabia mwana mulume a mu kibumbu bēle musase’shi: Mulambukishi, nakwiyayila, tala kwi mwan’ande mulume, mwanda e mwan’nade eleka.

³⁹Tala, mukishi aumukwata, hahindji n’āka tēle ngese: aumunyengye, na kusunya na kutusha mafulu ku kanwa, na kumusosa mbidi taukyebe kumuleka, ooo.

⁴⁰Nasendelele bana bobe-ba-bukishi kumubinga, ank’abo abakutshilwe.

⁴¹Yesu bālulwile’shi: Anwe kihungilo kia bashyakukuluhilwa, basha mpuha, a nankekala n’enu kihindji ki na minyi na kwinulekyela? Fwisha mwan’obe kuno.

⁴²Habadi kwete kufika, kikudi kibi kibamukuhile hashi, kibamunyengele. Biabia Yesu basashile kikudi kibi, bahashishe mwana, bamwalushe kwi nshye.

⁴³Biabia boso abakanyine ku bukome bukata bw’Efile Mukulu. Anka habadi abakanya boso ku bioso bibakitshine Yesu, e balungwile bana-be-ba-bukishi’shi:

⁴⁴Yino myanda yitwele biya mu matwi enu: mwanda Mwan’a Muntu akatulwa mu maasa a bantu.

⁴⁵Ank’abo tambashingule uno mwanda ubebafīlwe bia bashyakwiuka, abatshine namu kumwihusha’o.

⁴⁶Binyibiabia kubabukile mpaka munkatshi mwabo’shi: Nanyi akekala mukile bukata a atwe boso?

⁴⁷Anka Yesu hebeukile biabadi abatentekyesha mu binangu biabo, bātshile mwana mukinga, amutula hadi.

⁴⁸Biabia beba lungwile’shi: Ese akatambula uno mwana mukinga mwishina diande, antambula’mi: n’ese akantambula’mi, atambula bantumine: mwanda yawa mukile buhela munkatshi mwenu boso, nyi winyi akekala mukata.

⁴⁹Binyibiabia Yoano bālulwile’shi: A Nfumu, tubamwene muntu badi abingi bikudi bibi mwishina diobe; atwe twamutosha mwanda ta mulondji n’etu.

⁵⁰Biabia Yesu bamulungwile’shi: Tolekyeshanga; mwanda yawa shyatuhishene n’etu nyi ngetu.

⁵¹Bitabibakitshine, habadi mafuku akwatshibwa kwe tadi akumbana, bashinyikile mpala kwenda ku Yelusalema.

⁵²Biabia babadishishe mikiendji ku mpala kwe; abayile, batwela mu kibalo kia Bena Samadia kumulumbulwila (mbalo)

⁵³Abo tambamukukile, ooo, mwanda mpala ye yibadi bu akyebe’ nka kwenda ku Yelusalema.

⁵⁴Bana-be-ba-bukishi, baYakoba na Yoano, habamwene (biabia) abakwile’shi: A Nfumwetu, okumina’twe kwitanyina kālo kayikye kwiilu, kebashikye fututu bu bibakitshine Elaidja su?

⁵⁵Ank’e bealulwile, ebatosha’shi: Tanwiuku mwikelo wa kikudi kia nwi n’akio.

⁵⁶Mwanda Mwan’a Muntu tamufwile kulwisha miuwa ya bantu, ooo, anka kwiyihasha. Biabia abayile ku kingi kibalo.

⁵⁷Bitabibakitshine habayile mwishinda, muntu’mune bamulungwile’shi: A Nfumwami, nankakulondo kosokoso kōkende.

⁵⁸Yesu bamulungwile’shi: Miseuyi na mena, na ha kutula mutwe (we).

⁵⁹Balungwile mungi’shi: Ondonde. Ank’e bakwile’shi: A Nfumwami banda kundeka, nyende nkashikye nshyami kwibedi.

⁶⁰Yesu bamulu ngwile’shi: Bafwe bashikye bafwe babo, ank’obe nda, olungule bia bufumu bw’Efile Mukulu.

⁶¹Mungi namu balewile’shi: A Nfumwami, nankakulondo, anka ondekye mbande kwenda kwibedi kulaa be kwetu ku nshibo kwande.

⁶²Biabia Yesu bamulungwile’shi: Takwi muntu akwata lukasu kwiasa, atala kunyima, biabia tamuhwandjikile bufumu bw’Efile Mukulu, ooo.