Read songe Yoano 11 Bible Online

Yoano 11 - songe bible

Yoano 11

¹Kubadi muntu badi akumbu, eshina die bu Lasalasa, Mwina Betani, kibalo kia Madia na mukwabo Mata.

²(Winyi Madia bashingile Nfumwetu na mwimu wa mahembwe, amuhampula ngwa ye na nyene ye; ndumiana’be Lasalasa badi na busungu).

³Hankashian’E babamutuminyine mwanda’shi: A! Nfumwetu, uno odi ne kit’ulo bakumbu.

⁴Habahushishe Yesu (uno), bambile’shi: Abu tambusungu bwa lufu, ooo, anka bwa ntumbo y’Efile Mukulu’shi, Mwan’Efile Mukulu amone mwadi akutumbishibwa.

⁵Yesu badi na Mata kifulo na mukwabo mwana mukashi, na Lasalasa.

⁶E habahushishe mwanda wa busungu bwe, bashalele kwanka kwa mukyīla mafuku abidi.

⁷Biabia kumongo, balungwile bana-be-ba-bukishi’shi: Twendei dimo mu Yudea.

⁸Bana-be-ba-bukishi babamwalulwile’shi: Mulambukishi, anka henyi habakyebele ba Yudea kukuasa mabwe’ha; olukenyi kwanka dia kabidi?

⁹Yesu bebalulwile’shi: Tamwi bihindji bia nsa ekumi na bibidi mu nguba umune su? Su muntu atembe mu kanya takakokela, ooo, mwanda amona etata dia hano-ha-nsenga.

¹⁰Anka su muntu atembe bufuku, akokola, mwanda kanya takemunda mwe.

¹¹Habahwile kwakula yino myanda bebalungwile’shi: Kuku etu Lasalasa mulale mu tulo; anka tanyende mu kumubusha mu tulo.

¹²Biabia bana-be-ba-bukishi babambile’shi: A! Mulambukishi, su mulale mu tulo akekala biya.

¹³Biosobi, Yesu badi akula mwanda wa lufu lwe: anka’bo tabahwandjikisha’shi, akwila mwanda wa kulala mu tulo.

¹⁴Biabia Yesu bebalungwile biya’shi, Lasalasa bafu.

¹⁵Anka, ha mwanda wenu nasehela tanyikalanga kwanka, mwanda, anukakumina, anka twendengyei kwadi.

¹⁶Biabia, Tomase batemunwanga bu Didimusa, balungwile bakwabo bana-be-ba-bukishi ’shi: Twende namu, n’atwe bene, tukafu n’E hamune.

¹⁷Biabia habafikile Yesu kwanka, bamusañene mulale ’mashama mafuku ananka.

¹⁸Betani badi hehi na Yelusalema, kubadi kihindji kia kilometre isatu.

¹⁹Bena Yudea be bungi babadi bafikye kwi Mata na Madia, mu kwibasamba ha mwanda wa mukwabo.

²⁰Binyibiabia, Mata hakuhusha’shi. Yesu ngiu wafiki, bayile mu kumutundaisha: anka Madia badi mushale mu nshibo.

²¹Biabia Mata balungwile Yesu’shi: A! Mulambukishi, su obe wekalanga kuno mukwetu tabadi a kufwa.

²²Anka neuku’shi, sunga binobino kioso kiokatekye kw’Efile Mukulu, Efile Mukulu akakuha’kio.

²³Yesu bamulungwile’shi: Mukwenu akabuku dimo.

²⁴Mata bamwalulwile’shi: Neuku’shi akabuku dimo ha lusangukilo, kwifuku dia nkonko.

²⁵Yesu bamulungwile’shi: Ami uno nyi lusangukilo na muwa winyi: akankumina, sung’e bafu, anka akekala na muwa.

²⁶Ese e na muwa, akumina mwimi, takamono lufu, sunga mpahelahela. Okuminau su?

²⁷Bamwalulwile’shi: Uolo, Nfumwami: Nakumina’mishi, Obe we Kidisitu, Mwan’Efile Mukulu, yawa afiki hano-hansenga.

²⁸Habakwile biabia, bayile, aketamina mukwabo Madia mu bufiefie, bambile’shi: Mulambukishi bafiki, ngiu wakwitamina.

²⁹Habahushishe, bebwele lubilo, enda kwadi.

³⁰Biabia Yesu badi tabandjile kufika mu kibalo, badi kianka kubakamutundaishe Mata.

³¹Binyibiabia, Bena Yudea babadi nabo mu nshibo, abamusamba, hababamwene Madia bebo lubilo, tēnde, abo tabamulondo’shi: ’Ende ku mashama mu kudila kwanka.

³²Binyibiabia, Madia habafikile kubadi Yesu, hakumumona, bahone ku ngwa ye, eshi: A! Nfumwami, su obe wekalanga kuno, ndumian’etu tabadia kufwa.

³³Binyibiabia Yesu habamumwene kwete kudila, na baYudea namu baBafikile n’e abadidi, eshimba die dibamufudidile, dibadi anka fututu.

³⁴Baihwisheshi: Anwibamushikye kwi kunyi? Babamulungwile’shi: A! Mulambukishi ofwotale.

³⁵Yesu badile mpolo.

³⁶Biabia Bena Yudea babambile’shi: Talai biadi ne kifulo!

³⁷Anka bangi namu’shi: Au muntu abula meso abadi mpofu, tabadi mwiukye mwa kulekyesha uno muntu namu kufwa su?

³⁸Binyibiabia Yesu n’eshimba difudile munda anka fututu kabidi, bayile ku mashama. Abadi a muta n’ebwe dibadi dibwikile hanka.

³⁹Yesu bambile’shi: Katushai ebwe. Anka Mata mukashian’e mufwe, bamulungwile’shi: A! Nfumu etadi anunku binobino, mwanda tadi mafuku ananka na kufwa.

⁴⁰Yesu bamwihwishe’shi: A nkikulungwila’mishi su bokumina okamono ntumbo y’Efile Mukulu su?

⁴¹Henyihaha babakashishe’bwe dibadi dibwikile ku mashama alale mufwe. Biabia Yesu babandulwile meso’shi: Yaiya nakutumbula mwanda obe bompushisha.

⁴²Neukile’shi ompushisha mafuku oso: anka ha mwanda wa bano bantu bemane, nakula uno mwanda’shi, bakumine’shi, Obe bontumine.

⁴³Habahwile kwakula biabia belele musase ukata’shi: Lasalasa tuka.

⁴⁴N’e badi mufwe batukile, muhombelwe mbwisha ya bamushikile nayo, ku masa na ku ngwa ye: na ku mpala kwe kubadi kuhombelwe kitambala. Yesu bebalungwile’shi: Muhombolei, ēnde.

⁴⁵Biabia Bena Yudea be bungi babadi bafikye kwi Madia, abamwene bibakitshine Yesu, abamukuminyine.

⁴⁶Anka bangi bakwabo babayile kwi baFadiseo, kwibalungula bibakitanga Yesu.

⁴⁷Binyibiabia, batshiite bakwidi na baFadiseo, babebungile mu lukuku, babambile’shi: Tukite na minyi? mwanda uno muntu kwete kukita bilengeleshi bibungi.

⁴⁸Su atumuleka bisumanga, boso bakamukumina: biabia Bena Loma abakafiki na kunyenana nsenga yetu, na mwilo wetu namu.

⁴⁹Umune abo, mutemunwe bu Kaifasa, badi mutshiito mu kiakia kihwa, bebalungwile’shi: Tanwi na kianwiuku.

⁵⁰Sunga kutentekesha biakidi kitulombene’shi, muntu umune afwile bantu, biabia mwilo woso taufu.

⁵¹E tamwiakwile uno mwanda: anka ha mwanda e badi tshiite mwakwidi mu kiakia kihwa, batemukile’shi: Yesu afwila uno mwilo.

⁵²Tañanka wa uno mwilo umune’nka’anke’shi; akafumankasha namu bana b’Efile Mukulu būmune, abadi abahalakene kungi kungi.

⁵³Henyihaha, ku diadi’efuku mpā, babadi abebungu lukuku mwa kumwihaila.

⁵⁴Binyibiabia Yesu tabatembanga hatoka munkatshi mwa baYudea dimo: anka bakatukile kwanka, bayile ku luhese hehi ku kabāka, ku kibalo kitemunwa bu Efeleme, baishishe kwanka na bana-be-ba-bukishi.

⁵⁵Biabia Pashika ya Bena Yudea yibadi hehi: be bungi abakatukile ku mpese yabo, bēnde ku Yelusalema kwibedi kwa Pashika, mwanda wa kwisūla.

⁵⁶Henyihaha abakimbile Yesu, anka hābadi bēmane muntempelo, babeihushene’ shi: Anutentekyesha kinyi’shi, takafiki ku Bidibwa bia kusehela su?

⁵⁷Batshiite bakwidi bakata na baFadiseo namu babēle kishila’shi: Su kwi muntu euku kwadi, aleshe kwanka, bakamukwate.